كەنشىلەر استاناسىنداعى ورتالىق ساياباقتىڭ ءسانى ارتا ءتۇستى. بەلگىلى كاسىپكەر نۇرلان سماعۇلوۆ قورىنىڭ قارجىلاي قولداۋىمەن مۇنداعى «نەپتۋن پاتشالىعى» مەن «وتباسى» موزايكالىق مۇسىندەرى قالپىنا كەلتىرىلدى.
بۇل جوباعا باستاماشى بولعان ۋربانيستيكا ورتالىعىنىڭ ماماندارى ىسكە كىرىسپەس بۇرىن ءمۇسىن اۆتورلارىنىڭ جازباشا كەلىسىمىن الدى. ءتىپتى موزايكا اۆتورلارىنىڭ ءبىرى ۆيكتور ارەنتتىڭ ءوزى دە بۇل جۇمىسقا اتسالىستى.
ۇزاق ۋاقىتتان بەرى تۇرعان بۇل مۇسىندەر ابدەن توزا باستاعان-تۇعىن: جابىننىڭ بۇتىندىگى بۇزىلىپ, سمالتا بويىمەن جارىقتار پايدا بولدى, تۇعىرلارى مورىپ, بلوكتاردىڭ اراجىگىنەن ءشوپ ءوسىپ شىعا باستاعان ەدى.
شەبەرلەردىڭ مۇسىندەردى قالپىنا كەلتىرگەنى ءوز الدىنا, سونىمەن بىرگە موزايكا ورنالاسقان اۋماق تا رەتكە كەلتىرىلدى. قالالىق اكىمدىكتىڭ كومەگىمەن شامدار ورناتىلىپ, قىرلى تاس توسەلدى, جاياۋ جولدار سالىندى. سونداي-اق موزايكالىق مۇسىندەر ماڭىنا گۇلزار جاسالىپ, كوشەتتەر وتىرعىزىلدى, كوگال ءشوپ ەگىلدى. اۆتوماتتى سۋارۋ جۇيەسى دە ورناتىلدى.
قاراعاندى ۋربانيستيكا ورتالىعىنىڭ سۋرەتشىسى جانە جەتەكشىسى شىڭعىس قاسىموۆ بۇل موزايكالىق مۇسىندەردىڭ قاراعاندىلىقتار ءۇشىن ەرەكشە مۇرا, ەستەلىك رەتىندە وتە ماڭىزدى جادىگەر ەكەنىن ايتادى.
– قاراعاندى – مونۋمەنتالدى ونەردىڭ سانى مەن ساپاسى جاعىنان ەڭ باي وبلىستىڭ ءبىرى. تاياۋ ارادا ۋربانيستيكا ورتالىعىنىڭ سايتىندا وبلىستىڭ بارلىق موزايكاسى بويىنشا قىسقاشا سيپاتتاماسى بار كارتا ورنالاستىرىلاتىن بولادى, – دەيدى ول.
ورتالىق ساياباقتىڭ اجارىن اشا تۇسكەن ءاربىر موزايكالىق ءمۇسىننىڭ جانىندا QR-كودى بار اقپاراتتىق تاقتايشالار ورناتىلدى.
قاراعاندى