قورعانىس مينيسترلىگىندەگى كەزەكتى اپپاراتتىق كەڭەستە جاۋىنگەرلىك دايارلىق, اسكەري ءبىلىم بەرۋ جانە زاڭ شىعارۋ قىزمەتىنە قاتىستى ماسەلەلەر قارالدى, دەپ جازادى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
كەڭەستە جاۋىنگەرلىك وقۋ-جاتتىعۋ بارىسى تالقىلاندى. جوسپارعا سايكەس ۆزۆودتاردى دايارلاۋ جانە باتالوندارعا باقىلاۋ تاكتيكالىق-ساپتىق ساباقتار ءوتىپ جاتىر. الداعى اپتادا ۆزۆودتاردىڭ جاۋىنگەرلىك وق اتۋىن ۇيىمداستىرۋ بويىنشا نۇسقاۋ بەرۋ-ادىستەمەلىك ساباقتار جاپپاي وتكىزىلەدى.
ارميالىق حالىقارالىق ويىندارعا قازاقستان كومانداسىن دايارلاۋ اياقتالعانى تۋرالى باياندالدى. سايىس ناتيجەسىندە «ارحو – 2021» ويىندارىنىڭ 11 كونكۋرسىندا قازاقستان قارۋلى كۇشتەرىنىڭ نامىسىن قورعايتىن ۇزدىك اسكەري قىزمەتشىلەر ىرىكتەلىپ الىندى. بۇگىن ولارعا قاجەتتى سانيتاريالىق-ەپيدەميولوگيالىق ءىس-شارا ۇيىمداستىرىلدى. كوماندالار اسكەري-كولىك اۆياتسياسىنىڭ ۇشاعىمەن ويىن وتەتىن جەرگە جەتكىزىلەتىن بولادى.
كەڭەستە اسكەري ءبىلىم بەرۋ ماسەلەلەرى دە قارالدى. قورعانىس ۆەدومستۆوسىنىڭ اسكەري وقۋ ورىندارىنا قابىلداۋ اياقتالدى. مانداتتىق كوميسسيا شەشىمىمەن ۇلتتىق قورعانىس ۋنيۆەرسيتەتىنە - 190 وفيتسەر, قۇرلىق اسكەرلەرىنىڭ اسكەري ينستيتۋتىنا - 301 كۋرسانت, اۋە قورعانىسى كۇشتەرىنىڭ اسكەري ينستيتۋتىنا - 142 ادام, راديوەلەكترونيكا جانە بايلانىس اسكەري-ينجەنەرلىك ينستيتۋتىنا 132 جاس قابىلداندى.
ۇلتتىق قورعانىس ۋنيۆەرسيتەتىندە قارۋلى كۇشتەردىڭ وفيتسەرلەرىنەن باسقا, قازاقستاننىڭ باسقا دا اسكەرى مەن اسكەري قۇرالىمدارىنىڭ اسكەري قىزمەتشىلەرى, مەملەكەتتىك ورگان قىزمەتكەرلەرى دە ءبىلىم الادى. ودان باسقا, اسكەري جوعارى وقۋ ورىندارى حالىقارالىق ۋاعدالاستىققا سايكەس ۇقشۇ ەلدەرى ءۇشىن دە كادر دايارلايدى. بيىل ارمەنيانىڭ, قىرعىزستاننىڭ جانە تاجىكستاننىڭ 67 وكىلى وقۋعا قابىلداندى.
باياندامالاردا اسكەري ينستيتۋت تۇلەكتەرى تەك قارۋلى كۇشتەرگە عانا ەمەس, مەملەكەتتىك كۇزەت قىزمەتىنە, ۇلتتىق قاۋىپسىزدىك كوميتەتىنە جانە باسقا دا ورگاندارعا قىزمەت ەتۋگە جىبەرىلەتىنى اتاپ ءوتىلدى. بۇل وقۋ ساپاسىنا قوسىمشا جاۋاپكەرشىلىك جۇكتەيتىنى انىق. قازاقستان ازاماتتارىنا اسكەري ءبىلىم بەرۋ وتەۋسىز نەگىزدە بەرىلەدى. سوندىقتان وقۋعا تۇسكەن ءاربىر ازامات بارلىق وقىتۋ كۋرسىنان ءوتىپ, اسكەري وقۋ ورنىن دايارلانعان مامان رەتىندە اياقتاۋعا ءتيىس.
