اقپارات جانە قوعامدىق دامۋ ءمينيسترى ايدا بالاەۆا امانگەلدى سەيىتحاننىڭ وتباسى مەن جاقىن تۋىستارىنا كوڭىل ايتتى, دەپ حابارلايدى Egemen.kz.
«سۇم اجال ارامىزدان تاعى ءبىر ارىپتەسىمىزدى, بەلگىلى جۋرناليست, سپورت كوممەنتاتورى امانگەلدى سەيتحان اعامىزدى مەزگىلسىز الىپ كەتتى.
تالايدى ءتانتى ەتكەن تالانتىمەن دە, كاسىبي شەبەرلىگىمەن دە, اڭقىلداعان اقجارقىن كوڭىلىمەن دە كورەرمەندى باۋراپ, الەمنىڭ التى بۇرىشىنان الاشىنا جاعىمدى جاڭالىقتىڭ جارشىسى بولعان جامپوز جان, جالىندى ازامات ەدى. ءسوز جوق, امانگەلدى مۋاتحان ۇلى ءوزىنىڭ ءبىلىمى مەن ەگەمەندىكتىڭ العاشقى جىلدارىندا سپورت تەلەجۋرناليستيكاسىندا العان قۇندى تاجىريبەسىن جاستارمەن ءبولىسىپ, ءىزىن باسقان ماماندارعا ۇيرەتىپ كەتتى. دەسە دە, تابيعاتىنان اقىندىعى مەن ادامي اسىلدىعى جاراسقان تۇلعانىڭ وتكەن جولى دا, حالىقتىڭ جۇرەگىندە الار ورنى دا بولەك بولىپ قالارى انىق. ال ونىڭ ەسىمى وتاندىق تەلەجۋرناليستيكا تاريحىنا عانا ەمەس, تۇتاستاي سپورت شەجىرەسىنە التىن ارىپپەن جازىلادى. باسقا تۇسكەن وسىناۋ قايعىعا ورتاقتاسىپ, مارقۇمنىڭ وتباسى, تۋعان-تۋىستارىنا كوڭىل ايتامىن», دەدى مينيستر.