«دەلتا» شتامى الەمنىڭ تۇكپىر-تۇكپىرىندە جوعارى قارقىنمەن تاراپ جاتىر. سونىڭ سالدارىنان بىرقاتار ەلدە كوروناۆيرۋسقا شالدىققانداردىڭ سانى بويىنشا انتيرەكورد تىركەلدى.
ماسەلەن, فيليپپيندە ءبىر تاۋلىكتە 17 231 ادامنىڭ ناۋقاستانعانى انىقتالعان. ال ۆەتنامدا 11 321 جاعداي تىركەلگەن. اۋستراليادا دا احۋال ءماز ەمەس. قۇرلىقتا ىندەت جۇقتىرعاندار سانى ارتىپ, بۇگىندە مىڭنان اسىپ جىعىلدى.
سيدنەيدە Covid-19 ناۋقاستارى سانىنىڭ وسۋىنە بايلانىستى كارانتين تاعى ءبىر ايعا ۇزارتىلدى. دۇيسەنبى, 23 تامىزدان باستاپ كۇشىنە ەنەتىن جاڭا شەكتەۋلەردىڭ ىشىندە مەگاپوليستىڭ 12 اۋدانىندا 21.00-دەن 05.00-گە دەيىن كومەندانتتىق ساعات ەنگىزىلدى. سونداي-اق ۇيدەن تىس جەردە ماسكا تاعۋ تالاپ ەتىلەدى.
وسىعان بايلانىستى اۋستراليادا كارانتينگە قارسى نارازىلىق اكتسيالارى ءوتتى. سيدنەيدە 47 ادام قاماۋعا الىندى, تاعى 260 ادامعا ايىپپۇل سالىندى. شتاتتىڭ پوليتسيا جانە توتەنشە جاعدايلار ءمينيسترىنىڭ ايتۋىنشا, نارازىلار سانى كوپ ەمەس ەكەنىنە قاراماستان, ولار ينفەكتسيانىڭ تارالۋىنا سەبەپ بولۋى مۇمكىن. سوندىقتان شەرۋگە شىققاندارعا وسىنداي جازا قولدانىلىپ وتىر.
اقش-تا جالعان ۆاكتسينا سالدىرۋمەن كۇرەس باستالدى. كەدەندىك جانە شەكارالىق باقىلاۋ قىزمەتكەرلەرى 3 مىڭنان استام جالعان Covid-19 سەرتيفيكاتىن تاركىلەدى. ۆاكتسينا پاسپورتتارى انكوريدج پورتىنا كەلگەن. جىبەرۋشىنىڭ مەكەنجايى – قىتاي. جالعان قۇجاتتار اقش-تىڭ اۋرۋلاردى باقىلاۋ جانە الدىن الۋ ورتالىعىنىڭ انىقتامالارىنان كوشىرىلگەن. بىراق ونىڭ ساپاسى تومەن.
جالپى, مۇحيتتىڭ ارعى بەتىندە دە جالعان پاسپورت جاساتاتىندار تىيىلماي تۇر. بۇعان دەيىن تەننەسي شتاتىنداعى كەدەنشىلەر وسىعان ۇقساس 3 مىڭ قۇجاتتى تاركىلەگەن بولاتىن.
ۆاكتسينا قابىلداماۋدىڭ سالدارى دەنساۋلىققا تەرىس اسەرىن بەرەدى. اقش-تىڭ وڭتۇستىك ميسسيسيپي شتاتىندا Covid-19 جۇقتىرعاندار سانى كوبەيىپ كەتتى. اۋىر جاعدايداعى ناۋقاستارعا ارنالعان اۋرۋحانالارداعى ورىندار تولىپ قالدى. قارقىندى تەراپيا پالاتالارى پاتسيەنتتەرگە لىق تولى. اۋرۋعا شالدىققاندار كۇتۋ زالدارىنا جانە مەديتسينالىق مەكەمەلەردىڭ دالىزدەرىنە ورنالاستىرىلىپ جاتىر.
