سەناتور ولگا بۋلاۆكينا شىعىس قازاقستان وبلىسىنىڭ بىرقاتار اۋداندارىنداعى مەديتسينالىق مەكەمەلەرىنىڭ قىزمەتكەرلەرىمەن كەزدەستى, دەپ حابارلايدى Egemen.kz سەناتتىڭ باسپاسوز قىزمەتىنە سىلتەمە جاساپ.
«پاندەميا دەنساۋلىق ساقتاۋ جانە ءبىلىم بەرۋ سالاسىنداعى قازىرگى پروبلەمالاردى ايقىندادى جانە وسى سالالاردا جاڭا رەفورمالار جۇرگىزۋ قاجەتتىگىن كورسەتتى. قازىرگى كەزدە دارىگەر مامانداردىڭ جەتىسپەۋشىلىگى بايقالادى, وڭىرلەردە كادرلاردى وقىتۋعا گرانتپەن قارجىلاندىرۋ قاجەت. ۇلتتىڭ دەنساۋلىعى مەن ءال-اۋقاتى ءبىزدىڭ بولاشاعىمىز ەكەنىن جانە مەملەكەتتىڭ دامۋى سوعان بايلانىستى ءتۇسىنۋ كەرەك», دەدى ولگا بۋلاۆكينا.
سەناتور كوروناۆيرۋس ينفەكتسياسى پاندەمياسىمەن كۇرەس كەزىندە دارىگەرلەردىڭ جۇمىسىنا باسا نازار اۋداردى, ولارعا قاجىرلى ەڭبەگى ءۇشىن العىس ايتتى, سونداي-اق ۆاكتسيناتسيا ماسەلەلەرىن تالقىلادى.
سەناتور سونداي-اق وڭىردەگى كوپبالالى وتباسىلاردىڭ تۇرعىن ءۇي ماسەلەلەرى قالاي شەشىلىپ جاتقانىمەن تانىستى. ول جۇزەگە اسىپ جاتقان ء«بىر قاباتتى شىعىس» جوباسىن جوعارى باعالادى. مەملەكەتتىك-جەكەشەلىك ارىپتەستىك قاعيداتىنا نەگىزدەلگەن جوبا كوپ بالالى وتباسىلاردىڭ تۇرعىن ءۇي جاعدايلارىن جاقسارتۋعا مۇمكىندىك بەرەدى. سەناتور بۇگىنگى تاڭدا كوپ بالالى وتباسىلاردى تۇرعىن ۇيمەن قامتاماسىز ەتۋ – مەملەكەتتىڭ باسىم مىندەتتەرىنىڭ ءبىرى ەكەنىن اتاپ ءوتتى.
سەناتور فەرمەرلەرمەن كەزدەسۋ بارىسىندا جەرگىلىكتى شارۋالاردى تولعاندىرعان ماسەلەلەردى تىڭدادى. ولار اۋىل شارۋاشىلىعىن دامىتۋعا باعىتتالعان سۋبسيديالاردى ءبولۋ جۇيەسىن وزگەرتۋگە قاتىستى ماسەلەلەردى كوتەردى.
ولگا بۋلاۆكينا سونداي-اق قوعامدىق كەڭەستەر, ارداگەرلەر كەڭەسى, ەتنومادەني بىرلەستىكتەر مۇشەلەرىمەن دە كەزدەستى. بۇل كەزدەسۋلەردە اكىمدەردى سايلاۋ جانە قوعامدىق كەڭەستەردىڭ, وبلىستىق قازاقستان حالقى اسسامبلەياسىنىڭ, انالار مەن اقساقالدار كەڭەستەرىنىڭ جۇمىسى ماسەلەلەرى قارالدى. سونىمەن قاتار اۋرۋحانالاردى جابدىقتاۋ, دەنساۋلىق ساقتاۋدىڭ اقپاراتتىق جۇيەلەرىن ينتەگراتسيالاۋ جانە جەڭىلدىكتى ءدارى-دارمەكتەر بەرۋ ماسەلەلەرى دە كوتەرىلدى.
دەپۋتات ايماق تۇرعىندارى كوتەرگەن بارلىق ماسەلەلەر ونىڭ زاڭ شىعارۋ قىزمەتىنىڭ ارقاۋىنا اينالاتىنىن اتاپ ءوتتى.