«نۇر وتان» پارتياسى ازاماتتاردىڭ مۇڭ-مۇقتاجىن تىڭداپ, ۇسىنىس-تىلەكتەرىن ەسكەرۋدە جاڭاشا ءادىس قولدانۋعا كوشتى. كەشە «نۇر وتان» پارتياسىنىڭ ورتالىق اپپاراتى ۇيىمداستىرعان قوعامدىق قابىلداۋدىڭ ونلاين فورماتىندا ءوتۋى – وسىنىڭ كورىنىسى.
«نۇر وتان» پارتياسى ازاماتتاردىڭ مۇڭ-مۇقتاجىن تىڭداپ, ۇسىنىس-تىلەكتەرىن ەسكەرۋدە جاڭاشا ءادىس قولدانۋعا كوشتى. كەشە «نۇر وتان» پارتياسىنىڭ ورتالىق اپپاراتى ۇيىمداستىرعان قوعامدىق قابىلداۋدىڭ ونلاين فورماتىندا ءوتۋى – وسىنىڭ كورىنىسى.
پارتيا وكىلدەرىنىڭ ايتۋىنشا, مۇنداي جاڭاشا ءادىس ارقىلى ازاماتتارعا قىزمەت كورسەتۋ ولاردىڭ ۋاقىتىن ۇنەمدەۋگە دە بەلگىلى ءبىر دەڭگەيدە ىقپال ەتپەك. «قوعامدىق قابىلداۋ بولمەسىنىڭ مۇنداي تاجىريبەسى وتكەن جىلدىڭ 1 جەلتوقسانىنان باستاپ جۇزەگە اسىرىلا باستاعان. سول كۇنى ەلباسى, پارتيا توراعاسى نۇرسۇلتان نازارباەۆ ارنايى كەلىپ, قوعامدىق قابىلداۋ بولمەسىنىڭ جاڭا عيماراتىن اشتى. بۇگىنگى تاڭدا ءبىز «ەلەكتروندى ۇكىمەت» ارقىلى حالىققا ۇلكەن مۇمكىندىك تۋعىزىپ وتىرمىز. ياعني, ءار ازامات ەشقايدا شىقپاي, ورتالىققا كەلمەي, بەينە بايلانىسقا شىعىپ, ءوزىن تولعاندىرعان ماسەلە بويىنشا پارتيانىڭ قوعامدىق قابىلداۋ بولمەسىندە ءوتىپ جاتقان مەملەكەتتىك ورگاندار باسشىلارىنىڭ, ءماجىلىس دەپۋتاتتارىنىڭ قابىلداۋلارىندا بولا الادى, ونىڭ كەستەسى «ەلەكتروندى پارتيانىڭ» پورتالىندا جاريالانعان», دەدى «نۇر وتان» پارتياسى ورتالىق اپپاراتى قوعامدىق قابىلداۋ بولمەسى مەڭگەرۋشىسىنىڭ ورىنباسارى جۇماجان قامكەن ۇلى.
سونىمەن, كەشە پارتيانىڭ قوعامدىق قابىلداۋ بولمەسىنە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ارنايى كەلىپ, اۋەلگى كەزەكتە بىرقاتار ازاماتتارمەن جۇزبە-ءجۇز كەزدەسىپ, ولاردىڭ تالاپ-تىلەكتەرىنە قۇلاق ءتۇردى. اتالعان ۆەدومستۆو باسشىسىنىڭ قوعامدىق قابىلداۋىنا كەلگەن ازاماتتاردىڭ ارقايسىسىن سان ءتۇرلى ماسەلە تولعاندىرىپ, ءارتۇرلى ساۋال مازالايدى ەكەن. ماسەلەن, مينيستر بۇل جولى زەينەتاقى, ەڭبەكاقى, الەۋمەتتىك جاردەماقى, الەۋمەتتىك ماتەريالدىق كومەك, جۇمىسقا ورنالاسۋ, جەكە كاسىپ اشۋعا شاعىن نەسيە الۋ, مۇگەدەكتىك تاعايىنداۋ, وندىرىستىك جاراقات العان جۇمىسشىلارعا تولەنەتىن وتەماقى سىندى ماسەلەلەر توڭىرەگىندە جۇرتشىلىقتى تولعاندىرىپ جۇرگەن ساۋالدارعا جاۋاپ بەردى.
