ماۋسىم ايىنىڭ سوڭىندا اقش-تىڭ لاس-ۆەگاس قالاسىندا وتكەن كاسىپقوي بوكس كەشىندە جانىبەك ءالىمحان ۇلىنىڭ امەريكالىق روب برانتتان باسىم تۇسكەنى بەلگىلى. الەمنىڭ ەكس-چەمپيونىن ساباپ تاستاعاننان كەيىن «قازاقتىڭ قايسار ۇلى ەندى كىممەن جۇدىرىقتاسادى ەكەن؟» دەگەن ساۋالدىڭ تۋىنداۋى زاڭدى. وسى ورايدا جانىبەكتىڭ الداعى ۋاقىتتاعى قارسىلاسى رەتىندە مەكسيكالىق حايمە مۋنگيانىڭ ەسىمى اتالۋدا. وزگەلەردى ايتپاعاندا, تىپتەن اقش-تىڭ اتىشۋلى پروموۋتەرى بوب ارۋمنىڭ ءوزى ايتۋلى قوس مىقتىنىڭ ءبىر-بىرىمەن كۇش سىناسقانىن اتتاي قالاپ وتىرعان كورىنەدى.
حايمە مۋنگيانىڭ مىقتىلىعى ەش داۋ تۋعىزبايدى. بيىل كۇزدە 25 جاسقا تولعالى وتىرعان مەكسيكانىڭ باتىسىنداعى جاڭا كاليفورنيا شتاتىنا قاراستى تيحۋانا قالاسىنىڭ تۋماسى اۋەلدە اۋەسقوي رينگتە ايتارلىقتاي تابىستارعا قول جەتكىزدى. اتاپ ايتساق, جاستار مەن ەرەسەكتەر اراسىندا ەل چەمپيونى اتانىپ, ءتۇرلى حالىقارالىق تۋرنيردە توپ جاردى. دەسەك تە ونىڭ اڭسارى كاسىپقوي رينگكە اۋدى. 2013 جىلدىڭ جازىندا وتكەن تۇساۋكەسەر كەزدەسۋىندە 16 جاسار ورەن ءوزىنىڭ وتانداسى مانۋەل مورانى وڭدىرماي ساباپ تاستادى. باسەكە ەكىنشى راۋندتا توقتاتىلدى. سودان بەرگى سەگىز جىل ارالىعىندا حايمە 37 جەكپە-جەك وتكىزىپ, بارلىعىندا جەڭىسكە جەتتى. 30 باسەكە مەرزىمىنەن بۇرىن اياقتالدى. ءبىر ايتا كەتەرلىگى, العاشقى 26 كەزدەسۋىن ول تەك ءوزىنىڭ جەرلەستەرىنە قارسى وتكىزگەن ەكەن. تەك سودان كەيىن بارىپ قانا وزگە مەملەكەتتەردىڭ ورەندەرىمەن قولعاپ تۇيىستىرە باستادى.
2018 جىلدىڭ 12 مامىرىندا اقش-تىڭ نيۋ-يورك قالاسىندا ۇيىمداستىرىلعان بوكس كەشىندە مۋنگيا ءبىرىنشى ورتا سالماقتىڭ تەڭدەسسىزى سادام اليمەن كۇش سىناستى. سول كۇنگە دەيىن 27 كەزدەسۋدىڭ تەك بىرەۋىندە عانا جەڭىلگەن امەريكالىق بوكسشى وسى باسەكە بارىسىندا تىم دارمەنسىز كۇي كەشتى. ءبىرىنشى جانە ءتورتىنشى راۋندتار ارالىعىندا حايمە ونى ءتورت رەت نوكداۋنعا جىبەرىپ, اقىرى ەسىنەن تاندىرىپ تىندى. وسىلايشا, حايمە 21 جاستان اسقان شاعىندا WBO نۇسقاسى بويىنشا الەم چەمپيونى اتاندى.
حايمە مۋنگيا چەمپيوندىق ءتاجىن بەس مارتە ءساتتى قورعادى. وسى ورايدا, ول ۇلىبريتانيالىق ليام سميت (26-1-1), كانادالىق برەندون كۋك (20-1), جاپونيالىق تاكەسي ينوۋە (13-0-1), يرلانديالىق دەننيس حوگان (28-1-1) جانە گانالىق پاتريك اللوتي (40-3) سىندى تانىمال بىلعارى قولعاپ شەبەرلەرىن جاقسىلاپ تۇرىپ سابادى. بىلتىر ورتا سالماققا اۋىسقان مەكسيكالىق سايىپقىران اۋەلى يرلانديانىڭ وكىلى گاري و’سالليۆاندى (30-3) سان سوقتىردى. بۇل باسەكەنىڭ «ماسەلەسى» 11-راۋندتا شەشىلدى. 30 قازاندا باگامالىق تۋرەانو دجونسوندى (21-2-1) جەڭدى. ال 19 ماۋسىمدا پولشالىق كاميل شەرەمەتانىڭ (21-1) سىلىكپەسىن شىعاردى. سوڭعى رەت كەزدەسكەن بوكسشىلاردىڭ ەكەۋى دە باسەكە بەل ورتاعا جەتكەن تۇستا جەكپە-جەكتى جالعاستىرۋدان باس تارتتى.
