سوت شەشىمى نەگە ورىندالمايدى؟

ەكى جىلعا جۋىق ۋاقىت كولەمىندە كوروناۆيرۋس ناۋبەتى الەمدى ءبىر تارىنىڭ قاۋىزىنا سىيعىزىپ, ادامزاتتى تىعىرىققا تىرەپ وتىر. وسى زاۋال شاق باستالعالى الدىمەن كەۋدەسىن وققا توسقان جاۋىنگەردەي مايداننىڭ العى شەبىندە جۇرگەندەر – دارىگەرلەر. وسىنداي ناعىز قىزىل مايداننىڭ ورتاسىندا جۇرگەن ازاماتتىڭ ءبىرى – نۇر-سۇلتان قالاسىنداعى №2 قالالىق كوپسالالى اۋرۋحانانىڭ اكۋشەر-گينەكولوگى يلەس بەكمانوۆ.

انا تولعاتىپ جات­قان­­­دا دا­رى­گەرلەر دە جانىن شۇ­بە­­رەككە ءتۇيىپ تۇرا­دى. بۇل كورىنىس تالاي بالا­عا كىندىك اكە بولعان يلەس قۇ­داي­بەردى ۇلىنىڭ كۇن­دە­لىكتى جۇمىسىنا ءتان. ول ءۇشىن باستى ماقسات – انا مەن بالانىڭ اماندىعى جۇ­مى­­سىنىڭ مازمۇنى عانا ەمەس, ءومىرىنىڭ مانىنەن كەم تۇسپەيدى. ۋاقىتپەن سا­ناسپاي, كۇندىز-ءتۇن دەمەي پەرزەنتحانادا جۇرەتىن يلەس قۇ­دايبەردى ۇلى دا كورو­نا­ۆي­رۋستىڭ شەڭگەلىنە ىلىك­كەن. قاۋىپتى كەسەلدىڭ نى­شانسىز تۇرىمەن اۋىرىپ, 2020 جىلدىڭ 9 مامىرىندا اۋرۋحانا توسەگىنە جاتتى. ون ءۇش كۇن اۋرۋحانادا ەمدەلىپ, تاعى ءبىر اپتاداي ۇيىندە بويىن تىكتەپ العان سوڭ, 30 مامىردا قىزمەتىنە قايتا كىرىستى. بىراق دارىگەرگە كوروناۆيرۋس قايتالاپ سوق­تى. 2020 جىلدىڭ 19 ماۋسىمىندا يلەس اۋرۋحاناعا تاعى ءتۇستى. وكپەسى 45 پا­يىز قابىنعانى بەلگىلى بولدى. قىز­مەتىنە تەك شىلدە ايىنىڭ باسىندا شىقتى. جۇ­مىسقا شىققانىمەن, اۋرۋ جۇ­دەتكەن اعزانى قاي­تا نى­عايتۋ ءۇشىن ونىڭ جۇ­مىس­­پەن ارپالىسىپ ءجۇ­رىپ, كوپ كۇ­تىنۋىنە تۋرا كەلگەنى راس. ايتەۋىر امان قالعانىنا تاۋبە دەدى.

