ارميالىق حالىقارالىق ويىندار شەڭبەرىندە «اتتار مارافونى» كونكۋرسىنا قاتىساتىن قازاقستان اسكەري قىزمەتشىلەرىنىڭ كومانداسى رەسەيگە اتتاندى. جارىس قىزىل قالاسىندا (تىۆا رەسپۋبليكاسى) وتەدى.
وسى كونكۋرسقا اسكەري قىزمەتشىلەر بەس اي دايىندالدى. كوماندانىڭ نەگىزگى قۇرامى تاۋ-ەگەرلىك پولك اسكەري قىزمەتشىلەرى قاتارىنان قۇرىلعان. ولار اقپان مەن ماۋسىمدا وتكەن بىرنەشە ىرىكتەۋ كەزەڭىنىڭ ناتيجەلەرى بويىنشا اناعۇرلىم دايارلانعان ماماندار قاتارىنان ىرىكتەلىپ الىندى. اسكەري قىزمەتشىلەردى جىبەرگەنگە دەيىن ولاردى جاتتىقتىرۋ وسى بولىمشەنىڭ بازاسىندا ءوتتى. «قارقىندى جاتتىعۋلار كەزىندە كوماندا ءوز ناتيجەلەرىن جاقسارتا ءتۇستى. بۇل ءوز كەزەگىندە بىزگە جۇلدەلى ورىندارعا يە بولۋعا مۇمكىندىك بەرەدى», دەپ اتاپ ءوتتى «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ جاۋىنگەرلىك دايارلىق جونىندەگى ورىنباسارى, پولكوۆنيك داۋرەن حاميتوۆ.
قازاقستان كومانداسىنىڭ رەسەيگە كەتەر الدىنداعى سوڭعى دايارلىق كەزەڭى ساپتىق بايقاۋ بولدى. ونى قورعانىس ءمينيسترىنىڭ كەڭەسشىسى, گەنەرال-مايور ادىلبەك الدابەرگەنوۆ وتكىزدى. «سىزدەر جارىستا ءوز كاسىبي شەبەرلىگىڭىزدى كورسەتە وتىرىپ, ەڭ ۇزدىك ناتيجەگە قول جەتكىزۋگە, قارسىلاستارىمىزعا لايىقتى باسەكەلەس بولۋعا تيىسسىزدەر. سىزدەردىڭ ءاربىر جەتىستىگىڭىزگە قاراپ, ءبىزدىڭ ارميامىزدى, ءبىزدىڭ ەلىمىزدى باعالايتىن بولادى», دەدى ول.
حالىقارالىق كونكۋرستا قازاقستان اسكەري قىزمەتشىلەرىنىڭ قارسىلاستارى زيمبابۆە, يران, موڭعوليا, رەسەي جانە وزبەكستان كوماندالارى بولادى. «اتتار مارافونى» كونكۋرسىنا كوماندالار جەرگىلىكتى جەرمەن تانىسۋ جانە بەيىمدەلۋ ءۇشىن, ەڭ باستىسى, جاتتىعۋلار وتكىزۋ ءۇشىن ەرتەرەك بارادى. ويتكەنى جارىس شارتتارى بويىنشا قاتىسۋشىلارعا اتتاردى قابىلداۋشى تاراپ بەرەدى. قاتىسۋشىلارعا تەك ءوزىنىڭ ات-ابزەلىن پايدالانۋعا رۇقسات ەتىلگەن. «اتتار مارافونى» كومانداسىمەن ءبىر ۋاقىتتا «دەسانتتىق ۆزۆود» جانە «ەلبرۋس شەڭبەرى» كونكۋرستارىنىڭ قاتىسۋشىلارى دا ويىن وتەتىن جەرلەرگە كەتتى.
«ەگەمەن-اقپارات»