بۇل تۋرالى ۇكىمەت وتىرىسىندا قىزىلوردا وبلىسىنىڭ اكىمى گۇلشارا ابدىقالىقوۆا باياندادى, دەپ جازادى Egemen.kz.
اكىمنىڭ ايتۋىنشا, وبلىستا ىندەت جۇقتىرعان 12 580 ادام تىركەلگەن. ونىڭ 77 پايىزى جازىلىپ شىقتى. پنەۆمونيامەن اۋىرعان 1867 ناۋقاستىڭ 1580-ءى ەمدەلىپ شىقتى.
وسى جىلدىڭ ماۋسىم-شىلدە ايلارىندا ينفەكتسيالىق توسەك-ورىن سانى 585-تەن 2340-قا دەيىن, ال رەانيماتسيالىق توسەك ورىن-سانى 90-نان 172-گە دەيىن كوبەيتىلىپ, قازىرگى تاڭدا جۇكتەمە 55 پايىزدى قۇراپ وتىر.
رەزەرۆتىك توسەك-ورىن سانىن قوسقاندا 3200 توسەك-ورنى ازىرلەنىپ, ونىڭ 518 ورنى ورتالىقتاندىرىلعان وتتەگىمەن جابدىقتالعان.
«قۇرىلىسى 2020 جىلى باستالعان مودۋلدىك ستاتسيونار جۇمىسى ىسكە قوسىلىپ, ناۋقاستاردى قابىلداۋ باستالدى. رەجيمدى تۇردە 6 وتتەگى شىعارۋ ستانتسياسى جۇمىس ىستەيدى. ءدارى-دارمەك قورى قالىپتاسقان. كوروناۆيرۋس ينفەكتسياسىنا قارسى كۇرەس جۇمىستارىنا قاجەتتى مەديتسينالىق كادرلار مەن قۇرال جابدىقتار جەتكىلىكتى», دەدى اكىم.
وبلىستا ۇجىمدىق يممۋنيتەتتى قالىپتاستىرۋ ماقساتىندا ەكپە الۋعا قابىلەتتى 401 مىڭ تۇرعىننىڭ 61,4%-ى ۆاكتسينا سالدىردى. قىركۇيەك ايىندا كورسەتكىش 85%-عا ورىندالادى دەپ جوسپارلانعان.
«قازىرگى تاڭدا مونيتورينگتىك توپ جۇمىستارى كۇشەيتىلدى. بۇگىنگە دەيىن 167 مونيتورينگتىك توپپەن 12 441 نىسانعا رەيدتىك تەكسەرىس جۇرگىزىلدى. ناتيجەسىندە 459 كارانتين تالاپتارىن بۇزۋ جاعدايلارى انىقتالىپ, 33,4 ملن تەڭگە ايىپپۇل سالىندى», دەدى اكىم.
تامىز ايىندا 398 نىسانعا تەكسەرىس جۇرگىزىلىپ, ناتيجەسىندە 56 كارانتين تالاپتارىن بۇزۋ جاعدايلارى انىقتالىپ, 3,1 ملن تەڭگە ايىپپۇل سالىندى.