ءيا, ءبىر كەزدەرى مۋنگيانىڭ قازاقستاندىق بوكسشىلارمەن كەزدەسۋى مۇمكىن دەگەن اڭگىمەلەردىڭ دە وربىگەنى راس. العاشىندا قانات يسلامنىڭ, كەيىننەن گەننادي گولوۆكيننىڭ ەسىمدەرى اتالدى. تىپتەن قوس تاراپ اراسىندا كەلىسسوزدەر جۇرگىزىلىپ جاتقانى جايىندا دا ايتىلدى. راسىندا دا, بۇل جەكپە-جەكتەردى جانكۇيەرلەر تاعاتسىزدانا كۇتكەن ەدى. ويتكەنى ەسىمدەرى اتالعان بوكسشىلار شەتىنەن مىقتى. ونداي كەزدەسۋلەردىڭ اسا قىزىقتى ءارى تارتىستى وتەتىنىنە ەشكىمنىڭ كۇمانى جوق. بىراق بۇل باسەكەلەردى كورۋ باقىتى بىزگە بۇيىرمادى. جوعارىداعى جوسپارلار جۇزەگە اسپادى. بارلىق اڭگىمە ءسوز جۇزىندە قالدى.
مىنە, ەندى مەكسيكانىڭ ماقتان تۇتار بوكسشىسى قازاقتىڭ جاۋجۇرەك جىگىتىمەن كۇش سىناسۋى بەك مۇمكىن. بۇل اڭگىمەنىڭ شەتىن شىعارىپ وتىرعان بوب ارۋمنىڭ ءوزى. ايگىلى Top Rank Promotions كومپانياسىنىڭ نەگىزىن قالاۋشى باق وكىلدەرىنە بەرگەن سۇحباتتارىنىڭ بىرىندە مۋنگيا مەن ءالىمحان ۇلى اراسىندا جەكپە-جەك وتكىزۋگە ايرىقشا ىقىلاس ءبىلدىرىپ وتىرعانىن ءسوز اراسىندا ايتىپ قالدى. ەگەر ارۋمنىڭ ويى جۇزەگە اسسسا, سان ميلليون كورەرمەن اسا قىزىقتى جەكپە-جەكتىڭ كۋاسى بولاتىنىنا كۇمانىمىز جوق. سەبەبى حايمە مۋنگيانىڭ ءجۇرىپ وتكەن جولى جايىندا ءبىز جوعارىدا ەگجەي-تەگجەيلى باياندادىق. جانىبەك ءالىمحان ۇلىنىڭ دا بەدەلى كۇن وتكەن سايىن ارتىپ كەلەدى. بۇگىنگى تاڭدا ول WBO نۇسقاسى بويىنشا الەمدىك رەيتينگتە ەكىنشى ورىندى يەلەنۋدە. WBC پەن IBF-تىڭ توپ-10 بوكسشىسىنىڭ قاتارىنا ەنىپ وتىر. Ring جۋرنالىنىڭ تىزىمىندە جەتىنشى ساتىعا جايعاستى. بۇل – وتە جاقسى كورسەتكىش. ال ەڭ باستىسى, وسى جەكپە-جەك ءوتىپ, جانىبەك جەڭىسكە جەتكەن جاعدايدا قانداسىمىزدىڭ الەمدىك ءتاج ءۇشىن تالاسۋىنا تاماشا مۇمكىندىك تۋادى.
قازىرگى كەزدە WBO نۇسقاسى بويىنشا ورتا سالماقتىڭ تىزگىنى 33 جاستاعى اقش بوكسشىسى دەمەتريۋس اندرادەنىڭ قولىندا. 2007 جىلى چيكاگودا الەم چەمپيونى اتانعان ول 2008 جىلى ريو وليمپياداسىندا ونەر كورسەتتى. الايدا عالامدىق دودادا دەمەتريۋستىڭ جولى بولمادى. سودان ول كاسىپقويلار اراسىندا كۇش سىناسۋدى قۇپ كوردى. سول كەزدەن بەرى 30 كەزدەسۋ وتكىزگەن امەريكالىق ءاپايتوس بارلىعىندا جەڭىسكە جەتىپ, 18 قارسىلاسىن ەسىنەن تاندىردى. ءار جىلدارى ءتۇرلى سالماق دارەجەسى مەن ءتۇرلى نۇسقالاردىڭ التىن بەلبەۋىن يەلەندى. بىراق ودان قازاقتىڭ ۇلى قايمىعىپ وتىرعان جوق. كەرىسىنشە, سان مارتە جەكپە-جەككە شاقىرىپ, «مەن سەنى ۇرىپ جىعامىن» دەپ قوقان-لوققى دا كورسەتتى. ازىرگە چەمپيون ءۇنسىز. قالاي بولعاندا دا, جانىبەكتىڭ اندرادەمەن ايقاساتىن كۇنى جاقىنداپ كەلەدى. ءتۇبى ءبىر بۇل كەزدەسۋدىڭ كۋاسى بولاتىنىمىز انىق.