پاۆلودار وبلىسىندا ءبىر ايەلدى كامەلەتكە تولماعان ەكى بالاسىمەن قوسا پىشاقتاپ ولتىرگەن, دەپ حابارلايدى Egemen.kz.
«12 شىلدەدە ساعات 11:40-تا اقسۋ پوليتسيا باسقارماسىنىڭ كەزەكشى بولىمىنە اۋەزوۆ كوشەسىندە ورنالاسقان تۇرعىن ۇيلەردىڭ بىرىندەگى پاتەردەن جەتى جانە بەس جاستاعى كامەلەتكە تولماعان بالالارىمەن قوسا ءبىر ايەلدىڭ پىشاقتاپ ولتىرىلگەنى تۋرالى حابارلاما كەلىپ ءتۇستى. پوليتسيا دەپارتامەنتى مەن وبلىستىق پروكۋراتۋرانىڭ باسشىلىعى وقيعا ورنىنا شۇعىل جەتتى», دەپ حابارلايدى پاۆلودار وبلىستىق پد ءباسپاسوز قىزمەتى.
پوليتسيا دەپارتامەنتى بۇل ىسكە قاتىستى تاجىريبەلى جەدەل قىزمەتكەرلەر مەن تەرگەۋشىلەردىڭ اراسىنان ۆەدومستۆوارالىق جەدەل-تەرگەۋ توبى قۇرىلعانىن ناقتىلادى.
«قازىرگى ۋاقىتتا وقيعا ورنىندا كريمينولوگتار جۇمىس ىستەپ جاتىر, ولار وقيعا بولعان جەردى تەكسەرىپ جاتىر. وپەراتيۆتى پوليتسيا جانە ۋچاسكەلىك پوليتسيا ينسپەكتورلارى كۋاگەرلەردى انىقتاۋ ماقساتىندا ءۇي-ءۇيدى ارالاپ, تۇرعىندارمەن سۇحبات جۇرگىزەدى. قر قىلمىستىق كودەكسىنىڭ 99-بابى, «كىسى ءولتىرۋ» بويىنشا سوتقا دەيىنگى تەرگەۋ امالدارى قولعا الىندى. ساراپتاما تاعايىندالدى», دەيدى پاۆلودار وبلىستىق پد ءباسپاسوز قىزمەتى.