«وتانداستار قورى» كەاق ۆيتسە-پرەزيدەنتى ماعاۋيا سارباسوۆ «قانداستاردى اقپاراتتىق قولداۋ ورتالىعىنىڭ» جۇمىسى تۋرالى ايتىپ بەردى, دەپ حابارلايدى Egemen.kz.
«2019 جىلى ەلگە كوشىپ كەلگەن قانداستاردىڭ بەيىمدەلۋىنە, جاردەمدەسۋ جانە شەتەلدەگى وتانداستارعا اقپاراتتىق-كونسۋلتاتسيالىق قىزمەت كورسەتۋ ماقساتىندا «قانداستاردى اقپاراتتىق قولداۋ ورتالىعى» قۇرىلعان بولاتىن. ورتالىق قىزمەتى «بايلانىس ورتالىعىنان» جانە وبلىستارداعى «فرونت-كەڭسەلەردەن» تۇرادى. قانداستارىمىز «وتانداستار قورى» بىرىڭعاي اقپاراتتىق ورتالىعىنىڭ 1404 تەلەفون نومەرىنە تەگىن قوڭىراۋ شالىپ, كەڭەس الا الادى», دەدى ماعاۋيا سارباسوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ونىڭ ايتۋى بويىنشا, 2019-2021 جىلدىڭ ماۋسىمىنا دەيىن قانداستار مەن شەتەلدە تۇراتىن ەتنيكالىق قازاقتاردان بارلىعى 11 مىڭعا جۋىق ءوتىنىش كەلىپ ءتۇستى. ونىڭ 95 پايىزى قاناعاتتاندىرىلعان.
«كەلىپ تۇسەتىن سۇراقتاردىڭ كوپشىلىگى قۇجاتتاندىرۋ, تىركەۋ, ءبىلىم الۋ, الەۋمەتتىك جانە باسقا دا ماسەلەلەر. ودان بولەك, اتاجۇرتقا قونىس اۋدارۋعا بەل بۋعان قانداستارعا Erulik.kz ۆەب-پورتالىنداعى اقپارات تا تولىق قولجەتىمدى», دەپ ءتۇسىندىردى م. سارباسوۆ.
الداعى ۋاقىتتا قانداستارعا قاتىستى ءىس-شارالار تۋرالى اقپارات تاراتۋعا قولداۋ كورسەتۋ جانە مادەني-گۋمانيتارلىق بايلانىستاردى نىعايتۋ ماقساتىندا «وتانداستار قورى» جانىنان «شەتەلدەگى قازاق ءتىلدى باق قاۋىمداستىعىن» قۇرۋ جوسپارلانۋدا.