توتەننەن كەلگەن جاۋ سە­­كىل­دى بۇل ناۋ­بەت اۋرۋ ەمى­­نىڭ انىق حاتتاماسى بەكى­تىل­گەنشە, ناۋ­قاس­تاردى ەمدەۋ بارى­سىندا ەتەنە ارا­لاسقان ءبىراز دارىگەردىڭ باسىن جۇتتى. مىنە, سول ۋاقىتتا دەنساۋلىق ساقتاۋ ءمينيسترىنىڭ جانە ەڭبەك جانە حالىقتى الەۋمەتتىك قور­عاۋ ءمينيسترىنىڭ «COVID-19 كو­­رو­ناۆيرۋستىق ين­­­­فەك­تسياسىمەن كۇرەسۋ بو­­­يىنشا ەپيدەمياعا قارسى ءىس-شارالارعا قاتىساتىن دەن­ساۋ­لىق ساقتاۋ قىزمەت­كەر­لە­رىنە ءبىر رەتتىك الەۋمەتتىك تو­لەمدى جۇزەگە اسىرۋ ەرە­­جە­سىن بەكىتۋ تۋرالى» بىر­لەس­كەن بۇي­رى­عى نەگىزىندە مەديتسينا سالاسىنىڭ وسى اۋرۋدى جۇقتىرىپ الىپ, اۋىرعان قىز­مەت­كەرلەرىنە ەكى ملن تەڭگە كولەمىندە تو­لەمدەر بەرىلۋى كوزدەلگەن بولاتىن. الايدا جارتى جىلداي ۋا­قىتتان كەيىن, وسى اتالعان بىر­لەسكەن بۇي­رىق­تىڭ كۇشى دەن­­ساۋ­لىق ساقتاۋ ءمينيسترىنىڭ جانە ەڭبەك جانە حالىقتى الەۋ­مەت­تىك قورعاۋ ءمي­نيسترىنىڭ 2020 جىلعى 24 قازانداعى بىر­لەسكەن بۇيرىعىمەن جويىلدى. وسى بىر­لەسكەن ەكى بۇيرىقتىڭ اراسىندا قىز­مەت كەزىندە كوروناۆيرۋس جۇقتىرىپ الىپ, اجال تىر­ناعىنان اۋپىرىمدەپ امان قالعان يلەس بەكمانوۆ تا مەملەكەت تو­لەي­تىن ەكى ملن تەڭگە تولەمدى الۋى كەرەك ەدى. بىراق ولاي بولمادى.

نۇر-سۇلتان قالاسىنىڭ قو­عامدىق دەن­ساۋلىق ساقتاۋ باس­قارماسى ي.بەكما­نوۆ­قا اتالعان بۇيرىق نەگىزىندە بىر­جول­عى الەۋمەتتىك تولەم بەرۋدەن باس تارت­تى. يلەس قۇدايبەردى ۇلى اتامەكەنگە ءاۋ باستا وزبەكستاننان كەلگەن اعا­يىن بولعاندىقتان, «وتانداستار» قو­رى­­نىڭ قوس­تاناي وبلىسىنداعى فرونت-ءوفي­سىنىڭ بۇرىنعى ساراپشىسى تالعات احمەتوۆكە حابارلاسىپ, جاعدايىن ايت­­تى. ونىڭ كەڭەسىمەن نۇر-سۇلتان قا­لاسى سارىارقا اۋداندىق سوتىنا تالاپ-ارىز بەر­گەن بولاتىن. وسى سوتتىڭ سۋدياسى ا.ورداباەۆتىڭ تورا­­عالىعىمەن 2021 جىل­دىڭ 12 اقپانىندا وتكەن سوت وتى­رىسىنداعى №7113-21-00-2/19 ازا­ماتتىق ءىس بو­يىنشا نۇر-سۇلتان قا­لا­لىق قو­­عامدىق دەنساۋلىق ساقتاۋ باس­قار­ماسىنىڭ بىرلەسكەن بۇيرىق نە­گى­زىندە بىرجولعى الەۋمەتتىك تولەمدى تو­لەپ بەرۋىنەن باس تارتۋى تۋرالى 2020 جىل­دىڭ ەكىنشى جەلتوقسانىنداعى №106-11-19/7159 حاتىن زاڭسىز دەپ تا­نىپ, ي.بەكمانوۆتىڭ تا­لاپ-ارىزىن قا­نا­عاتتان­دىر­دى. سونىمەن قاتار نۇر-سۇلتان قالالىق قو­عام­­دىق دەنساۋلىق ساقتاۋ باس­­قارماسىنا سوت شەشىمى كۇ­شى­­نە ەنگەننەن كەيىن ءبىر ايدىڭ ىشىندە ءوتىنىش-ارىز يەسى قۇقىعىنىڭ, زاڭدى مۇد­­دەلەرىنىڭ بۇزىلۋىن قالپىنا كەلتىرۋ مىندەتتەلدى.

