10 جىل بۇرىن, 2011 جىلدىڭ 16 شىلدەسىندە بايقوڭىر عارىش ايلاعىنان قازاقستاندىق «Kazsat-2» بايلانىس جانە حابار تاراتۋ جەرسەرىگى ۇشىرىلدى. ەكىنشى ۇلتتىق بايلانىس جەرسەرىگىن ءساتتى ۇشىرۋ جانە ىسكە قوسۋ قازاقستان رەسپۋبليكاسىنىڭ وزىندىك جەرسەرىكتىك شوقجۇلدىزىن قۇرۋدىڭ ماڭىزدى كەزەڭى بولدى, دەپ حابارلايدى Egemen.kz.
بۇل تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مالىمدەدى.
«Kazsat-2» عارىش اپپاراتىنىڭ قىزمەت ەتۋ ايماعى قازاقستان رەسپۋبليكاسىنىڭ بۇكىل اۋماعىن جانە ورتالىق ازيا ەلدەرىن قامتيدى. وربيتادا 86,5° شىعىس بويلىقتا ورنالاسقان عارىش اپپاراتتارىنىڭ بەلسەندى ءومىر ءسۇرۋى 12,5 جىلعا ەسەپتەلگەن.
تەحنيكالىق رەسۋرس 14,5 جىلدى قۇرايدى. «Kazsat-2» ىسكە قوسىلعاننان كەيىن بايلانىس وپەراتورلارىنا بايلانىس قىزمەتتەرىن ۇسىنۋ, اقپاراتتىق قىزمەت اياسىن كەڭەيتۋ, ەلەكتروندى ۇكىمەت, ينتەرنەت جانە ۇيالى بايلانىس جۇمىسىن جاقسارتۋ مۇمكىندىگى ايتارلىقتاي ءوستى. «KazSat-2» جەرسەرىگى پايدالانۋدى باستاعاننان كەيىن 10 جىل وتكەن سوڭ دا شتاتتىق رەجيمدە جۇمىس ىستەيدى. 16.07.2021ج. جاعدايىنا عارىش كەمەسىنىڭ جۇكتەمەسى 70% قۇرايدى.
«KazSat-2» قىزمەتتەرىن 11 ءىرى جەرسەرىكتىك وپەراتورلار پايدالانادى, KazSat-2 عارىش اپپاراتى ارقىلى جۇمىس ىستەۋگە رۇقسات ەتىلگەن جەرسەرىكتىك جەر ستانتسيالارىنىڭ سانى قازاقستان رەسپۋبليكاسىنىڭ بۇكىل اۋماعىندا 5 119 بىرلىكتى قۇرايدى. ستاتيستيكالىق مالىمەتتەرگە سايكەس, 2021 جىلدىڭ 16 شىلدەسىنە شاققاندا «Kazsat-2» 3654 تاۋلىك بويى ۇشىپ ءجۇر, وسى ۋاقىت ارالىعىندا 13 مىڭ جەرسەرىكتىك باسقارۋ سەانستارى وتكىزىلدى, بايلانىس جانە حابار تاراتۋ عارىش اپپاراتتارىن باسقارۋدى قامتاماسىز ەتۋگە كەم دەگەندە 40 ينجەنەر قاتىستى.
بۇگىندە ەكى اپپاراتتان («Kazsat-2», «Kazsat-3») جانە «اقكول» (اقمولا وبلىسى) جانە «كوكتەرەك» (الماتى وبلىسى) ەكى باسقارۋ كەشەنىنەن تۇراتىن «Kazsat» عارىشتىق بايلانىس جانە حابار تاراتۋ جۇيەسى ستراتەگيالىق جانە اقپاراتتىق قاۋىپسىزدىككە كەپىلدىك بەرە وتىرىپ, قازاقستان رەسپۋبليكاسىن بايلانىس جانە حابار تاراتۋ قىزمەتتەرىمەن تولىقتاي قامتاماسىز ەتەدى.
KazSat بايلانىس جەرسەرىكتەرىنىڭ قىزمەتتەرىن ەل اۋماعىندا 13 مىڭنان استام جەر ستانتسيالارى بار قازاقستاندىق 15 نەگىزگى بايلانىس جانە حابار تاراتۋ وپەراتورلارى پايدالانادى. «KazSat» عارىشتىق بايلانىس جۇيەسىنىڭ جالپى جۇكتەمەسى قازىرگى ۋاقىتتا شامامەن 73% قۇرايدى.
«كazsat-2» جەرسەرىگىنىڭ ۇشىرىلعانىنا 10 جىل تولاتىن ايتۋلى كۇنى «رعبو» اق ۇجىمىندا قازعارىش باسشىلىعى مەن سەرىكتەستەرىنىڭ قاتىسۋىمەن ونلاين رەجيمدە سالتاناتتى ءىس-شارا وتكىزىلەدى.