الەم كەيىنگى ەكى جىلدى اۋىر وتكەرىپ جاتىر. كۇننىڭ ءار ءساتى – ەلەڭ-الاڭ, اپاق-ساپاق سەكىلدى. وعان سەبەپ, ارينە, 2019 جىلى العاشقى بەلگىلەرى بايقالعان كوروناۆيرۋس ىندەتى. وسى ىندەت الىپ كەلگەن جاھاندىق پاندەميا الەمدە ەكونوميكالىق تۇراقسىزدىقتى, ساياسي سولقىلداقتىقتى, قوعام مەن ادام, ادام مەن ادام اراسىنداعى كەلىسپەۋشىلىكتەر مەن تۇسىنىسپەۋشىلىكتەردى تۋدىردى.
ءتىپتى ءوزارا سەنىمسىزدىك ادام مەن ادامنىڭ عانا ەمەس, الەمدىك قوعامداستىق پەن جەكەلەگەن ەلدەردىڭ, مەملەكەت پەن ادامداردىڭ اراسىنداعى الاۋىزدىققا الىپ كەلۋدە. اقپاراتتار اعىنىن باققاندا, ورتاق مامىلەنىڭ جوقتىعى مەن جاپپاي ىمىراسىزدىقتى انىق بايقايسىز. كەلىسسوزدەر ۇستەلى كوبىنە بوس تۇراتىن احۋال قالىپتاستى.
ادامدار ءاردايىم الەمدى وزگەرتۋگە ۇمتىلاتىن. مىنە, كوزىمىز كورگەندەي, كەيىنگى ەكى جىلدا دۇنيە شىن مانىندە وزگەردى. بىراق بۇل وزگەرىستەرگە ءبىز, ادامدار, دايىن بولماي شىقتىق.
دۇنيە جۇرتى 18 تامىزدى – ءتىل تابىسۋ كۇنى, ورتاق ءتىل كۇنى رەتىندە اتاپ ءوتىپ كەلەدى. الەمدە, ارينە, ورتاق ءتىل جوق, جاپپاي تاراعانى دا, جاساندىسى دا ول مىندەتتى ارقالاي المايدى. ادام – سانسىز كوپ, سان الۋان. سول كوپ جۇرتتا مۇددە دە, ماقسات تا ورتاق بولمايدى. بىراق ۇقساس ارمان مەن ءۇمىت بولادى ەمەس پە؟! اسىرەسە ول بەيبىتشىلىك پەن تىنىشتىققا, ءسابيدىڭ ۇيقىسى مەن كۇلكىسىنە, ادامزات بالاسىنىڭ بولاشاق تاعدىرىنا قاتىستى بولعاندا ءتىپتى ۇقساسىپ, ۇيقاسىپ كەتپەي مە؟!. ال وسىعان قاۋىپ تونگەندە قورقىنىش پەن ۇرەي دە ورتاق بولادى عوي.
مىنە, بۇل اتاۋلى كۇننىڭ نەگىزگى ماعىناسى دا وسىندا, ءتىلىڭ باسقا بولسا دا, تىلەگىڭ ءبىر, ءدىنىڭ باسقا بولسا دا, جۇرەگىڭ ءبىر بولماقتا جاتقانداي.