تۇركىستان وبلىسىنىڭ اكىمى ومىرزاق شوكەەۆ قازاقستانداعى اقش-تىڭ توتەنشە جانە وكىلەتتى ەلشىسى ۋيليام موزەرمەن كەزدەستى. قوس تاراپ كەزدەسۋ بارىسىندا ەكى ەل اراسىنداعى ساۋدا-ەكونوميكالىق, ينۆەستيتسيالىق سالالاردا, اگروونەركاسىپتىك سەكتوردا ىنتىماقتاستىقتى دامىتۋ, تۋريزم مەن ءوزارا ارىپتەستىك قارىم-قاتىناس تۋرالى پىكىرلەسىپ, وي ءبولىستى.
«پاندەمياعا قاراماستان تۇركىستان وبلىسىندا قۇرىلىس قارقىنى باسەڭدەگەن جوق. جاڭا, زاماناۋي جوبالاردى ىسكە اسىرۋ ءۇشىن ينۆەستورلارعا اسا قولايلى جاعداي جاساۋعا ەرەكشە نازار اۋدارىلادى. ءتۋريزمنىڭ بارلىق باعىتى ءبىز ءۇشىن ۇلكەن باسىمدىققا يە. قوناقۇي, ويىن-ساۋىق كەشەندەرى, تۋريستەرگە قىزمەت كورسەتۋ, جەڭىل ونەركاسىپ, ماشينا جاساۋ, حيميالىق ءوندىرىس, قايتا وڭدەۋ, اۋىل شارۋاشىلىعى سىندى باعىتتاردا سەنىمدى سەرىكتەس بولۋعا اشىقپىز», دەدى ومىرزاق شوكەەۆ.
سونداي-اق وبلىس اكىمى ءىرى امەريكالىق كومپانيالاردىڭ اگروونەركاسىپتىك سەكتورداعى جوبالارىن جۇزەگە اسىرۋدىڭ تيىمدىلىگىن اتاپ ءوتتى. تۇركىستان ءوڭىرىنىڭ نارىعىنا شىققان شەتەلدىك كومپانيالارىنىڭ مۇمكىندىگىنە توقتالدى.
ءوز كەزەگىندە, ۋ. موزەر ينۆەستيتسيالىق احۋالدى جاقسارتۋ تاسىلدەرىن جوعارى باعالاپ, امەريكالىق تاراپتىڭ ىنتىماقتاستىقتى قولدانىستاعى فورماتتا جالعاستىرۋعا دايىن ەكەنىن جەتكىزدى.
«كەزىندە قازاقستاننىڭ جاڭا استاناسىنىڭ سالىنۋىنىڭ كۋاسى بولعان ەدىم, ەندى مىنە, رۋحاني استانانىڭ قارىشتاپ دامۋىن كورىپ, كەرەمەت اسەر الدىم. سول ۋاقىتتاعى استانا وسىنداي بولاتىن. تۇركىستاننىڭ ساناۋلى ۋاقىتتان كەيىن قانداي بولىپ وزگەرەتىنىن كوز الدىما ەلەستەتتىم. تۋريزم سالاسى ينۆەستورلاردى قىزىقتىرادى دەپ ويلايمىن. جولدا كەلە جاتىپ, ءبىزدىڭ تەحنولوگيانى تۇركىستان اۋماعىندا پايدالاناتىندارىڭىزدى كوردىم. جاڭبىرلاتىپ سۋارۋ – وتە ءتيىمدى ءادىس, اسىرەسە, جەرگىلىكتى كليمات ءۇشىن تاپتىرماس ءتاسىل. مۇندايدا اعاشتاردىڭ كوگەرۋىنىڭ قانشالىقتى قيىن ەكەنىن جاقسى تۇسىنەمىن. وتە از ۋاقىتتا كوپ جۇمىستار اتقارىلعان ەكەن», دەدى اقش ەلشىسى.
شەتەلدىك دەلەگاتسيا تۇركىستان ءوڭىرى مەن وبلىس ورتالىعىنىڭ ەكونوميكالىق دامۋ باعىتىنا وڭ باعا بەرىپ, ايماقتىڭ الداعى جىلعى دامۋ تۇجىرىمداماسىنداعى بىرقاتار جوبالارعا, قازاق ۇلتتىق مادەنيەتىنىڭ ەڭ بايىرعى, اسا قۇندى سالالارىنىڭ ءبىرى – قولونەرىنە قىزىعۋشىلىق تانىتتى.