اقش-تا جۇكتى ايەلدەرگە ۆاكتسينا سالۋ ۇسىنىلدى

بۇل تۋرالى اقش اۋرۋلاردى باقىلاۋ جانە الدىن الۋ ورتالىعى (CDC) مالىمدەدى.CDC مالىمەتىنشە, زەرتتەۋلەر كوروناۆيرۋسقا قارسى ۆاكتسينالار جۇكتى جانە بالا ەمىزەتىن ايەلدەرگە ەش قاۋىپ توندىرمەيتىنىن انىقتاعان. Pfizer دە ۆاكتسيناسىنىڭ جۇكتى ايەلدەرگە تيگىزەتىن اسەرىن تەكسەرە باستادى. وسىلايشا, شۇعىل قولدانۋعا ارنالعان ءۇش ۆاكتسينا ۇسىنىلعان: Pfizer, Moderna جانە Johnson & Johnson.

ۇسىنىس جۇكتى ايەلدەرگە دە, بالالى بولۋدى جوسپارلاعان نەمەسە قازىر بالا ەمىزەتىندەرگە دە قاتىستى. دەرەكتەردى تالداۋ ناتيجەسىندە جۇكتىلىكتىڭ 20-شى اپتاسىنا دەيىن Pfizer نەمەسە Moderna ۆاكتسينالارىن العان 2 500-گە جۋىق جۇكتى ايەلدىڭ اراسىندا تۇسىك تاستاۋ قاۋپى جوعارى ەمەس ەكەنىن انىقتالعان.

CDC بۇعان دەيىن جۇكتى ايەلدەرگە ۆاكتسينا سالۋ تۋرالى ناقتى ۇسىنىستار بەرگەن جوق. الايدا قازىر ورتالىق 12 جاستان اسقان بارلىق ادام, سونىڭ ىشىندە جۇكتى ايەلدەر ءۇشىن دە كوروناۆيرۋسقا قارسى ۆاكتسينانىڭ پايداسى بارىن ايتىپ وتىر.

ايتا كەتەيىك, اقش-تىڭ اۋرۋلاردى باقىلاۋ جانە الدىن الۋ ورتالىقتارىنىڭ (CDC) جاڭا تالداۋى COVID-19 ۆاكتسيناسىن العان جۇكتى ايەلدەردە تۇسىك تاستاۋ قاۋپى ادەتتەگى جۇكتىلىكتەن جوعارى ەمەس ەكەنىن كورسەتتى.