جۇرت تا جىرعا سۋساپ قالىپتى. بۇل كۇنى قولدارىنا گۇل شوقتارىن ۇستاعان وسكەمەندىكتەر ء«تور التاي جىرلايدى» اتتى پوەزيا فەستيۆالىنە اسىققان. ەل تاۋەلسىزدىگىنىڭ 30 جىلدىعىنا وراي ۇيىمداستىرىلعان جىر فەستيۆالىنە جان-جاقتان اقىندار مەن جازۋشىلار جينالدى.
ولاردىڭ قاتارىندا قازاقستان رەسپۋبليكاسى جازۋشىلار وداعىنىڭ توراعاسى ۇلىقبەك ەسداۋلەتوۆ, بيىل سەكسەننىڭ سەڭگىرىنە شىققان جازۋشى كادىربەك سەگىزباەۆ, جەتپىستىڭ جەلكەنىن قولعا العان قالامگەر الىبەك اسقاروۆ, اقىندار تىنىشتىقبەك ابدىكاكىموۆ, باۋىرجان جاقىپ, داۋلەتكەرەي كاپ ۇلى جانە وڭىرىمىزدەن شىققان وزگە دە ولەڭ جۇيىرىكتەرى بار.
ءبىر كۇنگە جوسپارلانعان جىر فەستيۆالىن اقىندار مەن جازۋشىلار اباي مەن جامبىل ەسكەرتكىشتەرىنىڭ الدىنا گۇل شوقتارىن قويۋ راسىمىمەن باستادى.
– بۇگىنگى ۇلى مەرەكە قۇتتى بولسىن! ۇلى دەپ تۇرعانىمنىڭ دا وزىندىك سەبەبى بار. تاۋەلسىزدىكتىڭ العاشقى جىلدارى وسكەمەننەن قازاقتىڭ رۋحانياتىن ىزدەگەندى قويىپ, ءوزىمىزدى ءوزىمىز ارەڭ تاباتىن ەدىك. سوندىقتان دا بۇگىنگى باستالىپ جاتقان رۋحاني تويىمىزدى تاۋەلسىزدىكتىڭ جەمىسى, ۇلى توي دەپ بىلگەن ءجون. جالپى, قازاق پوەزياسىن ابايسىز ەلەستەتۋ مۇمكىن ەمەس, سوندىقتان دا جىر فەستيۆالىن ابايعا تاعزىم جاساۋدان باستاپ تۇرمىز, – دەدى جازۋشىلار وداعى شىعىس قازاقستان وبلىستىق فيليالىنىڭ ديرەكتورى, جازۋشى الىبەك قاڭتارباەۆ.
الدىمەن قازاق پوەزياسىنىڭ الىپتارىنا قۇرمەت كورسەتكەن جازۋشىلار مەن اقىندار ەكىگە ءبولىنىپ كىتاپحانالارعا بەت بۇردى. ۇلىقبەك ەسدەۋلەتوۆ باستاپ, جالىندى جاستار قوستاعان اقىندار پۋشكين اتىنداعى وبلىستىق كىتاپحانادا باس قوستى. قازاقى داستۇرگە ساي داستارقان باسىنا جايعاسقان قالامگەرلەر ءسوز ونەرىنىڭ بۇگىنى مەن بولاشاعى جايلى سۇبەلى اڭگىمە ءوربىتتى.
