سەنات دەپۋتاتتارى التىنبەك نۇح ۇلى مەن نۇرجان نۇرسيپاتوۆ شىعىس قازاقستان وبلىسىنا ساپارى اياسىندا سەمەي قالاسىندا پەداگوگيكالىق كوللەدج وقىتۋشىلارىمەن كەزدەستى, دەپ حابارلايدى Egemen.kz.
دەپۋتاتتار مۇعالىمدەردىڭ سۇراقتارىنا جاۋاپ بەرىپ, ولارعا قاشىقتان وقىتۋدى زاڭنامالىق قامتاماسىز ەتۋگە قاتىستى جاقىندا قابىلدانعان زاڭنىڭ ەرەجەلەرىن ءتۇسىندىردى.
«تۇزەتۋلەر «قاشىقتان وقىتۋ» ۇعىمىن ناقتىلايدى جانە ونى وتكىزۋ ءتارتىبىن بەلگىلەنگەن. سونداي-اق وقۋلىقتاردى ساپالى دايىنداۋدىڭ جەكەلەگەن ەرەجەلەرى ەنگىزىلدى», دەدى سەناتور التىنبەك نۇح ۇلى.
سەناتور نۇرجان نۇرسيپاتوۆ ءوز كەزەگىندە سەسسيا بارىسىندا اتقارىلعان جۇمىستار تۋرالى ايتا كەلىپ, ينكليۋزيۆتى ءبىلىم بەرۋ تۋرالى قابىلدانعان زاڭنىڭ جاڭالىقتارىنا جان-جاقتى توقتالدى.
«زاڭدا ينكليۋزيۆتى جانە ارنايى ءبىلىم بەرۋدىڭ نورماتيۆتىك قۇقىقتىق بازاسىن جەتىلدىرۋ, سونداي-اق ەلىمىزدىڭ زاڭناماسىن ادام قۇقىقتارىنىڭ جالپىعا بىردەي دەكلاراتسياسى جانە مۇگەدەكتەردىڭ قۇقىقتارى تۋرالى كونۆەنتسيا قاعيداتتارىنا سايكەس كەلتىرۋ جونىندەگى مىندەتتەر شەشىلۋدە», دەدى سەناتور نۇرجان نۇرسيپاتوۆ.
سەناتورلاردىڭ پاۆلودار وبلىسى پروكۋراتۋراسىنىڭ باسشىلىعىمەن كەزدەسۋى بارىسىندا پالاتانىڭ اعىمداعى جىلعى زاڭ شىعارۋ قىزمەتى تۋرالى دا ءسوز بولدى. قىلمىستىق پروتسەسكە, قۇقىق قورعاۋ قىزمەتىنە جانە سايلاۋعا بايلانىستى زاڭناماعا ەنگىزىلگەن تۇزەتۋلەرگە ەرەكشە نازار اۋدارىلدى.