قر ءبىلىم جانە عىلىم ءمينيسترى اسحات ايماعامبەتوۆ ماڭىزدى الەمدىك دەڭگەيدەگى جارىستاردا قازاقستان وقۋشىلارىنىڭ جەتىستىكتەرى جايلى ايتىپ بەردى. بۇل تۋرالى ۆەدوموستۆو باسشىسى Facebook-تەگى پاراقشاسىندا جازدى, دەپ حابارلايدى Egemen.kz.
«قازىر بۇكىل الەمنىڭ ءارى ەلىمىزدىڭ نازارى توكيوداعى وليمپيادا ويىندارىندا. ءبىز قازاقستان قۇراماسىنا جانكۇيەرمىز. بۇل پوستتا ەلىمىزدىڭ باسقا دا ماڭىزدى الەمدىك دەڭگەيدەگى جارىستاردا – ماتەماتيكا مەن بيولوگيادان حالىقارالىق وليمپيادالارداعى وقۋشىلاردىڭ جەتىستىكتەرىمەن بولىسكىم كەلەدى», دەپ اتاپ ءوتتى مينيستر.
اسحات ايماعامبەتوۆتىڭ ايتۋى بويىنشا, جىل باسىنان بەرى ەلىمىزدىڭ وقۋشىلارى حالىقارالىق وليمپيادالاردا 200-دەن استام مەدال جەڭىپ الىپ, ءوز بىلىمدەرىنىڭ جوعارى دەڭگەيىن كورسەتتى.
«ماتەماتيكا ءپانى بويىنشا وليمپيادادا ءبىزدىڭ وقۋشىلار التى مەدال جەڭىپ الدى, ونىڭ ىشىندە ءبىر التىن, 3 كۇمىس جانە 2 قولا بار. ەلىمىزدىڭ اتىنان الەمدىك دەڭگەيدەگى وليمپياداعا نۇر-سۇلتان, الماتى, قاراعاندى جانە اتىراۋ قالاسىنان التى وقۋشى قاتىستى. التىن مەدال يەگەرى – مىرزاتاي ايبەك, كۇمىس مەدال يەگەرلەرى – دۇيسەنبەكوۆ دانات, ساتۋبالدين تاير, سام فەتۋللاح, قولا مەدال يەگەرلەرى – ولجاباەۆ اسىلبەك جانە بايمۋرزين راحيم. بيولوگيا ءپانى بويىنشا وليمپيادادا ەل نامىسىن نۇر-سۇلتان, الماتى, وسكەمەن جانە اقتوبە قالالارىنان 4 وقۋشى قورعادى. ولار 1 كۇمىس جانە 2 قولا مەدال, سونداي-اق 1 قۇرمەت گراموتاسىن ۇلتتىق قۇرامانىڭ قورجىنىنا سالدى. كۇمىس مەدالدى تەمىربەكوۆ ەراسىل, قولانى باتىرجانوۆ ەرنار مەن ەرنازاروۆ باقداۋلەت, قۇرمەت گراموتاسىن ءابدۋالى گۇلدانا جەڭىپ الدى», دەپ جازدى مينيستر وقۋشىلاردىڭ جەتىستىكتەرىن اتاپ ءوتىپ.
«بولاشاقتا بيىك بەلەستەردى باعىندىرۋدى تىلەيمىن! ءبىز ءوز تاراپىمىزدان قازاقستاندىق وقۋشىلار وزدەرىن كۇللى الەمگە تانىتا وتىرىپ, حالىقارالىق بايقاۋلاردا بۇدان دا ۇزدىك ناتيجەلەر كورسەتۋى ءۇشىن جاعداي جاساۋدى جالعاستىرامىز», دەپ جازدى اسحات ايماعامبەتوۆ ءوز جازباسىندا.