بۇگىندە تسەمەنت جانە وزگە دە قۇرىلىس كەرەك-جاراعىن جونەلتۋشىلەردىڭ پروبلەمالارى ءجىتى باقىلاۋعا الىندى. «قتج – جۇك تاسىمالى» جشس-دە ونلاين-رەجىمدە وتكەن كەڭەستە وسى ماسەلە كوتەرىلدى.
بيىلعى ءبىرىنشى جارتىجىلدىقتا تسەمەنت تيەۋ 2020 جىلدىڭ وسى كەزەڭىمەن سالىستىرعاندا 9% كوبەيىپ, 4,3 ملن تونناعا جەتتى. قازاقستان بويىنشا 3,3 ملن توننا جۇك تاسىمالدانسا, ونىڭ 830 مىڭ توننادان استامى ەلورداعا جەتكىزىلدى. بۇل كورسەتكىش بىلتىرعى 6 ايداعى تاسىمال كولەمىنە قاراعاندا 43% ارتتى. بيىلعى قاڭتار-ماۋسىم ايلارىندا 7 ملن توننادان استام قۇرىلىس جۇكتەرى تيەلگەن. ونىڭ باسىم بولىگى, ياعني 6,8 ملن تونناسى ەل ىشىندە تاسىمالداندى.
«تسەمەنت جانە باسقا دا قۇرىلىس ماتەريالدارىن تاسىمالداۋ بويىنشا بارلىق وتىنىشتەر تولىقتاي قامتاماسىز ەتىلۋدە. ۆاگون تاپشىلىعى جوق, بىراق بۇل رەتتە قولدانىستاعى پاركپەن ءتيىمدى ءارى ۇتىمدى جۇمىس ىستەۋ قاجەت», دەدى جيىندا ءسوز العان «قتج – جۇك تاسىمالى» جشس اتقارۋشى ديرەكتورى نۇرجان كەلبۇعانوۆ.
قازىرگى ۋاقىتتا قازاقستان ماگيسترالدىق جەلىسىندە 65 مىڭنان استام اشىق ۆاگون بار, ونىڭ 23 مىڭنان استامى – «قازتەمىرترانس» اق مەنشىگىندە. قالعانى جەكە وپەراتورلار مەن كورشى مەملەكەتتەرگە تيەسىلى. قۇرىلىس جۇكتەرىن تاسىمالداۋعا «قازتەمىرترانس» اق پاركى: 10 مىڭنان استام اشىق ۆاگون, 7,3 مىڭنان استام جابىق ۆاگون, 72 پلاتفورما جۇمىلدىردى. قازاقستان اۋماعىندا 4,5 مىڭنان استام حوپپەر-تسەمەنت تاسىعىش بار, ولار نەگىزىنەن جەكەنىڭ قولىندا. تەك 668 تسەمەنت تاسىعىش «قازتەمىرترانس» اق بالانسىندا.
«قتج – جۇك تاسىمالى» جشس-دا جۇك تيەلگەن جانە بوس ۆاگونداردىڭ ءجۇرىپ-تۇرۋىنا تاۋلىك بويعى باقىلاۋ ورناتىلعان. قۇرىلىس زاتتارىن قابىلداپ الۋشىلاردىڭ جۇكتەردى دەر كەزىندە ءتۇسىرىپ الماۋىنان ستانسالىق جانە كىرمە جولداردا كولىك ءجيى تۇرىپ قالاتىن بولدى. سوندىقتان اتقارۋشى ديرەكتور جۇك وپەراتسيالارىنداعى تەحنولوگيالىق نورمالاردى ساقتاۋ كەرەكتىگىن ەسكەرتتى. تسەمەنت جانە جالپى قۇرىلىس جۇكتەرىن تاسىمالداۋ بويىنشا ماسەلەلەردى جەدەل شەشۋ ءۇشىن «قتج – جۇك تاسىمالى» جشس مەسسەندجەردە چات جۇمىس ىستەيدى, وعان ءىرى تسەمەنت زاۋىتتارىنىڭ وكىلدەرى, جۇك جونەلتۋشىلەر مەن جۇك الۋشىلار كىرەدى.
كەڭەس بارىسىندا شالعاي ستانسالاردا جۇك تيەلگەن ۆاگوندارمەن جۇمىس ىستەۋ ءۇشىن مانەۆرلىك لوكوموتيۆ بەرۋ ماسەلەسى شەشىمىن تاپتى. تسەمەنت, سيليكات كىرپىشى بار ۆاگونداردىڭ ۇزاق ۋاقىت تۇرىپ قالۋ فاكتىلەرى ەرەكشە باقىلاۋعا الىندى.
ونلاين-كەڭەستى قورىتىندىلاي كەلە, نۇرجان كەلبۇعانوۆ وسىنداي كەڭ فورماتتاعى كەزدەسۋلەر تۇراقتى بولاتىنىن اتاپ ءوتتى.
«ەگەمەن-اقپارات»