«Egemen Qazaqstan» گازەتىندە جارىق كورگەن ابايتانۋشى-عالىمداردىڭ عىلىمي-تانىمدىق ماقالالارى مەن مەملەكەت جانە قوعام قايراتكەرلەرىنىڭ پايىم-پىكىرلەرى ارنايى جيناق بولىپ جارىققا شىقتى, دەپ جازادى Egemen.kz.
جيناق «دانالىق دارياسى» دەپ اتالادى.
ارنايى كىتاپتىڭ تۇساۋكەسەرى بۇگىن, اباي كۇنىندە ءوتىپ, جۇرتشىلىققا تانىستىرىلدى.
سەرىك نەگيموۆ, ەرلان سىدىقوۆ, داۋلەتكەرەي كاپ ۇلى, اسقار وماروۆ, راۋان كەنجەحان, امانگەلدى كەڭشىلىك ۇلى سىندى زيالى قاۋىم وكىلدەرى قاتىسقان جيىندا «ەگەمەن قازاقستان» اق باسقارما توراعاسى دارحان قىدىرالى جيناقتى شىعارۋداعى باستى ماقسات – ابايدىڭ 175 جىلدىعى مەن 100 جىلدىقتارى قارساڭىنداعى ماتەريالداردى جيناقتاۋ بولعانىن ايتتى.
تۇساۋكەسەر راسىمىندە ءسوز العان ل.گۋميلەۆ اتىنداعى ەۇۋ رەكتورى ەرلان سىدىقوۆ اباي مەرەيتويىنىڭ اتقارىلۋىندا «Egemen Qazaqstan» گازەتىنىڭ وراسان ەڭبەگىن اتاپ ءوتتى.
«ەل گازەتى ءار جىلدىڭ وزىندىك قورىتىندىسىن جاساپ, ايشىقتى ساتتەردى تاريح بەتىنە باسىپ كەلەدى. بىلتىرعى جىل تۇگەلدەي اباي جىلىن, ۇلى اقىننىڭ مەرەيتويىن ءوز دارەجەسىندە اتقارىپ, پرەزيدەنت تاپسىرماسىنا ساي, ەڭ ۇلكەن جۇمىس اتقارعان ۇجىم بولاتىن بولسا, ول وسى – «ەگەمەن قازاقستان» ۇجىمى دەر ەدىم. ءبىر جىلدا, اباي جىلىندا نە اتقارىلعانىنىڭ ءبارىن ءبىر كىتاپقا توپتاستىرۋ – ۇلكەن ءارى قاجىرلى ەڭبەك», دەدى ەۇۋ رەكتورى.
ال فيلولوگيا عىلىمدارىنىڭ دوكتورى, پروفەسسور سەرىك نەگيموۆ جيناققا قاتىستى «بۇل – ابايتانۋ عىلىمىنا قوسىلعان وراسان زور ۇلەس, ۇلكەن ەڭبەك. كەلەر ۇرپاق ابايدىڭ 175 جىلدىق ۇلى تويى قالاي اتالىپ ءوتىلىپ, قانداي جۇمىستار اتقارىلعانىنا تاريحي جاۋاپتى وسى جيناقتان تابا الادى», دەپ پىكىر ءبىلدىردى.
ايتا كەتەيىك, «دانالىق دارياسى» جيناعى ەكى بولىمنەن تۇرادى. «ماڭگىلىك مۇرا» دەپ اتالاتىن العاشقى بولىمىندە وتكەن عاسىردىڭ 40-50 جىلدارى, ياعني ابايدىڭ 100 جىلدىق مەرەيتويى قارساڭىندا «سوتسيالدى قازاقستان» جانە «سوتسياليستىك قازاقستان» گازەتتەرىندە جاريالانعان ادەبي-عىلىمي ماقالالار, جازبا-ەسسەلەر توپتاستىرىلعان. ال ەكىنشى ءبولىمى «اقىل-وي الىبى» دەپ اتالادى. وقىرمان بۇل بولىمنەن ابايدىڭ 175 جىلدىق تويى قارساڭىندا ەل گازەتىندە جارىق كورگەن عىلىمي-تانىمدىق ماقالالار مەن پىكىرلەردى وقي الادى.