ۇلتتىق تەننيس ورتالىعىنىڭ كورتتارىندا 19-26 قىركۇيەكتە Astana Open ATP 250 حالىقارالىق ءتۋرنيرى وتەدى, دەپ حابارلايدى Egemen.kz prosports.kz-كە سىلتەمە جاساپ.
اتالمىش جارىس ATP-نىڭ جاڭارتىلعان رەسمي كۇنتىزبەسىنە ەنگىزىلگەن. قازاقستان تەننيس فەدەراتسياسىنىڭ ۆيتسە-پرەزيدەنتى يۋري پولسكيدىڭ ايتۋىنشا, ATP-نىڭ ديرەكتورلار كەڭەسى مەن قاتىسقان ويىنشىلار وتكەن جىلعى وسى دودانىڭ دەڭگەيىن جوعارى باعالاعان. «پاندەميانىڭ قايتادان كەڭ تارالۋىنا بايلانىستى بيىل كۇزدە قىتايدا كوپتەگەن جارىستار وتپەيتىن بولدى. بۇعان الاڭداعان ATP باسشىلىعى ءبىزدىڭ ءبىر جارىستى وتكىزۋگە كەلىسىم بەرگەنىمىزگە ريزاشىلىق ءبىلدىردى. بۇل – ءبىز ءۇشىن جاقسى مۇمكىندىك, مۇنداي جارىستار ەڭ الدىمەن جاستارعا جول اشادى», دەدى يۋ.پولسكي.
Astana Open جارىسىنان ءبىر اپتا بۇرىن نۇر-سۇلتان قالاسىندا ەرلەر مەن ايەلدەر اراسىندا قازاقستان چەمپيوناتى وتەدى. مۇندا جەڭىمپاز اتانعان ويىنشى Astana Open-ءنىڭ نەگىزگى تۋرنيرىنە, جۇلدەگەرلەر ىرىكتەۋ سايىستارىنا جولداما الادى. استانا اشىق بىرىنشىلىگىنە الەكساندر بۋبليك, ميحايل كۋكۋشكين, اندرەي گولۋبەۆ پەن الەكساندر نەدوۆەسوۆتەر قاتىسادى. ال دميتري پوپكو, تيموفەي سكاتوۆ, دەنيس ەۆسەەۆ, بەيبىت جۋكاەۆ سەكىلدى جاستار ەل چەمپيوناتى ارقىلى ءوز باعىن سىناپ كورەدى.
جانكۇيەرلەر ءۇشىن ءبىر جاڭالىق, جارىستى ۇيىمداستىرۋشىلار بالالاردى شەكتەۋلى كولەمدە كورتقا كىرگىزۋدى جوسپارلاپ وتىر. ولار بارلىق سانيتارلىق تالاپتارعا سايكەس اۋەلى پتر تەست تاپسىرادى. ءسويتىپ ول بالالار سۇيىكتى تەننيسشىلەرىنىڭ ويىندارىن ءوز كوزىمەن كورە الادى. ەرەسەك جانكۇيەرلەر جىبەرىلمەيدى. قازاقستان تەننيس فەدەراتسياسى بارلىق ماتچتاردى قتف سايتى مەن قازاقستان تەلەارنالارىندا كورسەتۋدى ۇيىمداستىرادى