اسكەرگە شاقىرۋشىلار سانى كوبەيەدى

ونىڭ ايتۋىنشا, مەرزىمدى اسكەري قىزمەتكە شاقىرىل­عان­داردىڭ قالعان 13 پايىزى – ورىس, 2,5-ءى – وزبەك, 1,5 پايىزدان ۇيعىر, پولياك پەن چەشەندەرگە تيەسىلى. ال قالعان 3 پايىزىن وزگە ەتنوس وكىلدەرى قۇرايدى. بريفينگتە دەپارتامەنتتىڭ باسشىسى ساكەن ءجۇسىپوۆ ەلىمىزدە وتكىزىلىپ جاتقان اسكەري جيىنداردىڭ اۋعان­ستانداعى وقيعالارعا ەشقانداي قاتىسى جوق ەكەنىن دە ايتىپ ءوتتى.

2021 جىلعى كۇزگى اسكەرگە شاقىرۋ ناۋقانىن ۇيىمداستىرۋ تاقىرىبىنا ارنالعان بريفينگتە دەپارتامەنت وكىلدەرى ەكىنشى جىل پاندەميا جاعدايىندا وتكىزىلىپ جاتقان اسكەرگە شاقىرۋ ناۋقانى جايلى كەڭىنەن ماعلۇمات بەردى. مەملەكەت باسشىسىنىڭ 2021 جىلعى 5 اقپانداعى جارلىعىنا سايكەس بيىل ازاماتتاردى كۇزگى مەرزىمدى اسكەري قىزمەتكە شاقىرۋ ءىس-شارالارى 1 قىركۇيەكتەن باس­تالادى. جىل سوڭىنا دەيىن جال­عاساتىن اسكەرگە شاقىرۋ ناۋ­قانى بارىسىندا قارۋلى كۇش­تەردى, باسقا دا اسكەرلەر مەن اسكەري قۇرالىمداردى 18 بەن 27 جاس ارالىعىنداعى 17 مىڭعا جۋىق ازاماتپەن تولىقتىرۋ جوسپارلانىپ وتىر. سپيكەرلەر ازاماتتاردى مەرزىمدى اسكەري قىزمەتكە شاقىرۋ قولدانىستاعى زاڭناماعا سايكەس جۇرگىزىلەتىنىن, بۇل ءىس-شارالاردى نەگىزىنەن جەرگىلىكتى اتقارۋشى ورگاندار ۇيىمداستىراتىنىن مالىم­دەدى. ال مەرزىمدى اسكەري قىزمەت­تىڭ اسكەري قىزمەتشىلەرىن زاپاس­قا شىعارۋ ولار اسكەرگە شاقى­رىلعان كۇننەن باستاپ 12 اي وت­كەننەن كەيىن جوسپارلى تۇردە جۇزەگە اسىرىلادى. جالپى, ەل پرەزيدەنتىنىڭ تاپسىرماسىنا سايكەس, قورعانىس مينيسترلىگىندە وتكەن جىلدارمەن سالىستىرعاندا قارۋلى كۇشتەرگە اسكەرگە شاقى­رىلۋشىلاردىڭ سانىن كەزەڭ-كە­زەڭىمەن كوبەيتۋ جوسپارلانعان.

اسكەرگە شاقىرۋ جانە جيىن پۋنكتتەرىندە كوروناۆي­رۋس ينفەك­تسياسىنىڭ الدىن الۋعا, ىندەتتىڭ تارالۋىنا جول بەر­مەۋگە ەرەكشە ءمان بەرى­لىپ وتىر­عانىن ايتقان دەپار­تامەنت باس­شىسى اسكەرگە شاقىرى­لۋ­شى­­لارعا پتر زەرتتەۋى ەكى رەت جۇرگىزىلەتىنىن دە حابارلادى. «بەل­گىلەنگەن سانيتارلىق-ەپيد­ە­ميالىق شەكتەۋلەردى ساقت­اۋ, مەديتسينالىق ماسكالار­مەن, دەز­ينفەكتسيالاۋ قۇرال­دا­رى­مەن قام­تاماسىز ەتۋ – قور­عا­نىس ءمي­نيسترى­نىڭ ۇدايى باقى­لاۋىن­­دا. اسكەرگە شاقىرىلۋ­شى­لار مەن ولاردىڭ اتا-انالارى كاران­تيندىك شەكتەۋلەردى ساقتاۋ قاجەت­تىگىن جەتە تۇسىنگەندەرى ءجون. سەبەبى بۇل اسكەري ورتادا ىندەتتىڭ جاپپاي تارالۋىنا جول بەرمەۋگە ىقپال ەتەدى», دەدى سپيكەر.