الايدا جاۋاپكەر نۇر-سۇلتان قا­لا­لىق قوعامدىق دەنساۋلىق ساقتاۋ باسقار­ماسى بۇل سوت شە­شى­مىنە نارازى بولىپ, نۇر-سۇلتان قالالىق اپەللياتسيالىق سوت ال­قاسىنا شاعىم ءتۇسىر­دى. بيىل 13 مامىردا نۇر-سۇلتان قالالىق ازا­ماتتىق ىستەر جونىندەگى سوت القاسى №2ا-2330 ءىس بويىنشا ءبىرىنشى ساتىداعى نۇر-سۇلتان قالا­سى سارىارقا اۋداندىق سو­تىنىڭ شە­شى­مىن وزگەرىسسىز قال­دىرىپ, نۇر-سۇلتان قالالىق قو­عامدىق دەنساۋلىق ساق­تاۋ باسقارماسىنىڭ اپەل­ليا­تسيا­لىق شاعىمىن قا­ناعات­تاندىرمادى. ءادىل زاڭ شە­شى­مى ادى­لەت­تىلىك ورنات­قان­­داي بولىپ ەدى. بىراق سوت شەشىمى كۇشىنە ەنسە دە, نۇر-سۇلتان قالالىق قو­عام­دىق دەنساۋلىق ساق­تاۋ باس­قارماسى ونى ءالى كۇنگە دەيىن ورىنداعان جوق.

ي.بەكمانوۆ ەلورداداعى سارى­ارقا اۋداندىق پروكۋرورى م.شىرىن­بە­كوۆ­تىڭ اتىنا قر اكىمشىلىك قۇقىق بۇزۋشىلىق تۋرالى كودەكسىنىڭ 669-بابىنا سايكەس, نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ سوت شەشىمىن ورىنداماي وتىرعان ءتيىستى باس­شىلارىنىڭ ءىسى جانە ولاردى اكىم­شىلىك جازالاۋ جونىندە ءوتىنىش حات جازدى. بىراق دا­رىگەردى زاڭنىڭ ورىندالۋىن قا­داعالاۋشى ورگاننىڭ ءىسى تاڭ­عالدىردى. پروكۋراتۋرا سوت شەشىمىنە پىس­قىرماعان قا­لالىق قو­عام­­دىق دەنساۋلىق ساقتاۋ باس­­قارماسىنىڭ باسشىلارىنا «مۇنىڭ قالاي؟» دەمەگەن سىقىلدى. دارىگەردىڭ ءوتىنىشىن دەنساۋلىق ساقتاۋ مي­نيسترلىگىنە قايتا جولداپتى. مۇنى قالاي تۇسىنۋگە بو­­لادى؟ سوت شەشىمىن جەر­­­گىلىكتى اتقارۋشى ورگان قۇ­لا­عىنا دا ىلمەدى. ال زاڭ­­نىڭ ورىندالۋىن قا­دا­­­عا­لاۋشى ورگان – پرو­كۋ­­راتۋراعا دا سوتتىڭ شە­شى­­مى ماڭىزدى بولماعانى ما؟ سوندا ادىلەتتىك ءۇشىن كىمگە جۇگىنۋ كەرەك؟ وسىنى ويلاپ جابىرقاسا دا, انت­قا ادال دارىگەر تاڭەرتەڭ كوزىن تىر­نالاپ اش­قاننان پەرزەنتحاناعا جۇگىرەدى. كو­رو­ناۆيرۋس قاۋپى قايىقتىڭ ۇستىن­دە­گىدەي قىلپىلداتقان كۇندەر سىرعىپ ءوتىپ جاتىر...

ءنازيرا جارىمبەت,

جۋرناليست