جۋىردا عانا «جاسىل ايماقتا» بولعان ءوڭىر بار بولعانى ءبىر اپتانىڭ ىشىندە الدىمەن «سارىعا», ودان توقتاۋسىز «قىزىلعا» ءوتىپ وتىر. سوڭعى اپتاداعى سىرقاتتانۋ 141 جاعدايدان 279 جاعدايعا دەيىن كۇرت ەكى ەسەگە ارتتى جانە ودان ءارى ءوسۋ ءۇردىسى بار. بۇل جاعداي, اسىرەسەى اۋدانداردا بايقالادى. ماسەلەن, قىزىلجار اۋدانىنداعى سىرقات جاندار سانىنىڭ ءوسىمى 2,6 ەسە, اققايىڭ اۋدانىندا 3,8 ەسەگە, عابيت مۇسىرەپوۆ اۋدانىندا 4,7 ەسە, تايىنشا اۋدانىندا 1,9 ەسە ارتقان.
سوڭعى تاۋلىكتە جامان ىندەتپەن تىركەلگەندەر سانى 55-كە جەتىپ, رەسپۋبليكانىڭ باسقا ايماقتارىنا قاراعاندا از بولعانىمەن ەپيدەميالىق جاعدايدى باعالاۋ ماتريتساسىنا سايكەس تۇراقتى ءوسىم بولىپ وتىرعاندىقتان, وبلىس «قىزىل ايماق» قاتارىنا جاتقىزىلدى. بۇعان 100 مىڭ تۇرعىنعا شاققانداعى سىرقاتتانعاندار سانى, سونداي-اق ينفەكتسيانىڭ تارالۋ دەڭگەيىن كورسەتەتىن رەپرودۋكتيۆتى كورسەتكىش تە اسەر ەتەدى.
وتكەن تاۋلىكتە وبلىستاعى بارلىق سىرقاتتانعاندار سانى 15 675 ادامعا جەتتى. ال سوڭعى تاۋلىكتە تىركەلگەن 55 جاعدايدىڭ 51 نەمەسە 93%-ى اۋرۋ بەلگىلەرى بار جانە 4 جاعداي نەمەسە 7%-ى اۋرۋ بەلگىلەرى جوق. سونىڭ ىشىندە سىرقاتتانعاندار پەتروپاۆل قالاسىندا – 24, ايىرتاۋ اۋدانىندا – 10, قىزىلجار اۋدانىندا – 5, ەسىل مەن اقجار اۋداندارىندا – 4, شال اقىن اۋدانىندا – 3, جامبىل جانە ءۋاليحان اۋداندارىندا – 2 جانە عابيت مۇسىرەپوۆ اۋدانىندا 1 جاعداي تىركەلدى.
سىرقاتتانعانداردىڭ جاسى دا وزگەردى. قازىرگى ۋاقىتتا اۋىرعانداردىڭ 57%-ى 40 جاستان كىشى, بۇرىن بۇل كورسەتكىش 40%-دان اسپاعان. سولتۇستىك قازاقستان وبلىسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى اسەت جۇماتاەۆتىڭ ايتۋىنا قاراعاندا, سىرقاتتىڭ كوبەيۋى رەسپۋبليكا اۋماعىندا «دەلتا» شتامىنىڭ اينالىمىمەن, سونداي-اق حالىقتىڭ كارانتيندىك شارالاردى ساقتاۋ جونىندەگى ءتارتىبىنىڭ تومەندەۋىمەن بايلانىستى ەكەن. بۇل رەتتە وبلىستىق ۆەدومستۆوارالىق كوميسسيانىڭ شەشىمىمەن 14 شىلدەدەن باستاپ جاڭا شەكتەۋلەر ەنگىزىلدى.
وبلىستا ۆاكتسينانىڭ ءبىرىنشى كومپونەنتىن العاندار سانى – 165 525 ادام. بۇل بارلىق الۋعا ءتيىستى حالىقتىڭ 53,2%-ى دەگەن ءسوز. سونىڭ ىشىندە 83 725 ادام ەكىنشى كومپونەنتتى الدى نەمەسە بۇل 26,9%.
سولتۇستىك قازاقستان وبلىسى