ۋنيۆەرسيتەتتىڭ مەديتسينالىق ورتالىعىنىڭ گاراجدارىنا ەكى دالالىق اۋرۋحانا ورنالاستىرىلعان. ويتكەنى شتات بيلىگى حالىقتان ۆاكتسينا سالدىرۋدى تالاپ ەتپەيدى. سوندىقتان قازىرگى تاڭدا ميسسيسيپي شتاتى ۇجىمدىق يممۋنيتەتتى قالىپتاستىرۋدا ەڭ سوڭعى ورىندا تۇر. سونىڭ سالدارىنان «دەلتا» شتامى تەز تارالىپ, ناۋقاستار سانى كوبەيىپ بارادى.
ەلدە كوروناۆيرۋس جۇقتىرعاندار سانى ارتۋىنا بايلانىستى فەدەرالدى دەنساۋلىق ساقتاۋ ورگاندارى Pfizer نەمەسە Moderna ۆاكتسينالارىنىڭ تولىق كومپونەنتىن العاندارعا ءۇشىنشى مارتە ەكپە سالدىرۋدى ۇسىندى. ويتكەنى اقش-تا ىندەتتىڭ كەزەكتى تولقىنى باستالدى. قازىرگى تاڭدا ناۋقاستار سانى كۇن ساناپ ارتىپ بارادى.
ايتسە دە كەي عالىمدار مۇنى قولدامايدى. ولاردىڭ پايىمداۋىنشا, ءۇشىنشى دوزانىڭ تيىمدىلىگى تۋرالى مالىمەت جەتكىلىكسىز. سوندىقتان بار دەرەكتەر ناقتىلانبايىنشا اسىقپاۋعا شاقىردى.
اقش-تىڭ بۇل قادامىن دۇنيەجۇزىلىك دەنساۋلىق ساقتاۋ ۇيىمى قاتاڭ سىنعا الدى. ويتكەنى افريكا سەكىلدى الەمنىڭ كەلەسى ءبىر بولىگىندە مۇلدەم ۆاكتسينا سالدىرماعاندار وتە كوپ. سوندىقتان ۇيىم اقش بيلىگىنەن تەك وزدەرىن عانا ويلاماي, باسقالارعا دا ۆاكتسينا بەرۋدى سۇراپ وتىر.
ايتا كەتەرلىگى, اقش-تاعى ىندەتتىڭ قازىرگى جويقىن تولقىنى «ۆاكتسيناسىز پاندەميا» دەپ اتالادى. ويتكەنى ناۋقاستاردىڭ دەنى – ۆاكتسينا سالدىرماعاندار. سونداي-اق ەكپە العان ادامداردىڭ ءولىمى وتە سيرەك كەزدەسەدى.
رەسەيدىڭ جوعارى وقۋ ورىندارى شەتەلدىك ستۋدەنتتەردى دە ۆاكتسينامەن قامتاماسىز ەتپەك. ۋنيۆەرسيتەتتەر مەن ينستيتۋتتاردىڭ شەتەلدەن كەلگەن ستۋدەنتتەرى ەكپە الۋعا ۇسىنىس ءبىلدىرۋى قاجەت. رەسەي فەدەراتسياسى ءبىلىم جانە عىلىم مينيسترلىگىنىڭ باسشىسى ۆالەري فالكوۆ بارلىق شەتەلدىك ستۋدەنت رەسەيگە وقۋعا كەلىپ, ۆاكتسينا سالدىرا الادى دەپ مالىمدەدى.
تالليندە وقۋشىلارعا كوروناۆيرۋسقا قارسى ەكپە سالۋ باستالدى. ۆاكتسينالاۋ 21 جانە 22 تامىز كۇندەرى ءتالليننىڭ التى مەكتەبىندە الدىن الا تىركەۋسىز ءوتتى. ەكپەگە ءبىرىنشى كەزەكتە 12-18 جاستاعى وقۋشىلار, سونداي-اق ولاردىڭ وتباسى مۇشەلەرى شاقىرىلدى.
