قازاقستاندىق تەننيسشى زارينا دياس اۆستراليا اشىق چەمپيوناتىندا تاعى دا جەڭىسكە جەتىپ, كەلەسى كەزەڭگە شىقتى. بۇل تۋرالى egemen.kz ءتىلشىسى حابارلادى.
ەكىنشى كەزەڭدە ول الەمنىڭ 150-راكەتكاسى, جاڭازەلانديالىق تەننيسشى مارينا ەراكوۆيچپەن كەزدەسىپ, قارسىلاسىن 6:4, 6:0 ەسەبىمەن ۇتتى. ەندى كەلەسى ويىنىن زارينا رۋمىن سيمونا حالەپپەن وتكىزەدى.
ال قازاقستاندىق تاعى ءبىر تەننيسشى گالينا ۆوسكوبوەۆا ەكىنشى كەزەڭنەن وتە المادى. ول الەمنىڭ 16-راكەتكاسى, يسپان كارلا سۋارەس-ناۆاررودان 6:7, 6:3, 6:8 ەسەبىمەن جەڭىلىپ قالدى. بۇعان دەيىن جارىستان ياروسلاۆا شۆەدوۆا مەن يۋليا پۋتينتسەۆا شىعىپ قالعان ەدى. سودان كەيىن ولاردىڭ جولىن ەرلەر اراسىنان ميحايل كۋكۋشكين, اندرەي گولۋبەۆ پەن الەكساندر نەدوۆەسوۆ تە قايتالادى. ولاردىڭ ءبارى العاشقى كەزەڭنەن ارى اسا المادى.
P.S. قازىر اۆستراليا اشىق چەمپيوناتى ۋاقىتشا توقتاپ تۇر. ءتۋرنيردى ۇيىمداستىرۋشىلار مەلبۋرن قالاسىنداعى 40 گرادۋس ىستىققا بايلانىستى جارىستى جالعاستىرماۋدى ءجون كورىپ وتىر.
تۋرنير ىستىق باسىلعاننان كەيىن ءارى قاراي جالعاسادى. بۇل سىندا ءبىزدىڭ ەلدىڭ بار ءۇمىتى قازاق قىزىنا عانا ارتىلىپ وتىر. وسى جەردە ايتا كەتەتىن نارسە, جوعارىدا جەڭىلگەن تەننيسشىلەرىمىزدىڭ ءبارى قازاقستان تەننيس فەدەراتسياسىنىڭ قولداۋىمەن جارىستارعا قاتىسىپ جۇرگەن سپورتشىلار بولسا, اۆستراليا اشىق چەمپيوناتىندا ءۇشىنشى كەزەڭگە شىققان زارينا دياس ءوز كۇشىمەن عانا جارىستارعا قاتىسىپ كەلەدى. زارينا مۇنداي ۇلكەن تۋرنيرلەرگە اكە-شەشەسى بانكتەردەن نەسيە العاندا عانا قاتىسادى ەكەن. بۇل ەندى ءسوز رەتىندە ايتا كەتكەنىمىز.
داستان كەنجالين.
دەرەككوز: http://www.ausopen.com