اتا-اناسى كوروناۆيرۋس جۇقتىرعان نەمەسە ناۋقاستارمەن بايلانىستا بولعان بالالار وقۋ ورىندارىنا بارا المايدى. ولار ءۇشىن قاشىقتىقتان وقىتۋ ۇيىمداستىرىلادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ Instagram-نىڭ تىكەلەي ەفيرىندە حابارلادى, دەپ جازادى Egemen.kz.
«ەگەر ءوزى اۋىراتىن نەمەسە وتباسىندا اۋىراتىن ادام انىقتالسا, ول بالا مەكتەپ عيماراتىنا جىبەرىلمەيدى.
ءبىز ءۇشىن بالالاردى قاۋىپ-قاتەردەن قورعاۋ ماڭىزدى. ەگەر ستۋدەنتتىڭ نەمەسە وقۋشىنىڭ اتا-اناسى اۋىرىپ قالسا نەمەسە ناۋقاستارمەن بايلانىستا بولسا, ءبىز وقۋشىنىڭ اۋىرمايتىنىنا كەپىلدىك بەرە المايمىز. بۇل جاعدايدا قابىلدانعان شەشىم ورىندى دەپ ويلايمىن», دەدى مينيستر ءجۋرناليستىڭ سۇراقتارىنا جاۋاپ بەرە وتىرىپ.
مينيستر بۇل شەكتەۋلەردىڭ ۋاقىتشا بولاتىنىن ايتتى. Ashyq قوسىمشاسىنىڭ مارتەبەسى وزگەرگەننەن كەيىن مۇنداي وقۋشىلار مەكتەپكە نەمەسە ۋنيۆەرسيتەتكە ورالادى.
ء«بىزدىڭ مەكتەپتەر دە قازىر دايىندالۋدا, ولار ءۇشىن مەرزىمدى تۇردە ونلاين وقىتۋدى ۇيىمداستىرۋ قاجەت», دەپ ءتۇسىندىردى ايماعامبەتوۆ.