قازىرگى كەزدە جامبىل وبلىسىندا كوروناۆيرۋس ىندەتىن جۇقتىرۋدىڭ 10 587 جاعدايى تىركەلىپ وتىر. الايدا قابىلدانعان شارالاردىڭ ناتيجەسىندە 9 631 ازامات ساۋىعىپ شىقسا, وكىنىشكە قاراي, 85 ءولىم وقيعاسى ورىن العان.
وبلىستىق دەنساۋلىق ساقتاۋ باسقارماسىنىڭ مالىمەتىنشە, اعىمداعى جاعداي بويىنشا ايماقتاعى اۋرۋحانالاردا 2 075 ينفەكتسيالىق توسەكتىك ورىن قورى, ونىڭ ىشىندە 202 رەانيماتسيالىق توسەكتىك ورىن قورى, وعان قوسا 170 توسەكتىك ورىنعا ارنالعان كارانتيندىك ستاتسيونارلار جۇمىس اتقارۋدا. وڭىردەگى ەپيدەميالىق جاعدايعا بايلانىستى كوروناۆيرۋسپەن اۋىراتىن ناۋقاستاردى ەمدەۋ ءۇشىن قوسىمشا رەزەرۆ رەتىندە 2 685 ينفەكتسيالىق, ونىڭ ىشىندە 299 رەانيماتسيالىق توسەكتىك ورىن قورى اشىلىپ, جۇمىلدىرىلادى.
«جالپى, وبلىس بويىنشا 23 العاشقى مەديتسينالىق-سانيتارلىق كومەك ۇيىمدارىندا 43 ەگۋ پۋنكتتەرى بار. ولاردىڭ ىشىندە 15 پۋنكت تاراز قالاسىندا جانە 28 پۋنكت اۋدانداردا ورنالاسقان. وبلىس بويىنشا 18 جاستان جوعارى 582 مىڭ ادام كوروناۆيرۋس ينفەكتسياسىنا قارسى ۆاكتسينالاۋعا جاتادى دەپ جوسپارلانعان بولسا, قازىرگى تاڭدا 255 مىڭ 151 تۇلعا ەكپە العان», دەيدى وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ.
سونداي-اق وسى جىلدىڭ 1 اقپانىنان باستاپ وبلىسقا 5 مىڭ ادامعا ارنالعان 10 مىڭ دوزا QazCovid-in وتاندىق ۆاكتسيناسى, 231 مىڭ 700 دوزا سپۋتنيك V ۆاكتسيناسىنىڭ 1-كومپونەنتى جانە 173 مىڭ 425 دوزا 2-كومپونەنتى, 30 مىڭ ادامعا ارنالعان 60 مىڭ دوزا Hayat Vax ۆاكتسيناسى مەن 17 مىڭ ادامعا 34 مىڭ دوزا CoronaVac ۆاكتسيناسى جەتكىزىلگەن. جالپى العاندا, وڭىردە 4 995 تۇلعا وتاندىق, 203 مىڭ 645 تۇلعا سپۋتنيك V, 29 مىڭ 911 تۇلعا Hayat Vax ۆاكتسيناسىمەن جانە 16 مىڭ 598 تۇلعا CoronaVac ۆاكتسيناسىن سالدىرعان. ونىڭ ىشىندە مەديتسينا, ءبىلىم بەرۋ, ارنايى كۇش قىزمەتكەرلەرى مەن مەملەكەتتىك قىزمەتكەرلەر جانە باسقا دا تۇلعالار بار. تۇرعىندارعا ۆاكتسينا ەگۋدەن كەيىنگى اسقىنۋلار تىركەلمەگەن. قازىرگى كەزدە كارانتيندىك ستاتسيونارلارعا 22 تۇلعا ورنالاستىرىلعان. دەگەنمەن قازىرگى ۋاقىتتا جامبىل وڭىرىندە قاۋىپتى ىندەت جۇقتىرۋ دەرەگىنىڭ ارتقانى بايقالادى. الايدا بۇل ماسەلەلەر بويىنشا دا ءتيىستى جۇمىستار جۇرگىزىلۋدە. «وبلىستا 159 موبيلدىك توپ جۇمىلدىرىلدى. تاۋلىك بويى شاقىرتۋ بولدى. ماسەلەن, وتكەن تاۋلىكپەن سالىستىرعاندا جەدەل جاردەم شاقىرتۋ سانى ارتتى. بۇگىندە وڭىردە ءدارى-دارمەك قورى جەتكىلىكتى. ماماندار بويىنشا دا ازىرشە ماسەلە جوق», دەيدى ءا.قاليەۆ.
جامبىل وبلىسى