چەرنوگوريا ەپيدەميالىق جاعدايدىڭ ناشارلاۋىنا بايلانىستى شەتەلدىكتەردىڭ ەلگە كىرۋ شارتتارىن قاتاڭداتتى. سونداي-اق ەلدە اشىق اسپان استىندا 50-دەن استام ەرەسەك ادامنىڭ جينالۋىنا تىيىم سالىندى. بۇدان بولەك, پتر تەستى جانە ۆاكتسينالاۋ سەرتيفيكاتىنسىز تۋريستەردى دەمالىس ورىندارىنا كىرگىزبەيدى. ەلگە كىرۋ ەرەجەلەرىن قاتاڭداتۋ كوروناۆيرۋستىڭ «دەلتا» شتامىنىڭ تارالۋىنا بايلانىستى. 10 قىركۇيەكتەن باستاپ كۇشىنە ەنەتىن تالاپقا سايكەس تۋريستەر Covid-19 تەستىنىڭ تەرىس ناتيجەسى, ۆاكتسينا العانىن نەمەسە كوروناۆيرۋسپەن اۋىرعانىن راستاۋعا ءتيىس. قازىرگى ۋاقىتتا رەسەيدەن جانە بىرقاتار باسقا مەملەكەتتەن كەلگەن تۋريستەر چەرنوگورياعا ەشقانداي شەكتەۋسىز كىرە الادى.
دجاكارتا كوروناۆيرۋسقا قارسى ۆاكتسينانىڭ 7,5 ملن دوزاسىن الدى. نيدەرلاند 450 مىڭ دوزا AstraZeneca ۆاكتسيناسىن جىبەرسە, Pfizer كومپانياسى 1,5 ملن دوزا بولگەن. يندونەزيا سونىمەن قاتار Sinovac جانە AstraZeneca كومپانيالارىنان كوروناۆيرۋسقا قارسى ۆاكتسينا ساتىپ الادى. Sinovac 5 ملن دوزا جىبەرسە, ال AstraZeneca – 567 مىڭ دوزا جونەلتكەن. تامىز ايىنىڭ باسىنان بەرى ەلگە 22 792 480 دوزا ۆاكتسينا كەلىپ ءتۇستى. ەل بيلىگى ەكونوميكالىق ءوسۋدىڭ كىلتى ۆاكتسينالاۋ جانە كوروناۆيرۋستى جۇقتىرۋ جاعدايلارىن بولدىرماۋ ەكەنىن ايتىپ وتىر.
كوسوۆو جۇقپالى اۋرۋلارعا قارسى اۋرۋحانالارى ەندى ناۋقاستاردى قابىلداي المايدى. كۇن سايىن كوروناۆيرۋس تاسىمالداۋشىلارىنىڭ سانى جۇزدەگەن ەسەگە كوبەيدى. وتكەن تاۋلىكتە وبلىستا Covid-19 جۇقتىرعان 2 236 جاعداي تىركەلدى. بۇل – انتيرەكورد. ءبىر ايدىڭ ىشىندە ۆيرۋس تاسىمالداۋشىلار سانى بىرنەشە جۇزدەن 10 مىڭعا دەيىن كوتەرىلىپ, ءوسۋ كورسەتكىشى ۇلعايدى. اۋرۋحاناعا تۇسكەن پاتسيەنتتەردىڭ 90 پايىزى وتتەگى باللونىمەن دەمالىپ جاتىر. ولاردىڭ بارلىعى ۆاكتسينالانباعان. قازىرگى ۋاقىتتا 221 مىڭ تۇرعىن ەكپەنىڭ تولىق كومپونەنتىن الدى. وسىعان بايلانىستى جاعدايدى باقىلاۋ ءۇشىن بيلىك جاڭا شەكتەۋلەر ەنگىزدى.
