قر دەنساۋلىق ساقتاۋ ءمينيسترى الەكسەي تسوي اقتوبەدە جاڭا كوپسالالى اۋرۋحانا سالۋ جوسپارى تۋرالى ايتتى, دەپ حابارلايدى Egemen.kz.
«مينيسترلىك اقتوبە وبلىسىن دامىتۋدىڭ 2021-2025 جىلدارعا ارنالعان كەشەندى جوسپارىنىڭ جوباسىن ماقۇلدادى. كەشەندى جوسپار جوباسىندا 2 دەنساۋلىق ساقتاۋ وبەكتىسىن سالۋ, كەمىندە 25 مەكەمەنى كۇردەلى جوندەۋ جۇمىستارىنان وتكىزۋ, سونداي-اق ءوڭىردىڭ دەنساۋلىق ساقتاۋ ۇيىمدارىن جاراقتاندىرۋ كوزدەلگەن. كەشەندى جوسپار جوباسىندا رەسپۋبليكالىق دەڭگەيدە 350 توسەكتىك «اقتوبە قالاسىندا كوپبەيىندى اۋرۋحانا سالۋ جانە پايدالانۋ» مەملەكەتتىك-جەكەشەلىك ارىپتەستىك جوباسىن ىسكە اسىرۋ جوسپارلانعان», دەدى الەكسەي تسوي ۇكىمەت وتىرىسىندا.
جوبانى ىسكە اسىرۋ ءۇشىن Ellington Properties LLP تۇرىك Rönesans Holding كومپانياسىمەن بىرلەسىپ RenEll كومپانياسىن قۇردى.
«جوبا قولدانىستاعى جانە ەسكىرگەن جەدەل مەديتسينالىق جاردەم اۋرۋحاناسىنىڭ ورنىنا قاراستىرىلعان, قۇرىلىس كەزەڭىندە 700 جۇمىس ورنىن جانە پايدالانۋ كەزەڭىندە 600 جۇمىس ورنىن قۇرۋ جوسپارلانۋدا», دەدى مينيستر.