ادامگەرشىلىك قاعيداسىنا سالساق تا, ءدىني تۇرعىدان كەلسەك تە, اراق-شاراپ اتاۋلى تۋرالى جاقسى ايتىلمايدى. ىشىمدىكتىڭ ادامنىڭ وزىنە عانا ەمەس, بۇكىل ۇرپاعىنا دا زيانىن تيگىزىپ, كەسىر كەلتىرەتىنى, ابىرويدان ايىراتىنى انىق. بۇل رەتتە قوعامدا الكوگولدى ىشىمدىكتەردەن باس تارتۋ قۇپتارلىق جاعداي.
مويىنقۇم اۋدانىنداعى قۇموزەك اۋىلىنىڭ تۇرعىندارى كەيىنگى بۋىنعا ۇلگى بولسىن دەگەن نيەتپەن ىشىمدىكتەن باس تارتىپ وتىر. بۇدان بىلاي اتالعان اۋىلداعى بارلىق دۇكەننىڭ سورەلەرىنەن «ارام سۋ» الىنىپ تاستالاتىن بولدى. اۋىل اقساقالدارى اراق-شاراپتى سىرتتان اكەلىپ ىشۋگە دە تىيىم سالۋ كەرەكتىگىن ايتىپ جاتىر. ولار پوليتسەيلەردى دە وسى ىسكە بەلسەنە ارالاسۋعا شاقىردى.
«اللا تاعالا اراق ءىشۋدىڭ حارام ەكەنىن قاسيەتتى قۇران كىتابىندا ەسكەرتكەن. ىشىمدىكسىز اۋىل – بەرەكەلى اۋىل. اراق-شاراپ ىشىلمەگەن جەردە دۇعا قابىل بولادى. ەندى قۇموزەك اۋىلى كوركەيەدى. جاڭا مەشىت سالىنىپ جاتىر. اراق-شاراپ ىشپەي وسكەن جاستار رۋحاني تۇرعىدان كەمەل بولادى. قىلمىس تا بولمايدى. ءبىز قازىر اراقتان باس تارتۋ ارقىلى ءوزىمىزدى دە, وتباسىمىزدى دا ساقتاپ وتىرمىز. ەندى بۇل باستاما تۋرالى باسقا اۋىلدارعا دا بارىپ, ءتۇسىندىرۋ جۇمىستارىن جۇرگىزۋ كەرەك», دەيدى مويىنقۇم اۋدانىنىڭ باس يمامى رىسباي ەسپەنبەتوۆ. ال ءسپيرتتى ىشىمدىك ساتۋدان باس تارتقان دۇكەن يەلەرىنە جۇرت العىس ءبىلدىرىپ جاتىر. ءتىپتى كاسىپكەر ەربولات ساۋرىقوۆ سول دۇكەن يەلەرىنە اراق ساتۋدان تۇسكەن پايدانى ءوز قالتاسىنان-اق بەرەتىنىن ايتتى.
«اۋىلدا اقساقالدار كەڭەسىنىڭ جۇمىسى كۇشەيگەن. جاستار جاعى دا وتە بەلسەندى. جىل سوڭىنا قاراي ءبىز اراق ءىشۋدىڭ سالدارىنان بولاتىن توبەلەس پەن قىلمىس سانىنىڭ وزگەرۋى بويىنشا سالىستىرمالى ستاتيستيكانى دا جاساپ بەرمەكپىز», دەيدى سىبايلاس جەمقورلىققا قارسى ءىس-قيمىل اگەنتتىگى جامبىل وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى راۆيل تولەباەۆ.
جالپى, بۇگىندە جامبىل وبلىسىندا 5 اۋدانداعى 12 اۋىل اراق-شاراپ ىشۋدەن دە, ساتۋدان دا باس تارتىپ وتىر. اتالعان اۋىلدارداعى 126 دۇكەن يەسى اراق-شاراپ ساتاتىن سەرتيفيكاتتارىن ءوز ەركىمەن وتكىزەمىز دەپ وتىر. مۇنداي يگى باستاما ەندى ءوڭىردىڭ وزگە دە اۋدان, اۋىلدارىندا جالعاسادى دەگەن ءۇمىت بار.
جامبىل وبلىسى