ۆەتنامدا كوروناۆيرۋستىڭ جاڭا تولقىنى باستالدى. ءبىر كۇن بۇرىن ەلدە Covid-19-دىڭ جاڭا تاۋلىكتىك ەڭ جوعارى كورسەتكىشى تىركەلدى – 10 654 جاعداي. الدىڭعى رەكوردتىق ءوسىم 14 تامىزدا تىركەلگەن ەدى. ول كەزدە 9 716 ادام ناۋقاستانعان-دى. ينفەكتسيانىڭ جاڭا فاكتىلەرىنىڭ ىشىندە 15 جاعداي سىرتتان تاسىمالدانعان. بۇگىنگى تاڭدا كوروناۆيرۋس جۇقتىرعان ۆەتنامدىقتاردىڭ جالپى سانى 312 611-گە جەتتى, ولاردىڭ 7150-ءى قايتىس بولدى. سونىمەن قاتار وسى ۋاقىتقا دەيىن ەلدىڭ 94,5 ملن-نان استام تۇرعىنىنىڭ تەك 15,9 ملن ۆيرۋسقا قارسى ۆاكتسينا العان.
ازەربايجاندا كوۆيد-پاسپورتى بولماعان جاعدايدا قوعامدىق ورىندارعا بارعان ادامدارعا ايىپپۇل سالىنادى. جەكە تۇلعالار ءۇشىن ايىپپۇل 235 دەيىن, زاڭدى تۇلعالار ءۇشىن 2 950 دوللارعا دەيىن جەتەدى. وسىلايشا, 1 قىركۇيەكتەن باستاپ ساۋدا ورتالىقتارىندا, قوناقۇيلەردە, ءدامحانالار مەن مەيرامحانالاردا تەك كوۆيد-پاسپورتى بار ادامدارعا عانا قىزمەت كورسەتىلەدى. قۇجات 18 جاستان اسقان بارلىق ادامنان, سونىڭ ىشىندە ستۋدەنتتەردەن دە تالاپ ەتىلەدى. ۆاكتسينالانۋدى راستاماي, تەك قاراپايىم دۇكەندەرگە بارۋعا بولادى.
بەلگيادا ۆاكتسينالاۋ ناۋقانى قارقىندى ءجۇرىپ جاتىر. وسىلايشا, كوروناۆيرۋسقا بايلانىستى جاريالانعان كارانتين تالاپتارىن جەڭىلدەتۋگە مۇمكىندىك تۋدى. وسى ۋاقىتتا 7 ملن 796 مىڭ بەلگيالىق كوروناۆيرۋسقا قارسى ۆاكتسينا الدى. بۇل – ەل حالقىنىڭ جاسى 18-دەن اسقان تۇرعىندارىنىڭ 80 پايىزى.
«بۇگىنگى تاڭدا ەرەسەك 10 ادامنىڭ سەگىزى ۆاكتسينا العان. وسىلايشا, ءبىز «جازعى جوسپاردى» اسىرا ورىندادىق جانە بيىلعى 1 قىركۇيەكتەن باستاپ بوستاندىققا ماڭىزدى قادام جاسايمىز», دەدى بەلگيانىڭ پرەمەر-ءمينيسترى الەكساندر دە كروو.
برازيليادا سوڭعى 24 ساعات ىشىندە 28 388 جاڭا كوروناۆيرۋستىڭ راستالعان جاعدايى تىركەلدى, 698 ادام قايتىس بولدى. پاندەميا باستالعاننان بەرى برازيليادا 20 ملن استام ادام قاتەرلى دەرتتىڭ تىرناعىنا ىلىكتى. ءولىم سانى 574 209-عا جەتتى.
فرانتسيانىڭ ىشكى ىستەر مينيسترلىگى سەنبىدە شامامەن 175 500 ادام دەمونستراتسياعا شىققانىن حابارلادى. بىراق ادامدار جازعى دەمالىستان ورالعان كەزدە ولاردىڭ سانى ارتۋى مۇمكىن.