دورتمۋندتا قازاقستان رەسپۋبليكاسىنىڭ قۇرمەتتى كونسۋلدىعى اشىلدى

قۇرمەتتى كونسۋل لاۋازىمىنا «WILO SE» كومپانياسىنىڭ باسقارما توراعاسى جانە پرەزيدەنتى, گەرمان ەكونوميكاسى شىعىس كوميتەتىنىڭ توراعاسى وليۆەر گەرمەس تاعايىندالدى.

جاڭا قۇرمەتتى كونسۋلعا كونسۋلدىق پاتەنتتى قر گفر-داعى ەلشىسى داۋرەن كارىپوۆ رەسمي تۇردە تابىس ەتتى. دورتمۋند قالاسىندا وتكەن سالتاناتتا ءسوز سويلەگەن ەلشى د.كارىپوۆ و.گەرمەستىڭ جەكە جانە كاسىبي قاسيەتتەرى مەن بەدەلىن ەرەكشە اتاپ ءوتتى.

جاڭا قازاقستاندىق قۇرمەتتى كونسۋل «Wilo Group» كومپانياسىنىڭ باسقارما توراعاسى بولىپ تابىلادى, ول الماتى وبلىسىندا قۋاتى جىلىنا 2 000 بىرلىك سورعى شىعاراتىن زاۋىتتىڭ قۇرىلىسىنا ينۆەستيتسيا سالعان. قازاقستان نارىعىندا كەڭىنەن تارالعان «Wilo» سورعىلارى كوممەرتسيالىق جانە اكىمشىلىك عيماراتتاردا: مينيسترلىكتەردە, «بايتەرەك» مونۋمەنتىندە, الماتى قالاسىنداعى «نۇرلى-تاۋ» بيزنەس ورتالىعىندا ورناتىلدى.

سونداي-اق, و.گەرمەس گەرمان ەكونوميكاسىنىڭ شىعىس كوميتەتىن باسقارادى, ول شىعىس ەۋروپا مەن ورتالىق ازيانىڭ 29 ەلىندە گەرمان بيزنەسىنىڭ مۇددەسىن ءبىلدىرىپ, قازاقستانمەن ساۋدا-ەكونوميكالىق ءوزارا ءىس-قيمىلدى قولدايدى. قازىرگى ۋاقىتتا سولتۇستىك رەين-ۆەستفاليا مەن قازاقستانداعى الماتى وبلىسى اراسىنداعى سەرىكتەستىك تۋرالى ماسەلە قاراستىرىلۋدا.

و.گەرمەس مىرزانىڭ تابىستى جانە ناتيجەلى جۇمىسىنا سەنىم بىلدىرە وتىرىپ, د. كارىپوۆ ەلشىلىك تاراپىنان جان-جاقتى كومەك كورسەتۋگە ۋادە بەردى. قازاقستاننىڭ قۇرمەتتى كونسۋلى و.گەرمەس ءوز سوزىندە بيۋرونىڭ اشىلۋى قر مەن گفر اراسىنداعى ىنتىماقتاستىقتىڭ جوعارى ديناميكاسىنىڭ كورسەتكىشى بولىپ تابىلاتىنىن جانە ەلدەر اراسىنداعى ساۋدا-ەكونوميكالىق, مادەني-گۋمانيتارلىق جانە وڭىرلىك بايلانىستاردى ودان ءارى كەڭەيتۋگە جول اشاتىنىن اتاپ ءوتتى.

ءىس-شاراعا دورتمۋند قالاسىنىڭ مەرى توماس ۆەستفال, «WILO SE» كومپانياسىنىڭ باسقارما مۇشەلەرى, گفر-داعى قر ەلشىلىگىنىڭ, جەر مينيسترلىكتەرىنىڭ, مەريا مەن دورتمۋندتىڭ ساۋدا-ونەركاسىپ پالاتاسىنىڭ وكىلدەرى قاتىستى.