اتىراۋ وبلىسىندا كوروناۆيرۋس ينفەكتسياسىن جۇقتىرعان 2 106 ناۋقاس وقشاۋلانعان. ونىڭ ىشىندە 824 ادام ينفەكتسيالىق ستاتسيونارلاردا, ال, 1 282 پاتسيەنت ۇيىندە ەمدەلىپ جاتىر, دەپ حابارلايدى Egemen.kz.
وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ اقپاراتىنا قاراعاندا, 12 شىلدەدە 334, 13 شىلدەدە 320 ادامنان قاۋىپتى ۆيرۋستىڭ بەلگىسى تابىلىپ وتىر.
ەكى كۇندە اتىراۋ قالاسىندا 495 ناۋقاس تىركەلگەن. ال تەڭىز كەنىشىندە 26, جىلىوي اۋدانىندا 40, يندەردە – 24, قۇرمانعازىدا – 22, يساتايدا – 17, ماحامبەتتە – 13, قىزىلقوعادا – 11, ماقات اۋدانىندا 6 ادام كوروناۆيرۋس ينفەكتسياسىن جۇقتىرعان.
«قازىر ينفەكتسيالىق ستاتسيونارلاردا 824 ناۋقاس قاۋىپتى ۆيرۋسقا قارسى ەم قابىلداپ جاتىر. ونىڭ ىشىندە مودۋلدىك اۋرۋحانادا 194, اۋداندارداعى ستاتسيونارلاردا 184, №2 وبلىستىق اۋرۋحانادا 172, كارديولوگيالىق ورتالىقتا 109, فتيزيوپۋلمانولوگيالىق ورتالىقتا 91 پاتسيەنت وقشاۋلاندى. سونداي-اق, تەڭىز كەن ورنىنداعى ستاتسيوناردا 74 ادام ەمدەلۋدە. بۇعان قوسا, ۇيىندە ەمدەلۋ ءۇشىن وقشاۋلانعان ناۋقاستار سانى – 1 282 ادام», دەپ حابارلادى باسقارمانىڭ ءباسپاسوز قىزمەتىنەن.