دەنساۋلىق ساقتاۋ ءمينيسترى الەكسەي تسوي ورتالىق كوممۋنيكاتسيالار قىزمەتى الاڭىندا ەلىمىزدەگى ەپيدەميالىق جاعداي تۋرالى ايتىپ, الەمدە كوروناۆيرۋس ينفەكتسياسىنىڭ جاڭا شتامى پايدا بولعانىن حابارلادى.
ء مينيستردىڭ ايتۋىنشا, دۇنيەجۇزىلىك دەنساۋلىق ساقتاۋ ۇيىمى پەرۋدە العاش رەت 2020 جىلدىڭ جەلتوقسانىندا تابىلعان جانە 30 ەلدە, نەگىزىنەن سولتۇستىك جانە وڭتۇستىك امەريكادا, ەۋروپا ەلدەرىندە 3 مىڭعا جۋىق جاعداي انىقتالعان «ليامبدا» شتامىنىڭ انىقتالۋى تۋرالى مالىمدەدى.
ەپيدەميالىق جاعداي ماتريتساسىنا سايكەس قازاقستان 26 ماۋسىمنان باستاپ «قىزىل ايماقتا» ورنالاسقان. «سارى ايماقتا» ەكى ءوڭىرىمىز – شىعىس قازاقستان جانە تۇركىستان وبلىستارى بولسا, قالعان ءوڭىردىڭ بارلىعى – 15 ءوڭىر «قىزىل ايماقتا» تۇر. «دەلتا» شتامىنىڭ تارالۋىن ەسكەرە وتىرىپ, سوڭعى ەكى اپتادا الدىڭعى ەكى اپتامەن سالىستىرعاندا جالپى رەسپۋبليكا بويىنشا اۋرۋشاڭدىقتىڭ ءوسۋى بايقالادى, ونىڭ كورسەتكىشى – ەكى ەسە. ماۋسىم ايىمەن سالىستىرعاندا ورتاشا تاۋلىكتىك اۋرۋ 4,8 ەسە ءوستى. سىرقاتتانۋدىڭ ءوسۋىن جانە دەنساۋلىق ساقتاۋ جۇيەسىنە جۇكتەمەنىڭ ارتۋىن ەسكەرە وتىرىپ, شىلدە ايىندا قوسىمشا 10 مىڭعا جۋىق توسەكتىك ورىن اشىلدى, رەزەرۆتە 21,4 مىڭعا جۋىق توسەكتىك ورىن قالىپ وتىر.
سونىمەن قاتار دارىلىك زاتتار مەن مەديتسينالىق بۇيىمداردىڭ قاجەتتى كولەمى تولىق قامتاماسىز ەتىلگەن. اۋرۋحانالاردا كۆي-ءدى ەمدەۋگە ارنالعان دارىلەردىڭ ايلىق قورى, «سق-فارماتسيا» قويمالارىندا جانە ءدارىحانالاردا ەكى ايلىق قورى قالىپتاستىرىلعان. بارلىق وڭىردە 18 ملرد تەڭگەگە ءدارى-دارمەكتەردىڭ تۇراقتاندىرۋ قورلارى قۇرىلدى. سونىمەن قاتار حالىقتىڭ تەستىلەۋگە قولجەتىمدىلىگى قامتاماسىز ەتىلدى. COVID-19 دياگنوستيكاسى ءۇشىن تاۋلىگىنە جالپى قۋاتى 120 مىڭ زەرتتەۋ بولاتىن 157 زەرتحانا مەن 66 بيولوگيالىق ماتەريال الۋ پۋنكتى تارتىلدى. ءتيىستى كونتينگەنتتى ۆاكتسينالاۋ جالعاسۋدا. بۇگىندە ۆاكتسينانىڭ 8 ملن دوزاسى پايدالانىلدى, ونىڭ ىشىندە 1 كومپونەنتپەن 5 054 970 ادام ەگىلدى, بۇل ءتيىستى حالىقتىڭ 51%-ىن قۇرايدى. ەكىنشى كومپونەنتپەن 3 075 907 ادام قامتىلدى. ەگۋ پۋنكتتەرىندە شامامەن 580 مىڭ ءبىرىنشى كومپونەنت جانە 1 ملن 190 مىڭ ەكىنشى كومپونەنت بار.
«ۆاكتسينالاۋ – ۆيرۋستىڭ تارالۋىن ازايتۋدىڭ جانە بۇرىنعى ءومىر سالتىنا, جۇمىسقا, وتباسىلىق داستۇرگە جانە ساياحاتقا ورالۋدىڭ جالعىز ءتاسىلى», دەپ تاعى دا ەسكە سالدى ا.تسوي.
«دەلتا» شتامى انىقتالعان شتامدارعا قاراعاندا 60% جۇقپالى, ورتا ەسەپپەن ءبىر ادامنان 5-6 ادامعا جۇعادى, 7 كۇنگە دەيىن قىسقا ينكۋباتسيالىق كەزەڭمەن سيپاتتالادى.