بۇل تۋرالى وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ ايتتى, دەپ جازادى Egemen.kz.
سايديكرام نيازحودجاەۆتىڭ ايتۋىنشا وزبەكستاننىڭ 7 جوعارى وقۋ ورنىندا گۋمانيتارلىق جانە تەحنيكالىق ماماندىقتار قازاق تىلىندە ۇيرەتىلىپ جاتىر.
«2018 جىلى قازاقستاندا وزبەكستان رەسپۋبليكاسى جىلى اتالىپ ءوتتى. ايتۋلى جىل اياسىندا قازاقستاندا ءتۇرلى باعىتتاعى 90-نان استام ءىس-شارا ۇيىمداستىرىلدى. سايكەسىنشە, 2019 جىلى ءبىزدىڭ ەلدە قازاقستان جىلى اتالىپ ءوتىلدى جانە ونىڭ اياسىندا 80-نەن استام ءىس-شارا ءوتتى. ەكىجاقتى وتكەن ءىس-شارالار ساياسي, اعارتۋ, مادەني جانە گۋمانيتارلىق باعىتتى مەڭزەدى. وكىنىشكە قاراي, 2020 جىلى پاندەمياعا بايلانىستى ەكىجاقتى ءىس-شارالاردى توقتاتا تۇرۋعا تۋرا كەلدى. دەگەنمەن ەكى ەل اراسىنداعى ءوزارا بايلانىس توقتاعان ەمەس», دەدى سايديكرام نيازحودجاەۆ ەلورداداعى وزبەكستان ەلشىلىگىندە وتكەن ءباسپاسوز ءماسليحاتىندا.
ودان بولەك, ەلشى وزبەكستانداعى قانداستاردىڭ تاعدىرى تۋرالى ايتتى.
«قازىرگى تاڭدا وزبەكستاندا 822 مىڭ قازاق ءومىر ءسۇرىپ جاتىر. ولار وزبەكستان ەلىنىڭ دامۋىنا ءوز ۇلەسىن قوسۋدا. ءبىزدىڭ ەلدە 400-دەي مەكتەپ قازاق تىلىندە ءبىلىم بەرىپ جاتىر. سونىمەن قاتار, وزبەكستاننىڭ 7 جوعارى وقۋ ورنىندا گۋمانيتارلىق جانە تەحنيكالىق ماماندىقتار قازاق تىلىندە ۇيرەتىلىپ جاتىر. 1992 جىلدان بەرى وزبەكستاننىڭ 30 وبلىس ورتالىعىندا قازاق مادەني ورتالىعى جۇمىس ىستەپ تۇر», دەيدى ول.
بۇعان دەيىن, سايديكرام نيازحودجاەۆ بيىلعى 6 اي ىشىندە قازاقستان مەن وزبەكستان ەلى اراسىنداعى تاۋار اينالىمى 1,9 ملرد اقش دوللارعا جەتكەنىن ايتتى.