ءمينيستردىڭ قابىلداۋىنا كەلگەن ازاماتتاردىڭ اراسىندا استانا قالاسىنىڭ 64 جاستاعى تۇرعىنى تۇرسىن قابىكەنوۆا دەگەن ازاماتشا دا بار ەكەن. بۇگىندە 3 نەمەرەسىن باعىپ وتىرعان انا ءوزىنىڭ قوعامدىق قابىلداۋ بولمەسىنە كەلۋ سەبەبىن بىلايشا ءتۇسىندىردى. «مەنىڭ نەمەرەلەرىمدى 4 جىل بۇرىن اناسى, ياعني مەنىڭ كەلىنىم تاستاپ كەتكەن ەدى. ول كەزدە نەمەرە قىزىما 1 جاس 7 اي بولسا, ال ودان كەيىنگى ەگىز نەمەرەلەرىمە 4,5 اي ەندى عانا تولعان بولاتىن. وسى ۋاقىت ارالىعىندا ەشقانداي جاردەماقى العان جوقپىن. ءوزىمنىڭ جۇمىسىم جوق, زەينەتاقىعا دا شىقپاعانمىن. ءبارىمىز ۇلىمنىڭ از-ماز جالاقىسىمەن كۇن كورىپ وتىرمىز. ءبىزدىڭ ماتەريالدىق جاعدايىمىز قيىن. نەمەرەلەرىم بالاباقشالارعا بارا المايدى. سەبەبى, ءجيى اۋىرادى, وتە ءالسىز. وكپەلەرىنە سۋىق تيگەن, دەمىكپە اۋرۋىنا شالدىققان.
ارينە, مەملەكەت تاراپىنان ەكى رەت كۆوتا بەرىلدى. سول كۆوتالار بويىنشا تالاي رەت ەمدەلدىك, جىلىنان 3-4 رەت اۋرۋحاناعا جاتامىز. قانشا جىل باسپانا دەۋگە اۋىز بارمايتىن «ۇيلەردى» جالداپ, تۇرىپ كەلدىك. قازىر دە سونداي جەرلەردە تۇرىپ جاتىرمىز. باسپانامىز جوق. تۋىسقاندارىمىز بىزگە اياۋشىلىق تانىتىپ, كومەك كورسەتىپ وتىرادى. ماسەلەن, بيىلعى قىس بويى ءبىر اي ءبىر تۋىسىمىزدىڭ ۇيىندە, تاعى ءبىر اي باسقا تۋىسىمىزدىڭ ۇيىندە تۇردىق. مەنى نەمەرەلەرىمنىڭ جاعدايى الاڭداتادى. انالارى 4 جىل بۇرىن كەتكەننەن بىردە-ءبىر رەت توبەسىن كورسەتكەن ەمەس. مينيسترگە وسى جاعداي تۇرتكى بولىپ, مۇمكىن كومەگى ءتيىپ قالار» دەگەن نيەتپەن كەلگەن ەدىم. مىنە, وسىلاي دەپ مۇڭ شاققان ول تامارا دۇيسەنوۆانىڭ: «ءوتىنىش جازىڭىز, جاعدايىڭىزدى قارايمىز», دەگەن سوزىنە ءۇمىت ارتىپ وتىرعانىن جەتكىزدى.
سونىمەن قاتار, بۇل كۇنى العاش رەت ايماقتارمەن ونلاين ءپىشىمى نەگىزىندە قابىلداۋ جۇرگىزىلدى. ماسەلەن, ۆەدومستۆو باسشىسى ەلىمىزدىڭ 3 ءوڭىرى – اقمولا, اقتوبە جانە قوستاناي وبلىستارىمەن تىكەلەي بايلانىسقا شىعىپ, اتالعان وڭىرلەردىڭ 6 تۇرعىنىنىڭ تالاپ-تىلەكتەرى مەن وتىنىشتەرىن تىڭدادى. ونلاين بايلانىسقا شىققان ءوڭىر تۇرعىندارى ەلىمىزدىڭ «زەينەتاقىمەن قامسىزداندىرۋ تۋرالى» زاڭىنا وزگەرىستەر ەنگىزۋ, ەڭبەك ارداگەرلەرىنىڭ دارەجەسى تۋرالى زاڭ جوباسىن ازىرلەۋ, اۋىل شارۋاشىلىعىندا قىزمەت اتقارعان زەينەتكەرلەردىڭ زەينەتاقىسىن ءوسىرۋ, مۇگەدەك بالالاردىڭ كۇتىمىنە قاجەتتى الەۋمەتتىك كومەك كورسەتۋ تۋرالى ۇسىنىستارىن جەتكىزدى.
ازاماتتارعا قوعامدىق قابىلداۋ جۇرگىزىلگەننەن كەيىن ت.دۇيسەنوۆا مۇڭ-مۇقتاجدارىمەن كەلىپ, ءوتىنىش ايتقان ازاماتتاردىڭ ماسەلەلەرىن شەشۋ جونىندە ايماقتىق ورگاندارعا بىرقاتار تاپسىرمالار بەردى.
ءلايلا ەدىلقىزى,
«ەگەمەن قازاقستان».