قوستانايدا ەكى جۇمىسشى ۋلانىپ قالدى

ۆەدومستۆودان حابارلاعانداي, 16 تامىزدا ساعات 22:41-دە قوستاناي وبلىسى تجد جەدەل-قۇتقارۋ جاساعىنىڭ كەزەكشى بولىمىنە توتەنشە وقيعانىڭ كۋاگەرى بولعان ازاماتتان قوڭىراۋ تۇسكەن.

«قوستانايدىڭ ساۋدا كاسىپورىندارىنىڭ ءبىرىنىڭ اشىق اۋماعىندا 1990 جانە 1991 جىلدارى تۋعان ەكى جۇمىسشى ەس-ءتۇسسىز كۇيدە كارىز تازارتۋ قۇدىعىنان تابىلدى. سەپتيكتى تازارتۋعا تىرىسقان كەزدە زارداپ شەككەندەر ۋلى ءتۇتىننىڭ قۇربانى بولدى», دەپ ءتۇسىندىردى تجد.

8 مينۋتتان كەيىن, ساعات 22:49-دا قۇتقارۋشىلار وقيعا ورنىنا بارلىق جابدىقتارمەن كەلىپ, تىنىس الۋ اپپاراتتارىن كيىپ, قاۋىپسىزدىك ارقانىنىڭ كومەگىمەن قۇدىققا ءتۇستى. ەكى-ءۇش مەتر تەرەڭدىكتەن ەكى ەر ادام شىعارىلدى.

«اممياك پەن كۇكىرتسۋتەكپەن ۋلانعاننان كەيىنگى جاعداي وتە اۋىر بولدى. ولاردىڭ بىرىنە قۇتقارۋشىلار العاشقى مەديتسينالىق كومەك كورسەتتى, سودان كەيىن ەكەۋى دە دارىگەرلەردىڭ باقىلاۋىنا بەرىلدى. قازىرگى ۋاقىتتا زارداپ شەككەندەر اۋرۋحانادا جاتىر, جاعدايلارى قاناعاتتانارلىق», دەدى ۆەدومستۆودا.