ءىىم جىل باسىنان بەرى ۆاكتسينا پاسپورتى مەن پتر-انىقتاماسىن قولدان جاساۋ بويىنشا 65 قىلمىستىق ءىس قوزعادى, دەپ حابارلايدى Egemen.kz.
ىشكى ىستەر مينيسترلىگى تاراتقان اقپاراتقا سايكەس, Covid-19 كوروناۆيرۋس ينفەكتسياسى سالدارىنان كوپتەگەن ادامنىڭ ءومىرى قيىلۋدا. تەك ءبىر تاۋلىك ىشىندە قازاقستاندا قاۋىپتى ينفەكتسياعا وڭ پتر-تالداۋى بار 5648 ناۋقاس انىقتالدى. بارلىق قابىلدانعان شەكتەۋ شارالارىنا قاراماستان, بۇل سان كۇن سايىن ءوسىپ كەلەدى.
ءىىم-ءنىڭ اسا الاڭداتارلىق ەپيدەميولوگيالىق جاعدايىن ەسكەرە وتىرىپ, مەملەكەت باسشىسىنىڭ تاپسىرماسى بويىنشا وسى اۋرۋمەن بايلانىستى بارلىق قىلمىستىق كورىنىستەرگە ەرەكشە كوڭىل بولىنەدى. جالعان پتر تەستىلەرى مەن ۆاكتسيناتسيا پاسپورتتارىن قولدان جاساۋ جانە پايدالانۋشىلاردى انىقتاۋ باعىتىنداعى جۇمىستار بەلسەندى جۇرگىزىلۋدە, ويتكەنى ۆاكتسيناتسيالانباعان ازاماتتار كوروناۆيرۋستىڭ تارالۋىنا جاعداي جاساپ, باسقالارعا جۇقتىرۋ قاۋپىن جوعارىلاتادى.
تەرگەۋ بولىمشەلەرىنىڭ وندىرىسىندە پتر-تەستىلەردى قولدان جاساۋ, دايىنداۋ نەمەسە وتكىزۋ بويىنشا قىلمىستىق كودەكستىڭ 385-بابى بويىنشا 42 قىلمىستىق ءىس بولدى (قك 385-بابى 1-بولىگى-23, 2-بولىگى-3, 3-بولىگى-16), ونىڭ ىشىندە 39-ى اعىمداعى جىلى تىركەلگەن. ۆاكتسينا پاسپورتىن قولدان جاساۋ فاكتىلەرى بويىنشا اعىمداعى جىلى 23 قىلمىستىق ءىس تىركەلدى, تەرگەۋ جالعاسۋدا.
قولدان جاسالعان قۇجاتتاردىڭ سانى جانە ءاربىر ءىس بويىنشا زاڭعا قايشى ارەكەتتەرگە قاتىسۋشىلاردىڭ سانى دا ءار ءتۇرلى. بۇلار تەرگەۋ ناتيجەلەرى بويىنشا ناقتىلاناتىن بولادى. ىشكى ىستەر ورگاندارى جالعان پتر-انىقتامالار مەن ۆاكتسينا پاسپورتىن ساتۋ فاكتىلەرىن انىقتاۋ بويىنشا ءتۇرلى جەدەل-ىزدەستىرۋ ءىس-شارالارىن جۇرگىزۋدە.
پوليتسيا قىزمەتكەرلەرى مەديتسينالىق ورتالىقتاردى, ەمحانالاردى, ۆاكتسينا الۋ پۋنكتتەرىن تەكسەرۋدى جالعاستىرۋدا. ءىىم جالعان قۇجات جاساعانى ءۇشىن 4 جىلعا دەيىن باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك, ال ونى پايدالانعانى ءۇشىن 40 تاۋلىككە دەيىن قاماۋعا الۋ كوزدەلگەنىن ەسكە سالادى.