كەز كەلگەن سالانىڭ ابىروي-بەدەلىن ىسىنە مىعىم, ماماندىعىنا ادال ازاماتتار اسىرادى. سولاردىڭ ءبىرى – جامبىل وبلىستىق جەرگىلىكتى پوليتسيا باسقارماسىنىڭ باستىعى پوليتسيا پولكوۆنيگى راحىمبەردى اشكەەۆ دەسەك, قاتەلەسپەيمىز. وتكەن جىلى ول پرەزيدەنت جارلىعىمەن «ەرلىگى ءۇشىن» مەدالىمەن ماراپاتتالدى.
«اكەمىز ۇل-قىزدارىن ەڭبەككە باۋلىدى. جۇرتتىڭ الا ءجىبىن اتتاماۋدى سانامىزعا ءسىڭىردى. قازىر قاراشاڭىراقتا وتىرعان انام ءۇي شارۋاسىندا بولسا دا اقىلدى ەدى. اكەنى قالاي قادىرلەۋ كەرەكتىگىن انامىزدىڭ ارقاسىندا بىلدىك. الا تاڭنان قاس قارايعانشا, كەيدە ءتىپتى بىرنەشە كۇن بويى ۇيدە بولمايتىن, جۇمىسىمەن جۇرەتىن اكەمىزدىڭ قاباعىنا قاراپ وستىك», دەگەندى ءجيى ايتادى راحىمبەردى دۋلات ۇلى.
ول ءتارتىپ ساقشىسى بولاتىنىن ءاۋ باستان بىلگەن. ء«الى ەسىمدە, بالا كەزىمنەن جول پوليتسەيى بولۋدى ارماندايتىن ەدىم. ءبىزدىڭ ايماقتا قۇم كوپ, قولعا تۇسكەن زاتتاردى سىم تەمىرمەن ءبىر-بىرىنە بايلاپ, بالا قيالمەن كولىككە ۇقساتىپ الاتىن ەدىك. شاشىلىپ جاتقان دۇنيەلەردەن ماي بەكەتىن تۇرعىزىپ الامىن, وزگە بالالارعا ماي ينسپەكتورى بولاتىنمىن», دەيدى پوليتسيا پولكوۆنيگى بالداۋرەن بالا كەزىن ەسكە الىپ.
وتان الدىنداعى اسكەري بورىشىن ورىنداپ قايتقان راحىمبەردى ءبىلىمسىز بولاشاق ب ۇلىڭعىر ەكەنىن جاقسى ءتۇسىنىپ, كەرەك قۇجاتتارىن الىپ, الماتىعا جولعا شىعادى. سول كەزدەگى ۆ.ي.لەنين اتىنداعى قازاق پوليتەحنيكالىق ينستيتۋتىن جانە كورشىلەس قىرعىز ەلىندەگى ي.اراباەۆ اتىنداعى ۋنيۆەرسيتەتتى «جول قوزعالىسىن رەتتەۋ» ماماندىعى بويىنشا ءبىتىردى.
بۇل كەز – ەكونوميكالىق داعدارىس جىلدارى بولعاندىقتان ۋاقىتشا بولسا دا ءارتۇرلى شارۋالاردى اتقارۋىنا تۋرا كەلدى. ء«بىلىمىم مىناداي» ەدى دەپ تاڭداعان ماماندىق نەگىزىندە قىزمەت ىزدەيتىن كەز ەمەس.
ونىڭ بالا ارمانى ەلىمىز وتپەلى كەزەڭ قيىندىقتارىن ەڭسەرىپ, ەس جيا باستاعان تۇستا عانا ورىندالدى. 1997 جىلى ول الماتى وبلىسى جول پوليتسيا ءبولىمىنىڭ اعا ينسپەكتورلىعىنان باستاپ, ادال ەڭبەگىمەن, زور جاۋاپكەرشىلىگىمەن كوزگە ءتۇسىپ, وبلىستىق جول پوليتسياسى باستىعىنىڭ ورىنباسارى لاۋازىمىنا دەيىن كوتەرىلەدى. اينالاسى ون جىلدىڭ ىشىندە ءبىلىمىن شىڭداپ, بىلىكتىلىگىن قايراپ, پاۆلودار وبلىسى جول پوليتسياسى باسقارماسىنىڭ باستىعىنا دەيىن جوعارىلادى. ال كەيىنگى ءۇش جىلدان بەرى جامبىل وبلىسى جەرگىلىكتى پوليتسيا باسقارماسىنىڭ باستىعى قىزمەتىن اتقارىپ ءجۇر.
راحىمبەردىنىڭ ەڭبەك جولى قىزمەتىنە بايلانىستى ەستە قالارلىق وقيعالاردان كەندە ەمەس. تالاي قىلمىستى ءىزىن سۋىتپاي اشتى. قيىن دا كۇردەلى ىستەردىڭ باسى-قاسىندا بولدى.
ەندى عانا پوليتسيا قىزمەتىنە كىرىسىپ جاتقان كەزى. جاس مامانعا ەڭ اۋىر ءىس – جول بويىندا ادام قاعۋ فاكتىسى تىركەلىپ, كىنالىنى تابۋ, بولعان توتەنشە وقيعانىڭ ءمان-جايىن انىقتاۋ تاپسىرىلادى. ادام ولىمىنە قاتىستى ءىستى جۇرگىزۋ قانشا قيىنعا سوقسا دا, اقىرى قىلمىسكەردى قولعا تۇسىرەدى.