– اباي مەن جامبىلدى وسكەمەننىڭ تورىندەگى تاس تۇعىرعا قوندىرعانىمىزبەن ۇلت بولىپ رۋحانياتقا مويىن بۇرا قويماعان ەدىك. ءبىز وسىنداي رۋحاني شاراعا جەتى جىل كۇتىپ بارىپ قول جەتكىزىپ وتىرمىز. ايماق باسشىلىعى شىعىستىڭ التىنى مەن التىن ادامىن قازعاندا التىنداي ادەبيەتىنە كوڭىل بولمەي مە دەگەن ىشتەي وكپە دە بار بولاتىن. بۇگىن سول وكپە تارقاپ, ءۇمىت وتى جانعان ءتارىزدى. وسى ارالىقتا ءبىراز جاس قالامگەرلەردىڭ ءوسىپ جەتىلگەنىن كورىپ وتىرمىز. جاس قالامگەرلەردى ءبىز وسىنداي رۋحاني شارالار اياسىندا قاتارعا قوسىپ كەلەمىز, – دەدى جازۋشىلار وداعىنىڭ توراعاسى ۇلىقبەك ەسداۋلەتوۆ.
سونداي-اق ول «اباي الەمى» سەرياسى بويىنشا جىل سايىن اقىندار مەن جازۋشىلاردىڭ كىتاپتارى جارىق كورىپ كەلە جاتقانىن ايتتى. جىلى لەبىزدى اقىن تىنىشتىق ابدىكاكىموۆ جالعاپ, رۋحانياتتاعى جاستاردىڭ وسە بەرۋىنە تىلەكتەستىك ءبىلدىردى.
– سوڭعى كەزدە قازاقستان جازۋشىلار وداعى كوپتەگەن ىستەر اتقارىپ جاتىر. ءبىراز جاستارى-مىز وداققا مۇشە بولىپ, قاتارعا ىلەستى. وسكەمەندە رۋحانياتقا ازداپ بولسىن, كوڭىل ءبولىندى. جالپى قازاقتىڭ رۋحاني استاناسى سەمەي ەدى عوي. مەن قازىر قايران قالام! جىل سايىن ارتقا كەتىپ بارادى. رۋحانياتىمەن قوسا تىنىس-تىرشىلىگىنىڭ ءوزى تومەن. اياگوزدىڭ دەڭگەيىنە ءتۇسىپ كەتتىك. بىزگە دە ءبىراز كوڭىل بولىنسە دەپ ويلايمىن, – دەپ سەمەيدىڭ سۇرەڭ تارتىپ بارا جاتقانىن تىلگە تيەك ەتتى تىنىشتىقبەك ابدىكاكىموۆ.
ال تولەگەن جانعاليەۆ جيىنداعى ءسوزىن ولەڭمەن تۇيىندەدى. ارنايى شاقىرىلعان وزگە دە قوناقتار ويلارىن ورتاعا سالىپ, رۋحاني شارانىڭ جالعاسىن تابۋىنا تىلەكتەستىك ءبىلدىردى.
ورالحان بوكەي اتىنداعى قالالىق كىتاپحانادا باس قوسقان جازۋشىلار دا تالاي-تالاي تاريحتى تارقاتىپ, ەسكى كۇننىڭ ەستەلىكتەرىمەن ءبولىستى. جينالعان قاۋىم قالامدى قارۋ ەتكەن جازۋشىلار توبى بيىل سەكسەننىڭ سەڭگىرىنە شىققان كادىربەك سەگىزباەۆ پەن جەتپىسكە تولعان الىبەك اسقاروۆ سىندا جازۋشىلاردىڭ اڭگىمەلەرىن تىڭدادى.
وسىلايشا, ورامدى وي, سۇبەلى ءسوز, سۇلۋ جىرمەن ساباقتالعان رۋحاني شارا پوەزيا فەستيۆالىمەن جالعاسىن تاپتى. مۇندا وبلىستىڭ جاس اقىندارى جىردان شاشۋ شاشىپ, كورەرمەن قوشەمەتىنە يە بولدى. قوشەمەت عانا ەمەس, مۇراتحان كەنجەحان, قىزىربەك دۇرگىنباي, ايزات راقىش, حاسەن زاكاريا, مۇرات تاستاعان, جۇماعازى يگىسىن, باۋىرجان يگىلىك سىندى قالامگەرلەرگە جازۋشىلار وداعىنىڭ كۋالىگى تابىستالدى.