كەنشىلەر استاناسىندا كورنەكتى عالىم, قوعام جانە مەملەكەت قايراتكەرى سۇلتان دوسماعامبەتوۆتىڭ ءمۇسىنى ورناتىلدى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
اباي كوشەسىندەگى ساياباقتا ورىن تەپكەن ءمۇسىننىڭ اشىلۋ سالتاناتىنا قاتىسقان وبلىس اكىمى جەڭىس قاسىمبەك قايراتكەر تۇلعانىڭ ءوڭىردىڭ جانە قازىرگى قازاقستاننىڭ دامۋىنا قوسقان ۇلەسىن اتاپ ءوتتى.
اتالعان ءىس-شارادا سۇلتان دوسماعامبەتوۆتىڭ زامانداستارى ەستەلىكتەرىمەن ءبولىسىپ, كورنەكتى عالىم جانە قوعام قايراتكەرى جايىندا جىلى لەبىزدەرىن ءبىلدىرىستى.
– عالىمنىڭ ۇلى اكە الدىنداعى پارىزىن ورىنداپ, عيبراتتى تاعزىم كورسەتتى دەپ ەسەپتەيمىن. بۇل مونۋمەنتالدى جوبا. قالاعا تارتىلعان كەرەمەت سىيلىق. سۇلتان قاپار ۇلىنىڭ ارامىزدان كەتكەنىنە بەس جىلدان استام ۋاقىت ءوتتى, بىراق ول سوڭىنان ۇلكەن مۇرا قالدىردى, – دەدى وتباسىنىڭ دوسى كۇلاش تۇسىپبەكوۆا.
سۇلتان قاپار ۇلىنىڭ ۇلى ەرلان دوسماعامبەتوۆ اكەسىنىڭ قاراعاندى قالاسىنىڭ عانا ەمەس, جالپى ەلىمىزدىڭ دامۋى ءۇشىن دە كوپ كۇش جۇمساعانىن اتاپ ءوتتى.
– ءبىز وتكەن عاسىردا ءوڭىرىمىزدىڭ الەۋمەتتىك-ەكونوميكالىق الەۋەتىن قالىپتاستىرعاندارعا قۇرمەت كورسەتتىك. مەنىڭ اكەمە ەسكەرتكىش ورناتۋعا جانە ونىڭ اشىلۋىنا قاتىسۋشىلاردىڭ بارلىعىنا العىس ايتقىم كەلەدى. بۇگىنگى العان اسەرىمدى سوزبەن جەتكىزۋ مۇمكىن ەمەس, – دەدى ول تەبىرەنىپ.
تۇعىرىمەن قوسا ەسەپتەگەندە بيىكتىگى ءتورت مەترگە جەتەتىن بيۋست رەسەيدىڭ جەتەكشى مۇسىنشىلەرىنىڭ ءبىرى الەكساندر تكاچۋكتىڭ قولىنان شىققان. قولادان قۇيىلعان ءمۇسىن دوسماعامبەتوۆتەر اۋلەتىنىڭ جەكە قاراجاتىنا جاسالعان ەكەن.
ەسكە سالساق, سۇلتان دوسماعامبەتوۆ ۇزاق جىلدار بويى پارتيالىق جانە مەملەكەتتىك ورگانداردا ەڭبەك ەتكەن. مەملەكەتتىك باسقارۋدى قۇرۋعا جانە دامىتۋعا ەلەۋلى ۇلەس قوستى.
سونىمەن قاتار, ول ءبىلىم بەرۋ جۇيەسىندە دە جەمىستى ەڭبەك ەتتى: تاۋ-كەن ينستيتۋتى (قازىرگى مەملەكەتتىك تەحنيكالىق ۋنيۆەرسيتەت) كافەدراسىنىڭ مەڭگەرۋشىسى بولدى, پەداگوگيكالىق ينستيتۋتتىڭ رەكتورى قىزمەتىن اتقاردى.
سۇلتان دوسماعامبەتوۆتىڭ ۇزاق جىلعى ادال ەڭبەگى لايىقتى باعالانىپ, ول «لەنين», «ەڭبەك قىزىل تۋ», «قۇرمەت بەلگىسى», «قۇرمەت» وردەندەرىمەن, قازاقستان رەسپۋبليكاسى پرەزيدەنتىنىڭ «العىس حاتتارىمەن» ماراپاتتالعان.