ءتىلسىز جاۋ جالاڭداپ تۇر

كۇنى كەشە عانا وبلىس ورتالىعىنىڭ شىعىس جاق بەتكەيى قويۋ تۇتىنگە بوكتى. كوكشەتاۋ-ششۋچينسك باعىتىنداعى جول بويى, پودحوز ەلدى مەكەنىنىڭ توڭىرەگىندەگى 20 گەكتار جەر جالىنعا ورانىپ, قاۋلاعان ءورتتىڭ ءبىر شەتى 0,5  گەكتار ورماندى شارپىدى. ءورت سوندىرۋگە جۇزدەن استام ءورت ءسوندىرۋشى مەن ورمان شارۋاشىلىعى قىزمەتكەرى جۇمىلدىرىلدى. ابىروي بولعاندا, جالىننىڭ سالدارىنان جاراقات العاندار جوق.

بيىل كۇن ەرەسەن ىستىق بولىپ تۇر. وتكەن دەمالىس كۇن­دەرى وبلىس اۋماعىنىڭ كەي جەرلەرىندە اۋا تەمپەراتۋراسى 40 گرادۋسقا دەيىن كوتەرىلدى. سوڭعى ءبىر اپتانىڭ ىشىندە 8 ورمان ءورتى بولدى. كەلىمدى-كەتىمدى كىسىسى كوپ زە­رەندى اۋدانىنىڭ كۋرورتتى ايماعىندا 4 وقيعا ورىن السا, اق­كول اۋدانىندا 3 مارتە ورمان-توعاي ورتەنىپ, ەرەي­مەننىڭ ەتەگىن دە جالىن شارپىدى. الاپات ءورت ءبىرجان سال اۋدانىندا بولدى. ءتىلسىز جاۋ 1480 گەكتاردى قامتىدى. كراس­نو­فلوت ەلدى مەكەنىنىڭ تۇرعىنى ءورت سالدارىنان قازا تاپتى. 

نەگىزىنەن, تابيعي ءورت ءبىرجان سال, ەرەيمەنتاۋ, اقكول اۋداندارىندا ءجيى شىعىپ تۇر. مامانداردىڭ ايتۋىنا قاراعاندا, دالانىڭ تاڭدايى كەۋىپ, قۋراپ تۇرعاندىقتان, ابايسىزدا ويلانباي تاستاي سالعان ءبىر تال تەمەكىنىڭ تۇقىلى جەتىپ جاتىر. ءتىپتى قاۋ ءشوپتىڭ ۇستىندە جاتقان اينەكتىڭ سىنىعى دا قۋراعان ءشوپتىڭ تۇتانۋىنا سەبەپشى.

ءورت سالدارىنان تابيعات زيان شەگىپ جاتىر. ورماننىڭ قالپىنا كەلۋىنە ۇزاق ۋاقىت قاجەت ەكەنى بەلگىلى. ال دالا ءورتىنىڭ كەسىرىنەن جىپ-جىلماعاي بولعان جايىلىمدار مەن شابىندىقتار بيىلعىداي قۋاڭشىلىق جىلى التىن جامىلعان اتىراپتان دا قىمبات ەدى. قالاي بولعان كۇندە دە دالانىڭ ديدارىن, تابيعاتتىڭ يەن بايلىعى – ورمانىمىزدى ويسىراتپاي ساقتاپ قالۋ ءۇشىن اركىمگە دە مۇقيات بولۋ كەرەك. 

اقمولا وبلىسى