ەلورداداعى ۇلتتىق مۋزەيدە اتىراۋ وبلىستىق ش.ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىنىڭ «قىلقالام ۇشىنداعى قۇدىرەت» اتتى كوشپەلى كورمەسى اشىلدى.
كورمەنىڭ ماقساتى قازاقستاننىڭ بەينەلەۋ ونەرى مەن مادەني مۇراسىن كوركەمسۋرەت مۋزەيى قورىنداعى تۋىندىلارى ارقىلى ناسيحاتتاۋ.
مازمۇندى ءىس-شارانىڭ اشىلۋىندا ۇلتتىق مۋزەي ديرەكتورىنىڭ ورىنباسارى اباي ساتىبالدين قوعامنىڭ دامۋى مەن وركەندەۋى سول ەلدىڭ مادەنيەتىنە بايلانىستى ەكەنىن ايتا كەلىپ: «قازىر ەلىمىزدە كوركەم ونەر تۋىندىلارىنا ايرىقشا كوڭىل بولىنۋدە. بەينەلەۋ ونەرىنىڭ كەڭ قانات جايىپ كەلە جاتقانى وسىعان دالەل بولسا كەرەك. ەگەمەندىك العاننان بەرى قازاقستاندىق قىلقالام شەبەرلەرىنىڭ جۇمىستارىنا قىزىعۋشىلىق ارتىپ كەلەدى. سول سەبەپتى وسى كورمەنى ۇيىمداستىرىپ وتىرمىز», دەپ اتاپ ءوتتى.
اتىراۋ وبلىستىق ش.ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىنىڭ باسشىسى تولەگەن ورىنباسار ۇلى كورمەنىڭ جوعارى دەڭگەيدە وتۋىنە قولداۋ بىلدىرگەن ۇلتتىق مۋزەي ۇجىمىنا العىسىن ايتىپ, مۇراجاي قورىنا بەلگىلى سۋرەتشى ماناربەك داۋلەتياردىڭ «قىزدار» اتتى كارتيناسىن سىيلادى.
كورمەگە جوعارىدا اتالعان ونەر مۋزەيى قورىنداعى ەلىمىزگە تانىمال تالانتتى قىلقالام شەبەرلەرىنىڭ جەتپىسكە جۋىق جۇمىسى قويىلدى. ولاردىڭ دەنى وتاندى, تۋعان جەردى جانە ۇلتتىق ءداستۇردى دارىپتەۋگە ارنالعان. ءار تۋىندىنىڭ ءوز تاريحى بار. ماسەلەن, ماحامبەت وتەمىس ۇلىنا ارنالعان, اۋىل تىرشىلىگىن بەينەلەگەن ەڭبەكتەر كەلۋشىلەردىڭ قىزىعۋشىلىعىن تۋعىزدى.
«ەگەمەن-اقپارات»