قىزىلوردا وبلىسى قازالىدا اۋدان اكىمى مۇحتار ورازباەۆتىڭ توراعالىعىمەن كوروناۆيرۋستىق ينفەكتسيانىڭ الدىن الۋعا بايلانىستى كەزەكتى شتاب وتىرىسى ءوتتى, دەپ جازادى Egemen.kz.
وتىرىستا اۋدان كولەمىندەگى جيىن-تويدىڭ توقتاماي تۇرعانى ايتىلدى. وسىعان وراي اۋدان باسشىسى مۇحتار ورازباەۆ مونيتورينگتىك توپتاردىڭ جۇمىسىن سىناپ, قاتاڭ شارالار قابىلداۋ قاجەت ەكەنىن ايتتى.
مۇنان سوڭ اۋداندىق سانيتاريالىق-ەپيدەميولوگيالىق باقىلاۋ باسقارماسىنىڭ باسشىسى گۇلسىم يماندوسوۆا ايتەكە بي كەنتىندە جۇقپالى ىندەتكە شالدىققانداردىڭ قاراسى قالىڭ ەكەنىن تىلگە تيەك ەتتى. سول ءۇشىن دە اۋدان ورتالىعىندا جيىن-توي ۇيىمداستىرۋدى توقتاتۋ قاجەتىن ايتتى.
قازالى اۋدانارالىق اۋرۋحاناسىنىڭ باس دارىگەرى باقىتكۇل الىشەۆا اۋدانداعى ۆاكتسيناتسيالاۋ جۇمىستارى جونىندە ايتىپ بەردى.
باس دارىگەر باقىتگۇل المامبەتقىزىنىڭ ايتۋىنشا, قازىر 6 ناۋقاستىڭ جاعدايى وتە اۋىر. ءبىر وتباسىنان 3 ادامنىڭ ىندەت جۇقتىرعانى جايلى دەرەكتەر بار.