اريزونا شتاتى 1994 جىلدان بەرى قۇرعاقشىلىقپەن كۇرەسىپ كەلەدى. اقش-تىڭ ساناق بيۋروسىنىڭ مالىمەتىنشە, شتات حالقىنىڭ سانى 2020 جىلى 7,2 ميلليون ادامعا دەيىن وسكەن. اسىرەسە اريزونانىڭ ەكى ءىرى قالاسى – فەنيكس پەن تۋسسوننىڭ اينالاسىندا, ماريكوپا, پيما جانە پينال وكرۋگتەرىندە تۇرعىندار تىعىز ورنالاسقان.
ەكى قالا دا, جەرگىلىكتى تايپالار, فەرمەرلەر, مۋنيتسيپالدى جانە ونەركاسىپتىك پايدالانۋشىلار دا سۋدى ورتالىق اريزونا جوباسى ارقىلى تۇتىنادى. اتالعان جوبا كانالدار مەن اكۆەدۋكتار جۇيەسىنەن قۇرالعان. جالپى العاندا, كاليفورنيادان باستاپ ۆايومينگكە دەيىنگى ايماقتى مەكەندەيتىندەر, ءتىپتى مەكسيكا حالقى وسى وزەن سۋىنا تاۋەلدى. قىسقاسى, وزەن شامامەن 40 ملن ادامدى تىرشىلىك نارىمەن قامتاماسىز ەتىپ وتىر.
وتكەن اپتادا اقش-تىڭ مەليوراتسيا بيۋروسى ميد كولىندەگى قۋاڭشىلىق تۋرالى رەسمي تۇردە جاريالادى. وسىلايشا, گۋۆەر بوگەتىندەگى سۋ دەڭگەيى ازايعان. كولورادو وزەنىنىڭ دە سۋى تارتىلىپ بارادى. بولجامعا سۇيەنسەك, كەلەر جىلى كولدەگى سۋ تاعى 30 پايىزعا ازايماق.
بىراق عالىمدار تاعى ءبىر ىستىق جاز بولسا, ءميدتىڭ سۋى تولارساقتان عانا كەلۋى مۇمكىن ەكەنىن ايتىپ وتىر. قازىرگى تاڭدا سۋ قويماسىنىڭ ماڭىزى زور. ول اريزونا, كاليفورنيا جانە نەۆادا شتاتتارىن سۋمەن عانا قامتاماسىز ەتىپ قويماي, اتالعان شتاتتارعا قاجەتتى ەلەكتر ەنەرگياسىن وندىرەدى.
ادەتتە دامبا تولى بولعاندا وندىرىلگەن توق 8 ملن تۇرعىندى قامتۋعا جەتەتىن. بىراق سۋدىڭ ازايۋى ەلەكتر ەنەرگياسى ءوندىرىسىنىڭ باياۋلاۋىنا اكەپ سوعىپ وتىر. سونىڭ سالدارىنان ءميدتىڭ ءوندىرىس كولەمى 25 پايىزعا ازايعان.