ەلوردادا جاستارعا جالعا بەرىلەتىن تۇرعىن ءۇي باعدارلاماسى جالعاسادى

جاستار جىلىنىڭ سالتاناتتى اشىلۋ شاراسىندا قر تۇڭعىش پرەزيدەنتى – ەلباسى نۇرسۇلتان نازارباەۆ جۇمىس ىستەيتىن جاستارعا ساتىپ الۋ قۇقىعىنسىز جالعا پاتەرلەر بەرۋ تۋرالى تاپسىرما بەرگەن. ەلباسىنىڭ تاپسىرماسىن 2019 جىلى نۇر-سۇلتان قالاسىنىڭ اكىمدىگى تولىقتاي ورىنداپ, جۇمىسشى جاستارعا 1050 پاتەردىڭ («استانالىق» جانە «الەم» ساۋدا ورتالىقتارىنىڭ اراسىنداعى تۇرعىن ءۇي كەشەنى) كىلتىن تابىستادى.

كەلەسى 2020 جىلعا دا ءدال وسىنداي مەجە قويىلعان ەدى, الايدا پاندەمياعا بايلانىستى جوسپارعا وزگەرىس ەندى. كوروناۆيرۋس ەپيدەمياسىنا بايلانىستى بىلتىر 350 پاتەر تاپسىرىلدى. جۇمىسشى جاستارعا پاتەرلەر نۇر-سۇلتان قالاسىنداعى ر.قوشقارباەۆ داڭعىلى, قورداي جانە № 23-31 كوشەلەرى قيىلىسىنداعى, سول سياقتى ابىلاي حان داڭعىلى مەن ب.مومىش ۇلى جانە ر.قوشقارباەۆ داڭعىلدارىنىڭ قيىلىسىنداعى تۇرعىن ۇيلەردەن بەرىلدى. بۇل جىلى جاستارعا بەرىلگەن باسپانا كولەمى 32-48 شارشى مەتر ارالىعىن قۇرايدى.

ەلباسىنىڭ باستاۋىمەن جۇزەگە اسقان جوبانىڭ ماقساتى – الداعى 5 جىل ىشىندە جاستاردىڭ قاراجات جيناپ, جەكە ءۇيىن ساتىپ الۋىنا جاعداي جاساۋ.

جوبا قاتىسۋشىلارىنا قويىلار نەگىزگى بەس قاعيدات بار: 29 جاستان اسپاعان, جۇمىس ىستەيتىن, مەنشىگىندە تۇرعىن ءۇيى جوق, جيناق جاساۋ ءۇشىن دەپوزيتتىك شوتىنىڭ بولۋى, سونداي-اق سوڭعى 6 ايدا كەمىندە 40 اەك تابىسىنىڭ بولۋى. جوباعا قاتىسۋشىلار قاتارى دا از ەمەس. بىلتىر 1-6 جەلتوقسان ارالىعىندا وتىنىمدەر قابىلداۋ ۇيىمداستىرىلىپ, جالپى 5463 ءوتىنىش قابىلداندى.

ءوتىنىم بەرگەن قاتىسۋشىلار اراسىندا ىرىكتەۋ بالدىق جۇيە بويىنشا, ال پاتەرلەردى ءبولۋ ءوتىنىش بەرۋشىنىڭ وتباسى قۇرامىنا سايكەس جۇرگىزىلدى.

بيىل جىل سوڭىنا دەيىن جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن 1050 باسپانانىڭ كىلتى تابىس ەتىلمەك.

ايتا كەتەيىك, ەلوردادا باسپانا ماسەلەسىن شەشۋ ءۇشىن اۋقىمدى شارالار جۇرگىزىلىپ جاتىر. وتكەن جىلى ەلوردادا جالپى كولەمى 3 ميلليون شارشى مەتر بولاتىن تۇرعىن ءۇي سالىنىپ, ەل يگىلىگىنە بەردى. سول سياقتى الەۋمەتتىك پاتەر بەرۋ كورسەتكىشى دە ەسەلەپ ۇلعايدى. ماسەلەن 2019 جىلى 2900 الەۋمەتتىك پاتەر پايدالانۋعا بەرىلسە, بيىل بۇل كورسەتكىش 10 مىڭعا دەيىن ارتتى.