يزرايل ۇشاقتارى سەنبى كۇنى كەشكە گازاداعى حاماس ۇيىمىنىڭ نىساندارىنا شابۋىل جاسادى. بۇل تۋرالى اتالعان ەلدىڭ اسكەريلەرى حابارلادى. ءيزرايلدىڭ مۇنداي قادامعا بارۋىنا بۇعان دەيىنگى شەكارا ماڭىنداعى قاقتىعىس اسەر ەتكەن.
شەكاراداعى اتىس كەزىندە يزرايل ساربازى اۋىر جارالانعان ەدى. بۇدان بولەك, قاقتىعىس كەزىندە 41 پالەستينالىق تا جاراقات العان. ولار, نەگىزىنەن, حاماس جانە يەرۋساليمدى قولدايتىن باسقا فراكتسيالار ۇيىمداستىرعان گازاداعى نارازىلىق كەزىندە جارالانعان.
جۇزدەگەن پالەستينالىق مىقتى بەكىنگەن شەكارا ماڭىنا جينالعان. وقيعا بارىسىندا كەيبىرەۋلەر شەكارا قورشاۋىن بۇزۋعا تىرىسقان. ەندى ءبىرى يزرايل اسكەرلەرىنە قاراي جارىلعىش زاتتاردى لاقتىرعان كورىنەدى.
بۇعان جاۋاپ رەتىندە يزرايل اسكەريلەرى قارۋدان وق جاۋدىرعان. گازا دەنساۋلىق ساقتاۋ مينيسترلىگىنىڭ حابارلاۋىنشا, اۋىر جارالانعان ەكى پالەستينالىقتىڭ اراسىندا باسىنان وق تيگەن 13 جاسار بالا بار. ال باسقا جاراقات العانداردىڭ كوبىنىڭ اياق-قولىنا, ارقاسىنا جانە ىشىنە وق تيگەن.
يزرايل اسكەرىنىڭ حابارلاۋىنشا, ساربازدارعا اتىلعان وققا جاۋاپ رەتىندە ءيزرايلدىڭ جويعىش ۇشاقتارى حاماسقا تيەسىلى قارۋ-جاراق ساقتالاتىن جانە وندىرىلەتىن ايماققا شابۋىل جاساعان. ازىرگە زارداپ شەككەندەر تۋرالى اقپارات جوق.
سونداي-اق يزرايل گازانىڭ شەكارا ايماعىنا قوسىمشا كۇشتەر جىبەرگەنىن مالىمدەدى. ەلدەگى بۇقارالىق اقپارات قۇرالدارى اسكەريلەردىڭ «تەمىر كۇمبەز» زىمىرانعا قارسى جۇيەسىن قولدانۋدى كۇشەيتكەنىن حابارلادى.