بايقوڭىردان «پروتون-م» زىمىرانى ۇشىرىلادى

بايقوڭىر عارىش ايلاعىنىڭ № 200 ۇشىرۋ الاڭىنان بورتىندا «ناۋكا» ءمودۋلى بار «پروتون-م» زىمىران-تاسىعىشىنىڭ ستارتى 2021 جىلعى 21 شىلدەدە, جەرگىلىكتى ۋاقىت بويىنشا ساعات 17:58-گە (نۇر-سۇلتان ۋاقىتىمەن ساعات 20:58:21) بەلگىلەنگەن. ۇشىرۋدىڭ رەزەرۆ ۋاقىتى -  22 جانە 23 شىلدە.

باستاپقىدا ۇشىرۋ 15 شىلدەگە بەلگىلەنگەن, الايدا ۇشار الدىنداعى جۇمىستاردان كەيىن «ناۋكا» ءمودۋلى مونتاجداۋ-سىناۋ كورپۋسىنا قايتارىلىپ, ۇشىرۋ ءبىر اپتاعا كەيىن قالدىرىلدى.

رەسەيلىك اقپارات قۇرالدارى ۇسىنعان مالىمەتكە سۇيەنسەك, ۇشىرۋدى كەيىنگە قالدىرۋ سەبەبى - مامانداردىڭ قۇراستىرۋ كەزىندە جۇلدىز سەنسورلارىن ەكران-ۆاكۋمدى جىلۋ وقشاۋلاعىشپەن جابۋدى ۇمىتىپ كەتۋىندە.

«ناۋكا» ءمودۋلىنىڭ حعس-قا ۇشۋى 8 تاۋلىككە سوزىلادى, ونىڭ «زۆەزدا» قىزمەتتىك مودۋلىنە قوسىلۋى 29 شىلدەگە بەلگىلەنگەن.

«ناۋكا» زەرتحانالىق ءمودۋلى پايدالانۋعا بەرىلگەننەن سوڭ, حعس-تىڭ رەسەيلىك سەگمەنتى قوسىمشا جۇمىس ورنى مەن جۇك ساقتاۋ, سۋ مەن وتتەگىنى رەگەنەراتسيالايتىن اپپاراتۋرا ورنالاساتىن ورىندى يەلەنەدى. ياعني عارىشكەرلەردىڭ جاعدايى جاقسارىپ, حعس ەكيپاجىنىڭ قاۋىپسىزدىگى كۇشەيە تۇسەدى.