بيىلعى ەڭبەك ماۋسىمىندا نۇر-سۇلتانداعى «جاسىل ەل» جاساعىنىڭ XVII ماۋسىمىندا 1 200 ادام جۇمىس ىستەيدى, دەپ جازادى Egemen.kz.
بيىل كوگالداندىرىلاتىن جەردىڭ جالپى اۋدانى شامامەن 30 گەكتاردى قۇرايدى. «جاسىل ەل» جاستارى قالاداعى كوشەتتەرگە كۇتىم جاساپ قانا قويماي, قايىڭ, قاراعاي, كوكتەرەك جانە تەرەك كوشەتتەرىن سۋارىپ, قوپسىتادى.
باعدارلاماعا ءۇش جاس ساناتىنداعى جاستار قاتىسادى. ءبىرىنشى توپقا كوپبالالى جانە الەۋمەتتىك از قامتىلعان وتباسىلاردىڭ 14 جاستان 17 جاسقا دەيىنگى بالالارى كىرەدى. ولار مەكتەپ ساياباقتارى مەن سكۆەرلەردى تازالاۋ بويىنشا جۇمىستاردى ىستەيدى. بۇل توپتىڭ جۇمىس كۇنى ءتورت ساعاتتان اسپايدى.
ەكىنشى توپقا كوللەدج بەن جوعارى وقۋ ورىندارىنىڭ 17-22 جاس ارالىعىنداعى ستۋدەنتتەرى كىرەدى. ولار كوللەدج بەن ۋنيۆەرسيتەت ساياباقتارىن كوگالداندىرۋمەن اينالىسادى.
ءۇشىنشى ساناتقا 18-29 جاس ارالىعىنداعى جۇمىسسىز جاستار جاتادى. ولار قۇرىلىس الاڭدارىندا, سونداي-اق «استانا ورمانى» كاسىپورنىندا تولىق جۇمىس كۇنى اياقتالعانشا ەڭبەكتەنەدى.
«جاسىل ەل» توراعاسى مارات مۇحامەدجان ۇلىنىڭ ايتۋىنشا,جاستار باعدارلاما بەرەتىن 64 مىڭ تەڭگە جالاقىدان بولەك, جۇمىس بەرۋشىدەن دە قوسىمشا اقشا الادى. ولاردىڭ ورتاشا تابىسى ايىنا 200 مىڭ تەڭگەنى قۇرايدى.
ەڭبەك جاساقتارىنىڭ جۇمىس پروتسەسى سانيتارلىق-ەپيدەميولوگيالىق نورمالاردى ساقتاي وتىرىپ جۇزەگە اسىرىلادى. جاستار دالادا, تازا اۋادا كەمىندە ەكى مەتر قاشىقتىقتى ساقتاي وتىرىپ جۇمىس ىستەيدى. ماسكا مەن قولعاپ كيۋ تالاپتارى دا ساقتالادى.
بۇل تۋرالى نۇر-سۇلتان قالاسىنىڭ رەسمي سايتى جازدى.