سونىمەن بىرگە, جەكەلەگەن وقيعالار دا كەزدەسەدى. ماسەلەن, كەيبىر الاقول كۋرسانتتار ءبىرىنشى كۋرستى اياقتاعاننان كەيىن ازاماتتىق جوو-نىڭ ەكىنشى كۋرسىنا قايتا قابىلدانۋ ماقساتىندا اسكەري ينستيتۋتتان شىعارۋعا ادەيى بايانات جازادى. بۇل رەتتە زاڭناماعا سايكەس ولار وقۋعا جۇمسالعان شىعىندى وتەمەيدى. ال ءبىر جىلدىق وقۋ ۋاقىتى مەرزىمدى اسكەري قىزمەت رەتىندە ەسەپتەلەدى.
مينيستر زاڭناماداعى وسى ولقىلىقتى جويۋ ماسەلەسىن پىسىقتاۋعا جانە تەرىس نەگىزدەر بويىنشا نەمەسە ءوز قالاۋى بويىنشا جوو-دان شىعارىلعان كۋرسانتتى مەرزىمدى اسكەري قىزمەت وتكەرۋ ءۇشىن اسكەرگە جىبەرۋ, سونداي-اق ونىڭ وقىتۋعا جۇمساعان قاراجاتىن وتەۋى تۋرالى نورمانى زاڭدى تۇردە بەكىتۋگە نۇسقاۋ بەردى.
– ءبىلىم بەرۋگە بولىنگەن بيۋدجەت قاراجاتى قاتاڭ تۇردە ماقساتى بويىنشا جۇمسالۋعا جانە ەرەكشە ەسەپتە بولۋعا ءتيىس. بۇل جەردە قۋلىققا ورىن جوق, – دەپ اتاپ ءوتتى گەنەرال-لەيتەنانت نۇرلان ەرمەكباەۆ.
قورعانىس مينيسترلىگىنىڭ زاڭ شىعارۋ قىزمەتىن جۇزەگە اسىرۋ ماسەلەسى دە تالقىلاندى. قازىرگى ۋاقىتتا نورماتيۆتىك قۇقىقتىق اكتىلەرگە اسكەري قىزمەتكە تۇرۋ جانە اسكەري قىزمەتشىلەردى تۇرعىن ۇيمەن قامتاماسىز ەتۋگە قاتىستى وزگەرىس ەنگىزۋ قاراستىرىلىپ جاتىر.
قورعانىس ۆەدومستۆوسىنىڭ باسشىسى زاڭناماعا كەز كەلگەن تۇزەتۋدى ازىرلەۋ كەزىندە ولاردى جان-جاقتى, قاجەت بولعان جاعدايدا القالى تۇردە مۇددەلى ورگاندار مەن قۇرىلىمدىق بولىمشەلەردى تارتا وتىرىپ قاراۋدى تاپسىردى.
– زاڭ نورمالارى مەن ەرەجەلەرىن ازىرلەۋ كەزىندە, ەڭ الدىمەن, ولاردى قولدانۋداعى الەۋمەتتىك سالداردى, ونىڭ اسكەري قىزمەتشىلەر مەن ولاردىڭ وتباسىنىڭ الەۋمەتتىك ءال-اۋقاتىنا قالاي اسەر ەتەتىنىن ەسكەرۋ جانە بولجاۋ قاجەت, – دەپ اتاپ ءوتتى قورعانىس ءمينيسترى.
باس اسكەري-مەديتسينالىق باسقارما باستىعى ارمياداعى سانيتاريالىق-ەپيدەميولوگيالىق احۋال تۋرالى مالىمەت بەردى. ءبىر اپتا ىشىندە COVID-19-دى جۇقتىرعاندار سانىنىڭ تومەندەۋى 11%-ءتى قۇرادى. ءبىرىنشى كومپونەنتتى العاندار سانى 99% كورسەتتى, جەكە قۇرامنىڭ 95%-ءى تولىق ۆاكتسيناتسيالاندى. وسى جۇمىستى جالعاستىرۋ تاپسىرىلدى.