رەسەيدىڭ سپورت ءمينيسترى ميحايل دەگتيارەۆ شەتەلدىڭ سپورتتىق ازاماتتىعىن قابىلداعان رەسەيلىك سپورتشىلارعا رەسەيگە كىرۋگە تىيىم سالىنۋى مۇمكىن ەكەنىن مالىمدەدى, دەپ جازادى Egemen.kz.
كورشى مەملەكەت ءمينيسترى بۇل تۋرالى تەلەارناعا بەرگەن سۇحباتىندا اتاپ وتكەن.
«بىز شەتەلدىڭ سپورتتىق ازاماتتىعىن قابىلداعان رەسەيلىك سپورتشىلاردى ەلىمىزدە اسىراپ, تاربيەلەپ, جاتتىقتىرۋشى, سپورتتىق بازالارمەن قامتاماسىز ەتەمىز. ال ولار پاسپورتتارىن تاستاپ, ەلدەن كەتىپ قالادى. مۇنداي ادامداردى بارلىق جەڭىلدىكتەن ايىرىپ, ەلگە كىرۋگە جانە ءبىزدىڭ سپورت نىساندارىمىزدى پايدالانۋعا تىيىم سالۋ كەرەك. ءبىز وسى ماسەلەنىڭ زاڭ اياسىندا شەگەلەنۋىنە مۇددەلىمىز», دەدى دەگتيارەۆ.
سونداي-اق ول وسى مازمۇنداعى جاعدايلارعا قاتىستى تالاپتاردى قاتاڭداتاتىن بۇيرىققا قول قويعانىن ايتقان. ونىڭ سوزىنشە, سپورتتىق ازاماتتىعىن وزگەرتكەن ءبىر شاحماتشى گروسسمەيستەر اتاعىنان ايىرىلعان.
رەسەي زاڭىنداعى بۇل وزگەرىس قازاقستان تۋىنىڭ استىندا دا ونەر كورسەتىپ جۇرگەن الەمنىڭ ءۇشىنشى راكەتكاسى ەلەنا رىباكينا, ATP رەيتينگىندە ونىنشى ورىندا تۇرعان الەكساندر بۋبليك, مانەرلەپ سىرعاناۋشى سوفيا سامودەلكينا جانە باسقا دا سپورتشىلارعا اسەر ەتىپ, ولارعا رەسەيگە كىرۋگە تىيىم سالىنۋى ىقتيمال.
ايتا كەتەيىك, ەلەنا رىباكينا Australian Open-2026 ءتۋرنيرىنىڭ جەڭىمپازى اتانىپ, مەملەكەت باسشىسى وتانداسىمىزدى جەڭىسىمەن قۇتتىقتادى.