اقمولا وبلىستىق پوليتسيا دەپارتامەنتى ءباسپاسوز قىزمەتىنىڭ اقپاراتى بويىنشا ءبىر جارىم ايلىق قىزىن ءبىر ميلليون تەڭگەگە باعالاعان ايەل, ونى بالاسى جوق جۇپقا ساتىپ جىبەردى, دەپ حابارلايدى Egemen.kz.
23 شىلدەدە اقمولا وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ قىزمەتكەرلەرى بالانى ساتىپ الۋ-ساتۋ فاكتىسىن انىقتاعان.
«زاڭسىز مامىلە تۋرالى جەدەل اقپارات وبلىستىق كريمينالدىق پوليتسيا باسقارماسىنا كەلىپ ءتۇستى. ولار ءوز وتباسىنا ءبىر جارىم ايلىق قىزدى العان بالاسىز ەرلى-زايىپتىلاردى انىقتاپ, ىزدەستىردى. مامىلە اقمولا وبلىسىنىڭ اۋماعىندا تۇراتىن ەرلى-زايىپتىلار مەن بۇرىن قر قك 188-بابىنىڭ 1-بولىگى «ۇرلىق» جانە قر قك 190-بابىنىڭ 1-بولىگى «الاياقتىق» بويىنشا قىلمىستىق جاۋاپكەرشىلىككە تارتىلعان بالانىڭ 27 جاستاعى اناسى اراسىندا جۇزەگە اسىرىلعان», دەپ اتاپ ءوتتى ۆەدومستۆودا.
جاڭا تۋعان نارەستەنىڭ اناسىنا 1 ملن تەڭگە كولەمىندە اقشا بەرىلگەن.
اتالعان فاكتى بويىنشا سوتقا دەيىنگى تەرگەۋ امالدارى باستالدى. قر قك 135-ءى بابى («ادام ساۋداسى»), قىلمىسكەردىڭ مۇلكىن تاركىلەي وتىرىپ, جەتى جىلدان توعىز جىلعا دەيىنگى مەرزىمگە باس بوستاندىعىنان ايىرۋ تۇرىندەگى ەڭ جوعارعى جازانى كوزدەيدى.