سەنات توراعاسى ماۋلەن اشىمباەۆ ماڭعىستاۋ وبلىسىندا بولدى, دەپ حابارلادى جوعارعى پالاتانىڭ ءباسپاسوز قىزمەتى.
ول وڭىرگە ساپارى بارىسىندا وبلىس اۋداندارىنىڭ تۇرعىندارىن اۋىز سۋمەن قامتاماسىز ەتەتىن «كاسپي» سۋ تۇششىتۋ زاۋىتىنىڭ جۇمىسىمەن تانىستى. اۋىز سۋ ماسەلەسى ءوڭىر ءۇشىن اسا ماڭىزدى ەكەنى بەلگىلى. سەنات توراعاسى وسىعان بايلانىستى اتالعان ماسەلەنى شەشۋ ءۇشىن قوسىمشا سۋ تۇششىتۋ نىساندارىن سالۋ قاجەتتىگىنە نازار اۋدارىپ, ۇكىمەتتىڭ كەيىنگى كەڭەيتىلگەن وتىرىسىندا مەملەكەت باسشىسى حالىقتى ساپالى اۋىز سۋمەن قامتاماسىز ەتۋگە ەرەكشە نازار اۋدارعانىن اتاپ ءوتتى.
ماۋلەن اشىمباەۆ ەلىمىزدىڭ بىرقاتار وڭىرىندەگى, سونىڭ ىشىندە ماڭعىستاۋ وبلىسىنىڭ فەرمەرلەرى تاپ بولىپ وتىرعان قۇرعاقشىلىق پەن مال شىعىنى پروبلەمالارىن دا كوتەردى. سەنات توراعاسى بۇل ماسەلە ەل پرەزيدەنتى قاسىم-جومارت توقاەۆتىڭ ەرەكشە باقىلاۋىندا ەكەنىن, زارداپ شەككەن فەرمەرلەر مەن اۋىل تۇرعىندارىن قولداۋ جونىندە ۇكىمەت پەن اكىمدەردىڭ كەشەندى شارالار قابىلداپ جاتقانىن ايتتى.
«ەلىمىزدىڭ پرەزيدەنتى فەرمەرلەردى قولداۋ ءۇشىن ۇكىمەت رەزەرۆىن پايدالانۋدى تاپسىردى. ۇكىمەت پەن اكىمدەرگە «بايتەرەك» حولدينگىمەن بىرلەسە وتىرىپ, فەرمەرلەردى جەمشوپپەن قامتاماسىز ەتۋ جونىندە قاجەتتى كەشەندى شارالاردى جەدەل تۇردە ازىرلەۋ تاپسىرىلدى. مەملەكەت باسشىسىنىڭ تاپسىرمالارىن ىسكە اسىرۋ جاعدايدى تۇراقتاندىرۋعا جانە ەلىمىزدەگى شارۋالاردى قولداۋعا باعىتتالعان», دەدى ماۋلەن اشىمباەۆ.
سەنات توراعاسى مەملەكەت باسشىسىنىڭ تاپسىرماسى بويىنشا ۇكىمەت جەمشوپكە, مال ازىعىن جيناۋ جابدىقتارىنا قوسىمشا سۋبسيديا ءبولۋ جانە قولايلى وڭىرلەردەن مال ازىعىن فورۆاردتىق تۇردە ساتىپ الۋ ءۇشىن فەرمەرلەردى جەڭىلدىكپەن قارجىلاندىرۋدى قامتاماسىز ەتۋ جونىندە شارالار قابىلدايتىنىن اتاپ ءوتتى.
ماۋلەن اشىمباەۆ قۇرعاقشىلىق قايتالاناتىن تابيعي قۇبىلىس ەكەنىنە توقتالدى, سوندىقتان ەل پرەزيدەنتى اتاپ وتكەندەي, جەدەل شارالاردان باسقا, سالانى ازىقپەن قامتاماسىز ەتۋدى ارتتىرۋ بويىنشا جۇيەلى شارالار ازىرلەنۋى قاجەتتىگى ايتىلدى.
ماۋلەن اشىمباەۆ ساپار بارىسىندا بالىق جانە نان زاۋىتتارىنىڭ جۇمىسىمەن دە تانىستى. ول نىسانداردا بولعان كەزدە سەناتتىڭ زاڭ شىعارۋ جۇمىسى جايلى, پاندەميا كەزىندە ازاماتتار مەن كاسىپكەرلىكتى قولداۋ جونىندە قابىلدانعان زاڭدار تۋرالى ايتتى.
سەنات توراعاسى سول كۇنى ءابىش كەكىلباەۆ اتىنداعى مادەني ورتالىقتا بولدى.
ء«ابىش كەكىلباەۆتىڭ 80 جىلدىق مەرەيتويىنا مەملەكەت باسشىسى ارنايى كەلىپ, وسى ورتالىقتى اشقان بولاتىن. كورنەكتى جازۋشى جانە مەملەكەت قايراتكەرى ءابىش اعا – حالقىمىزدىڭ رۋحاني دامۋىنا, سونداي-اق ەلىمىز تاۋەلسىزدىگىنىڭ نىعايۋىنا ەلەۋلى ىقپال ەتكەن تۇلعا. سوندىقتان ونىڭ ەسىمىن ماڭگى ەستە قالدىرۋ – ءبىزدىڭ ورتاق مىندەتىمىز», دەدى ماۋلەن اشىمباەۆ.