سونىمەن قاتار الداعى اسكەر­گە شاقىرۋ بارىسىندا تسيفرلىق دامۋ جانە اەروعارىش ونەركاسىبى مينيسترلىگىنىڭ 1414 قىزمەتىنىڭ سەرۆيسى ارقىلى اسكەرگە شاقى­رى­لۋشىلارعا SMS حابارلاما­لار تاراتۋدى جالعاستىرۋ جوس­­­پارلانعان. «حاباردار ەتۋ پرو­تسەسى­نەن جەكە قارىم-قاتىناس جاساۋ­دى الىپ تاستاۋ ينفەكتسيا جۇقتىرۋ قاۋپىن ازايتادى», دەيدى دەپارتامەنت وكىلدەرى.

بيىلعى كوكتەمگى اسكەرگە شا­قىرۋ كەزىندە مەرزىمدى اسكەري قىز­مەتكە اسكەرگە شاقىرۋدى كەيىنگە قالدىرۋ جانە ودان بوساتۋ «ەلەكتروندى ۇكىمەت» پور­تالىنىڭ «ە-ليتسەنزيالاۋ» مەم­لەكەتتىك دەرەكتەر بازاسىنىڭ اقپا­راتتىق جۇيەسى ارقىلى مەم­لەكەتتىك قىزمەت كورسەتۋ شەڭ­بەرىندە جۇزەگە اسىرىلعان بولاتىن. مۇنداعى باستى ماقسات – وسى باعىتتاعى سىبايلاس جەمقورلىق تاۋەكەلدەرىن ازايتۋ ەدى. وسى جۇيە جونىندە تولىقتىرىپ وتكەن سپيكەر: «كورسەتىلگەن مەملەكەتتىك قىزمەتتەر كورسەتۋ ءتارتىبى تۋرالى ناقتى اقپاراتتى ەgov.kz سايتىنان الۋعا بولادى نەمەسە ول تۋرالى ارنايى ازىرلەنگەن جادىنامانى جاقىن جەردە ورنالاسقان كەز كەلگەن جەرگىلىكتى اسكەري باسقارۋ ورگاندارىنان الا الاسىزدار. ءبىز جۇمىستى بۇرىنعىداي كەرى بايلانىستى كوزدەيتىن بارىنشا اشىق فورماتتا جالعاستىرامىز. اسكەرگە شاقىرىلۋشىلار جانە ولاردىڭ اتا-انالارى, جۋرناليس­تەر مەن قوعام وكىلدەرى وزدەرىنە قاجەتتى اقپارات الۋ ءۇشىن كەز كەل­گەن ۋاقىتتا حابارلاسا الادى. ول ءۇشىن ءاربىر قورعانىس ىستەرى جو­نىن­دەگى دەپارتامەنتتە ەلەك­ت­­روندى پوشتا جاشىكتەرى جانە الەۋمەتتىك جەلىلەردە رەسمي اك­­­كاۋنتتار اشىلدى», دەدى ول. سون­داي-اق بارلىق اقشا تالاپ ەتۋ جا­نە باسقا دا سىبايلاس جەم­­قور­­لىق كورىنىستەرى بويىنشا كەڭەس الۋ ءۇشىن قورعانىس ىستەرى جو­نىن­­دە­گى دەپارتامەنتتەردىڭ «قارۋ­­لى كۇشتەر – ادالدىق الاڭى» جوبا­لىق كەڭسەسىنە جۇگى­نۋ كە­رەكتىگىن, بولماسا سەنىم تەلە­فون­دارىنا حابارلاسۋ قاجەت ەكەنىن ايتتى.