ورالدا جۇمىسشى توعىز قاباتتى ءۇيدىڭ توبەسىنەن قۇلاپ, قازا تاپتى. عيماراتتىڭ شاتىرىن جوندەۋ «وڭىرلەردى دامىتۋ» مەملەكەتتىك باعدارلاماسى بويىنشا جۇرگىزىلگەنى بەلگىلى بولدى, دەپ حابارلايدى Egemen.kz Tengrinews.kz-كە سىلتەمە جاساپ.
پوليتسيا دەپارتامەنتى قىرىق جاستاعى ەر ادامنىڭ قايتىس بولعانى تۋرالى حابارلاما 21 تامىزدا تاڭعى 9-دا تۇسكەنىن ايتتى.
«ەر ادام قۇرمانعازى كوشەسىندەگى ءۇيدىڭ توعىزىنشى قاباتىنان ءبىرىنشى قاباتتىڭ كۇنقاعارىنا قۇلاپ كەتكەن. ول جەدەل جاردەم كەلگەنگە دەيىن قايتىس بولدى. ورىن العان وقيعا جازاتايىم وقيعا رەتىندە تىركەلدى», دەدى بقو پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆ.
بقو-نىڭ ەبەك ينسپەكتسياسى جونىندەگى باسقارماسىندا اتالعان فاكتى بويىنشا تەرگەۋ باستالدى. مۇندا جوندەۋدىڭ باس مەردىگەرى «ورال قۇرىلىس جوندەۋ سەرۆيس» جشس ەكەنى انىقتالدى. بۇل كومپانيا ورالداعى «تكش جاڭعىرتۋ» باعدارلاماسىنىڭ وپەراتورى بولىپ تابىلادى. سەرىكتەستىك مەردىگەر ۇيىم رەتىندە «جايىق سيتي» جشس جالدادى. ولار ءوز كەزەگىندە, «ماكسوت» جك قوسالقى مەردىگەر ۇيىمىمەن شارت جاساسقان.
ينسپەكتورلار بۇل ۇيىمداردىڭ جۇمىسىندا بۇزۋشىلىقتار انىقتالعانىن ايتتى. ولاردىڭ ايتۋىنشا, قۇرىلىس ۇيىمدارىندا ىشكى باقىلاۋ جوق, ادامدار ەڭبەك شارتتارىن جاساماي جۇمىس ىستەيدى, ولارعا جەكە قورعانىس قۇرالدارى بەرىلمەيدى جانە قاۋىپسىزدىك تەحنيكاسى بويىنشا نۇسقاۋلىق وتكىزىلمەيدى.
«ماكسوت» جك يەسى ءوزىنىڭ تۋىسىن جۇمىسقا شاقىردى. ول كىرپىش زاۋىتىندا جۇمىس ىستەدى جانە اۋرۋحانادا بولدى. ەر ادام قاۋىپسىزدىك تەحنيكاسىن بۇزۋ سالدارىنان قازا تاپقان بولۋى مۇمكىن», دەدى بقو ەڭبەك ينسپەكتسياسى باسقارماسى باسشىسىنىڭ مىندەتىن اتقارۋشى قازبەك جۇماگەرەەۆ.
جىل باسىنان بەرى بقو-دا 54 جازاتايىم وقيعا تىركەلدى, ونىڭ 36-سى وندىرىسپەن بايلانىستى. جۇمىس ورنىندا بەس ادام قازا تاپتى.