استانانىڭ «بارىس» كومانداسى قۇرلىقتىق حوككەي ليگاسىنىڭ «شىعىس» ديۆيزيونىندا ماسكەۋدىڭ «سپارتاك» كلۋبىن 4:2 ەسەبىمەن ۇتىپ, ءبىرىنشى ورىنعا شىقتى. بۇل تۋرالى egemen.kz ءتىلشىسى حابارلادى.
كەزدەسۋدە ەسەپتى ءبىرىنشى بولىپ الاڭ يەلەرى اشتى. ماتچتىڭ 6-شى مينۋتىندا نايدجەل دوۋس داستين بويدتىڭ بەرگەن پاسىن ادەمى پايدالانىپ, قارسىلاستار قاقپاسىن ءدال كوزدەدى. ءبىرىنشى كەزەڭدە وسىدان كەيىن ەكى جاق تا شايبا سوعۋعا قانشاما تىرىسقانىمەن جانكۇيەرلەرىن تاعى گولمەن قۋانتا المادى. قوناقتار كەزدەسۋدىڭ 27-ءشى مينۋتىندا عانا ەسەپتى تەڭەستىردى. بىراق بۇل ەسەپ كوپكە دەيىن سوزىلمادى. ارادا ءبىر مينۋت وتكەندە تالعات جايلاۋوۆ «سپارتاكقا» ەكىنشى گولدى سوقسا, 33-ءشى مينۋتتا نايدجەل دوۋس تاعى دا قوناقتاردىڭ قاقپاسىن ءدال كوزدەدى. سوڭعى كەزەڭدە استانالىقتار ەسەپتى 4:1-گە جەتكىزدى. بۇل شايبانىڭ اۆتورى بولىپ زاك حەميلل اتاندى. ويىن اياقتالار كەزدە رەسەيلىكتەر بىر شايبا عانا سوعۋعا مۇمكىندىك الدى. ودان باسقاعا ولاردىڭ شاماسى كەلمەدى.
وسى جەڭىستەن كەيىن «بارىس» «شىعىس» ديۆيزيونىندا 44 ويىننان كەيىن 88 ۇپاي يەلنىپ, ءبىرىنشى ورىنعا شىقتى. ەكىنشى ورىندا وسىنشاما ويىننان كەيىن سونشاما ۇپاي العان ماگنيتوگورسكىنىڭ «مەتاللۋرگى» تۇر. ءۇشىنشى ورىندا قازاننىڭ «اك بارسى» كەلەدى. ولاردا 44 ويىننان كەيىن 86 ۇپاي بار. ءتورتىنشى ورىندا ۋفانىڭ «سالاۆات يۋلاەۆ» كومانداسى جايعاسىپ وتىر. ولار 44 ماتچتان كەينى 81 ۇپاي يەلەنۋدە.
ەندى «بارىس» كەلەسى ويىنىن تاعى دا ءوز ايدىنىندا وتكىزەدى. بۇل جولى استانالىقتار 16 قاڭتار كۇنى حورۆاتيانىڭ «مەدۆەشچاك» (زاگرەب) كومانداسىن قابىلدايدى. حورۆاتتار «باتىس» ديۆيزيونىندا 7-ءشى ورىندا كەلەدى.
داستان كەنجالين.
دەرەككوز: http://www.khl.ru