«كورشى اۋداننان گاز تاسيتىن مەكەمەگە جاڭا «زيل» اۋىر جۇك كولىگى كەلگەن ەكەن. ءالى مەملەكەتتىك تىركەۋگە تۇرماعان. گاز تاسيتىن مەكەمە ءوز ۇجىمى ىشىنەن ءبىر جۇرگىزۋشى تاعايىنداپ, ءنومىرى جوق جاڭا ماشينانى بەكىتىپ بەرەدى. وسى جەردە جۇرگىزۋشىگە ارام وي كەلىپ, بۇزىلىپ تۇرعان ەسكى كولىكتىڭ ءنومىرىن شەشىپ الىپ, جاڭا «زيل» كولىگىنە تاعىپ العان. سونىمەن كورشى اۋدانداعى باجاسىنا بارىپ, ىشىمدىك ءىشىپ, تويلاپ, كۇن باتا ەل كوزىنە تۇسپەيىن دەپ جولعا شىعادى. وسى جولدا رۋلگە ماس كۇيىندە وتىرعان جۇرگىزۋشى جول شەتىندە كەتىپ بارا جاتقان ادامدى باسىپ ولتىرەدى. ونىڭ كىم ەكەنىن انىقتاۋ وڭايعا تۇسكەن جوق», دەپ ەسكە الادى ر. اشكەەۆ.
ال بۇل كەزدە تەرگەۋشىلەر كۇدىكتى رەتىندە باسقا كولىكتى تۇراققا قويىپ, جازىقسىز ءبىر جۇرگىزۋشىنى القىمنان الىپ جاتقان. جاۋاپقا تارتىلعان ادامنىڭ بار كىناسى – جول بويىنداعى تەكسەرۋ كەزىندە قايتىس بولعان ادامنىڭ قاسىندا سۋرەتكە ءتۇسىپ قالعانى. دەمەك, جازىقسىز جاپا شەگەتىن ءتۇرى بار.
راحىمبەردىنىڭ تۇيسىگى الداماسا, كىنالى ول ەمەس. ءارى قاراي ىزدەستىرۋ جۇمىسىن جالعاستىرا بەرەدى. گاز تاسيتىن مەكەمەگە قايتا-قايتا بارىپ ءجۇرىپ, وسى جاقتان ءبىر ىلىكتىڭ تابىلاتىنىنا ىشتەي سەنىمدى. ويتكەنى ءبىر ادام جول بويىندا وسى مەكەمەگە تيەسىلى اۋىر جۇك كولىگىن كورگەنىن ايتقان. ول جۇك كولىگى بورتىنىڭ الدىڭعى جاعىنداعى جوعارعى ەكى شەتىندە قىزىل جالاۋ بار دەگەنى ەسىندە قالعان. ول كەزدە گاز تاسيتىن ماشينا سولاي جابدىقتالاتىن. سونىمەن بىرنەشە مارتە بارىپ, جاڭادان كەلگەن «زيل» ماشيناسىنىڭ الدىڭعى بامپەرى مەن كاپوتىندا ازداپ مايىسقان ءىز قالعانىن بايقايدى. قوياردا قويماي ساراپتاما جاساتىپ, اقىر سوڭىندا قىلمىسقا قاتىستى جۇرگىزۋشىنى تابادى.
تەرگەۋ كەزىندە جۇرگىزۋشى ءوز كىناسىن مويىندادى. سوت ونى 8 جىل باس بوستاندىعىنان ايىردى. وسى ارالىقتا كۇدىكتى دەپ تانىلعان ادام قاماۋدان بوساتىلدى.
پوليتسيا پولكوۆنيگى مۇنداي وقيعالاردىڭ تالايىن كورگەن, تالاي ءىس-شاراعا جەتەكشىلىك جاساپ, كوپتەگەن قىلمىستىڭ دەر كەزىندە بەتىن اشقان. وسىنداي ابىرويلى قىزمەتى ءۇشىن تاۋەلسىزدىگىمىزدىڭ 10, 20, 25 جىلدىعىنا بايلانىستى مەرەكەلىك مەدالدارمەن ماراپاتتالعان. ىشكى ىستەر ءمينيسترىنىڭ قولىنان «ەڭ ۇزدىك قىزمەتكەر» قۇرمەتتى اتاعىنىڭ توسبەلگىسىن العان.
جامبىل وبلىسى جەرگىلىكتى پوليتسيا باسقارماسىنىڭ باسشىلىعىنا راحىمبەردى دۋلات ۇلى كەلگەلى پوليتسياعا دەگەن حالىقتىڭ سەنىمى ارتا ءتۇستى دەۋگە بولادى.
«مەن ءوز ارىپتەستەرىمدى ادال بولۋعا, حالىق يگىلىگىنە قىزمەت ەتۋگە, پوليتسەي اتىنا كىر كەلتىرمەۋگە ۇندەۋدەن جالىققان ەمەسپىن. ءوزىم دە سول ۇدەدەن شىعۋعا بار كۇش-جىگەرىمدى سالىپ كەلەمىن. ءومىر بويى سول مۇراتتان تانعان ەمەسپىن. مەنىڭ كاسىبىمنىڭ قيىندىعىن وتباسىم دا بىلەدى. ءار كەز قولداۋ تانىتىپ, تۇسىنىستىكپەن قارايدى. مەنىڭ قىزمەتىمنىڭ قانشالىقتى قيىن ەكەندىگىن كورىپ وسكەندىكتەرىنەن بە ەكەن, ايتەۋىر, ەكى ۇلىم قۇقىق قورعاۋ سالاسىنا جاقىنداعان جوق. وزدەرى تاڭداعان ماماندىقتارمەن اينالىسىپ, ەلگە قىزمەت جاساپ ءجۇر», دەپ اعىنان جارىلدى پوليتسيا پولكوۆنيگى.
جانكەلدى امانكەلدى ۇلى